Klei Aê Diê Blŭ: Klei Bi Hriêng 6:6-11
Êlan kliăng: “Ơ mnuih alah, nao bĕ kơ hdăm; ksiêm dlăng kơ êlan ñu, čiăng kơ ih mâo klei thâo mĭn.” (Klei Bi Hriêng 6:6)
Klei êmuh ksiêm mĭn: Ya mta klei bi knăl hdăm mâo? Ya klei hriăm mtao Y-Salômôn yua mơ̆ng rup hdăm čiăng mtô kơ phung alah? Si klei khăp leh anăn kpă ênô Aê Diê, brei kơ drei hriăm mơ̆ng rup anei?
Wăt tơdah amâo mâo ôh khua kiă kriê, khua prŏng amâodah phung ksiêm dlăng kăp gĭt gai, mtrŭt, ƀiădah tui si klei jing Aê Diê brei kơ diñu, jih jang phung hdăm mă bruă kriăng kreh, gĭr ktĭr sơăi. Kdlưn hĭn kơnăn, diñu wăt lŏ thâo mkăp pioh mnơ̆ng ƀơ̆ng êjai yăn bhang, čiăng đăm ư̆ êpa hlăm yăn puih, jing yăn dleh duah mnơ̆ng ƀơ̆ng. Phung ksiêm hriăm lu hruê anei dôk ksiêm dlăng leh anăn ƀuh phung hdăm khăt hla hŏng klei knhâo tloh ênoh, diñu yua khơp kang ktang diñu pioh khăt hla mtah leh anăn dŭ ba pioh hlăm ƀăng diñu ti gŭ lăn. Leh anăn mâo êpul hdăm mkăn khăt đơ điêt ƀhĭ jih hla anăn pioh pla mao yua jing mnơ̆ng ƀơ̆ng kơ hluăt ĭ leh anăn kơ khua hdăm.
Hlăm hdruôm hră Klei Mphŭn Dơ̆ng kdrêč 41 leh anăn 42 čih yăl dliê kơ bruă Khua Yang brei klei thâo mĭn kơ Y-Yôsep čiăng kơ ñu đru čar Êjip mkăm pioh mdiê ƀlê hlăm kjuh thŭn mdiê jing mboh lu. Kyuanăn yơh, čar anei tlaih mơ̆ng klei ư̆ êpa hlăm kjuh thŭn ư̆ êpa êdei kơnăn, leh anăn tơl lŏ mâo êbeh dưi čhĭ kơ čar riêng gah dôk găn klei dleh dlan, mbĭt anăn dưi bi mtlaih jih găp djuê Y-Yôsep mơ̆ng klei djiê ư̆ êpa.
Aê Diê klei khăp mkra mjuăt bi hriăm phung alah hŏng Klei Blŭ thâo mĭn hlăm Klei Bi Hriêng. Ñu yua rup hdăm čiăng phat kđi phung alah, khăp pĭt hĭn kơ mă bruă, huĭ kơ dleh, huĭ kơ knap, duah mnêč êlan ñĕ đuĕ tlaih mă bruă (Klei Bi Hriêng 22:13). Kdlưn hĭn mơh, phung alah amâo bi leh ôh bruă jao kơ diñu, bi luč liê ngăn drăp Khua Yang thiê brei (Klei Bi Hriêng 12:27), êjai anăn phung kpă ênô lĕ buh kjuh blư̆ dưn ăt lŏ kgŭ ngă bruă digơ̆ nanao (Klei Bi Hriêng 24:16).
Aê Diê kpă ênô brei boh jhat truh tơdah drei amâo gưt asăp. Ñu amâo tŭ ôh klei alah amâodah amâo uêñ ngă bruă klam. Hlăm trăn anei, mtao Y-Salômôn hưn êlâo brei phung alah răng, klei ƀun knap srăng truh kơ diñu bhiâo riâo rit msĕ si phung knĕ leh anăn klei kƀah srăng truh kơ diñu msĕ si sa čô mnuih djă mnơ̆ng bi blah (êlan 11). Boh jhat truh kơ phung alah mă tŭ jing mtăp mđơr leh anăn djŏ găl.
Aê Diê amâo knŏng hưn êlâo brei răng ôh, ƀiădah wăt bi êdah klei Ñu khăp msĕ mơh, Ñu ktrâo brei kơ drei ƀuh rup bi hmô klei kriăng kreh mơ̆ng hdăm. Khua Yang klei jăk brei mmông găl kơ phung anak ƀuôn sang Ñu thâo ƀuh klei kƀah pô leh anăn bi mlih, dôk hdĭp thâo mĭn čiăng dưi mă tŭ boh jăk siam mơ̆ng Khua Yang brei. Akâo kơ Khua Yang brei kơ drei thâo ƀuh klei soh wê drei, leh anăn wăt thâo ƀuh mơh klei kpă ênô leh anăn klei khăp Khua Yang jing prŏng êdimi, čiăng kơ drei dôk hdĭp thâo mĭn, thâo uêñ bruă klam kơ pô hĭn, čiăng kơ klei hdĭp drei mâo klei mơak mơai, leh anăn Khua Yang dưi yua pioh ba klei tŭ dưn kơ Khua Yang leh anăn kơ lu mnuih.
Si drei bi êdah klei kpă ênô leh anăn khăp Khua Yang hŏng bruă mă drei?
Wah lač: Ơ Khua Yang, bi mni lač jăk kơ Khua Yang kyua klei mtô thâo mĭn mơ̆ng rup phung hdăm. Akâo Khua Yang đru kâo amâo alah ôh hlăm klei hdĭp, bi êdah klei kpă ênô leh anăn klei khăp Khua Yang hlăm knuih kriăng kreh ngă bruă Khua Yang jao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Amôs 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
