II Hơ’mon 35:1-19
“Ơ bơngai Isơrael, dang ei Kră Yang ‘Bok Kei-Dei iĕm tơtă athei pơm kiơ? Athei băt hli yom kơ Kră Yang ‘Bok Kei-Dei iĕm, yak kiơ̆ đĭ trong Sư, ‘mêm kơ Sư păng bơ̆jang kơ Kră Yang ‘Bok Kei-Dei iĕm hăm đĭ jơhngơ̆m, đĭ bơhngol iĕm, wei răk khôi juăt păng nơ̆r tơtă Kră Yang mă inh đei bơtho ăn kơ lu iĕm năr ‘nâu wă kơ iĕm đei pŭn hiôk.” (Bơtho Khôi Juăt 10:12-13)
Nơ̆r jet tơchĕng pơwao:
– Pơtao Jôsia hơmet lê̆ tơdrong kiơ hơdrol kơ wă pơm Phĕt Năm Brih?
– Đe jang liơ lăm jơ pơm Phĕt Năm Brih noh?
– Đơ̆ng tơdrong ‘bok pơtao Jôsia pơm noh tơ’blŏk kơ bơ̆n tơdrong kiơ?
Pơtao Jôsia âu đơ̆ng rŏng kơ sư hăm lu kon pơlei hơlơ̆k pơkă dơ̆ng wă pơm kiơ̆ Nơ̆r Kră Yang noh, sư chu pơm kiơ̆ hloi dôm tơdrong mă đei chih bơih lăm hla bơar Khôi Juăt mă đe ‘nao chă ‘bôh đơ̆ng lăm hnam akŭm noh, sư pơm Phĕt Năm Brih kơkuh kơ Kră Yang tơ Pơlei Jêrusalem, wă kơ kon pơlei ‘blŏk dơ̆ng đêl Kră Yang ‘mêm mơnat dŏng pơklaih lu sư đơ̆ng pơm đĭch bơngai Êgiptơ sơ̆. Ưh kơ pôm pơm keh tơdrong Phĕt mă năr ayơ ayơ kư̆m bưh ôh, sư khŏm pơm Phĕt noh trŏ kơ ‘năr mơjĭt puăn khei mônh, noh năr mă đe dan lê̆ bơih lăm tơdrong juăt (Lêwi 23:5). Pơtao Jôsia pre hơmet lê̆ hơdrol sep rơnep, chă lê̆ bơngai wă jang lăm jơ pơm phĕt noh, asong băl bu jang tơdrong ‘nâu, bu jang tơdrong ‘noh păng pơma pơlung pơdrŭt wă kơ lu sư jang tơdrong jang mă đei pơjao kơ lu sư noh gơh keh ‘lơ̆ng. Pơtao Jôsia kư̆m hơmet lê̆ hơdrol tôm lu sem dơrong wă soi pơyơ̆r ăn kơ Kră Yang ‘bơ̆t jơ pơm Phĕt Năm Brih noh mơ̆n. Kơdih ‘bok pơtao păng lu ‘bok kuan tih wei pơgơ̆r đe, bơngai tơm wei Hnam akŭm, bơngai wei pơgơ̆r adrĕch Lêwi, đĭ-đăng kơ lu sư bu bu kư̆m wang tơnôm bơ̆n rơmo, bơ̆n triu lơlap hloi wă soi pơyơ̆r ‘bơ̆t jơ pơm Phĕt tih noh. Jang Phĕt Năm Brih noh đei ‘bar tơdrong: Mă minh, pơyơ̆r tơmam soi (tr.11-12) Mă ‘bar, sa Phĕt Năm Brih (tr.13-15).
Lu ‘bok soi, lu bơngai Lêwi, “Lu bơngai hơri noh lu kon sâu A-sap”. Đĭ-đăng mă bu bu kơ lu sư noh jang trŏ kơ tơdrong jang kơdih kơ lu sư, păng jang trŏ thoi dôm tơdrong kiơ “đei chih bơih tơ lăm Hla bơar Môis” (tr.12). Lu bơngai wei ‘măng jang oei dơ̆ng ‘bơ̆t anih lu sư gak wei noh. “yua kơ ‘nhŏng oh lu sư bơngai Lêwi hơmet ăn kơ lu sư tơmam sa” (tr.15). Lu bơngai Isơrael mă akŭm hơdai tơ noh kư̆m wang pơm phĕt Sa ‘Bĕng ưh kơ đei ‘buih pông kiơ̆ kơ tơdrong juăt đei dan bơih (Lĕch đơ̆ng Êgiptơ 23:14-17).
Hla bơar’Bok Kei-Dei, dôm trong ‘nâu hei pơma hơlen tơdrong pơtao Jôsia hlôi pơm bơih kơmĭl hli yom, chu pơm kiơ̆ Nơ̆r Kră Yang đĭ jơhngơ̆m. Kơmĭl ‘lơ̆ng sư ‘noh bơ̆n ‘bôh ‘bơ̆t sư pơjing tơdrong pơm Phĕt Năm Brih sele sep rơnep păng pơyom hreh hrĕp noh. Sư hơmet lê̆ tôm tơdrong hơdrol bơih, đơ̆ng rơih bơngai wă jang truh tơ pơyơ̆r sem tơmam, kư̆m truh tơ lu sư jang hơrĭ hơrĭ lăm jơ pơm Phĕt noh hloi. Pơtao Jôsia kư̆m pơm kơmĭl lăm tơdrong pơyơ̆r tơmam, sư pơyơ̆r hăm jơhngơ̆m hiôk, hơlăng hơmrah,sem dơrong tih iĕ đơ̆ng sư pơyơ̆r noh lơ dêh (tr.6-7). Pơtao Jôsia ưh kơ ‘mêm hmach kơ jên tơmam păng jơhngơ̆m pran, tơdrong jang gleh hrat sư noh, sư pơyơ̆r ăn kơ Kră Yang dôm tơdrong, dôm tơmam mă ‘lơ̆ng ngơngei wă pơm Phĕt Năm Brih, ding mah “ưh kơ đei pơtao ayơ lăm lu pơtao Isơrael pơm Phĕt Năm Brih thoi pơtao Jôsia hlôi pơm noh.” (tr 18).
‘Bok Yakơ bơtho: “ Păng bơ̆n ‘nĕ kơ mơ̆ng lăm đon đĕch, khan ‘Bok Kei-Dei kư̆m iŏk, ưh ôh. Bơ̆n mơ̆ng păng pơm kiơ̆ hloi dôm tơdrong đe bơtho, noh na ‘Bok Kei-Dei iŏk” (Yakơ 1:22). Đơ̆ng kơmĭl ‘bok pơtao Jôsia đei pơm tơ’bôh noh tơ’blŏk kơ bơ̆n lơ dêh gah jơhngơ̆m hli yom păng chu pơm kiơ̆ Nơ̆r Kră Yang. Kơplah bơ̆n mơ̆ng đe bơtho, kơplah bơ̆n đŏk, hŏk pơhrăm Nơ̆r ‘Bok kei-Dei, bơ̆n đei kơtơ̆ng ‘bơ̆r Kră Yang bơtho khan ‘măn ăn kơ bơ̆n. Tơdrong mă kăl dêh noh, bơ̆n mơ̆ng nơ̆r Kră Yang ‘nĕ kơ hăm jơhngơ̆m hơi, mă-lei athei mơ̆ng mă hơlen, tơchĕng kơ tơdrong arih bơ̆n kơdih wă pơm kiơ̆ Nơ̆r Kră Yang bơtho noh mă tôm. ‘Noh bơih Kră Yang wă kơ bơ̆n khŏm pơm, na đơ̆ng tơdrong bơ̆n chu yom, pơm kiơ̆ noh kơnh Kră Yang kư̆m ăn kơ bơ̆n pŭn hiôk tôm mah (Bơtho Khôi Juăt 10:12-13).
Ơ Kră Yang, apinh Ih tơgŭm inh chu pơm kiơ̆ Nơ̆r Ih bơtho lăm tôm tơdrong, păng đĭ jơhngơ̆m awih awăn tơdrong jang Ih.Kư̆m apinh Ih ăn kơ inh đei jơhngơ̆m hiôk lăp đon pơyơ̆r ăn kơ Ih dôm tơdrong, dôm tơmam mă ‘lơ̆ng ngơngei lăm chăl arih inh. Inh krao khan yua hăm anăn Kră Yang Yêsu Kris, Amen!
Bơ̆n hơtai oei tơ’bôh tơdrong bơ̆n chu pơm kiơ̆ Nơ̆r Kră Yang pang ayơ lăm chăl arih bơ̆n?
Đŏk Sơ̆p hla bơar ‘Bok Kei-Dei lăm pêng sơnăm: Tơdrong Jang 15.
Kênh Youtube BHKTHN:
