Lukas 2:1-7
Nqe cim:
“Npelehees Efalathas, koj yog ib lub nroog uas me tshaj plaws nyob hauv tebchaws Yudas, tiamsis kuv yuav tso ib tug thawjcoj los tshwm rau hauv koj los kav cov Yixalayees; nws yeej muaj cajces sib txuas ua ntu zus thaum ub los.” (Mikhas 5:2)
Lus nug xav:
– Vajtswv tau ua dab tsi los ua kom tiav lo lus cogtseg txog qhov chaw uas Tswv Yexus yuav los yug?
– Tswv Yexus los yug hauv lub nkuaj tsiaj coj kev cia siab dab tsi los rau neeg ntiajteb?
– Peb yuav qhia peb txojkev ua tsaug rau Tswv li cas hauv lub caij Koob Tsheej nco txog Tswv Yexus yug xyoo no?
Los ntawm Vajtswv kev tswjhwm tibneeg keebkwm, Nws tau coj Yauxej thiab Malis mus rau hauv lub zos Npelehees, uas nyob deb ntawm Naxales kwv yees li peb hnub taug kev, kom Vajtswv Leej Tub tau los yug raws nraim li qhov chaw uas tus Cevlus Mikhas twb xub hais tseg ua ntej lawm (Mikhas 5:2).
Vajtswv Tus uas muaj hwjchim loj tshajplaws, tau siv Xixas Aunkuxataus, uas yog tus Huabtais muaj hwjchim tshajplaws hauv tebchaws Loos tiam ntawd ua yam cuabyeej los ua tiav Nws lub homphiaj, raws li Vajtswv Txojlus hais tias “Tus TSWV tswj vajntxwv lub siab yoojyim ib yam li nws tswj tus dej” (Pajlug 21:1). Xixas Aunkuxataus tau rhawv ib txoj kevcai kom cov pejxeem uas nyob thoob plaws txhua lub tebchaws uas yog cov nomtswv Loos kav, kom sawvdaws tuaj sau npe. Yog li ntawd, Yauxej yuav tsum coj nws tus pojniam rov mus sau npe hauv nws lub qub zos uas yog Npelehees. Lub zos Npelehees yog ib lub zos me, tiamsis cov neeg tuaj coob heev ua rau nkawd tsis muaj chaw so, “rau qhov tej tsev so, neeg twb so puv tas lawm.” Tsis tas li ntawd xwb, raws li txojcai ntawm cov Yudais, tus pojniam uas yug menyuam raug suav hais tias yog neeg tsis huv (Levis Kevcai 12:2), yog li ntawd Yauxej thiab Malis thiaj li yuav tsum mus nyob hauv ib lub nkuaj tsiaj. Nyob qhov ntawd, Malis thiaj yug tau nws thawj tug tub. Tus Metub Yexus tsuas tau ib daim ntaub qhwv nws lub cev thiab tso pw hauv ib lub dab zaub. Tsis muaj leejtwg nyob ze ntawd, tsuas yog Yauxej tibleeg xwb.
Nyob hauv Vajtswv txojkev tswjhwm, txij li ib tsab ntawv samhwm ntawm lwm haivneeg ib tug huabtais, los txog rau qhov uas tsev so tsis tshuav chaw, thiab tus tswv tsev kam cia Yauxej thiab Malis mus yug menyuam hauv lub nkuaj tsiaj ntawm lub tsev so, txhua tus neeg ntawd puavleej yog tej cuab yeej uas Vajtswv siv los ua tiav Nws lub homphiaj cia Tswv Yexus los yug hauv lub ntiajteb no. Vajtswv ua haujlwm dhau ntawm tibneeg kom ua tiav Nws lub homphiaj zoo kawg nkaus. Vajtswv Lub Chaw Xyeem Thib Ob uas nyob mus ib txhis tau nqis los nyob hauv qhov chaw muaj nrim uas raug khi nrog lub sijhawm thiab lub chaw nyob. “Yexus yeej muaj hwjchim sib luag zos li Vajtswv, tiamsis nws tsis tau xav hais tias nws yuav tuav lub hwjchim ntawd mus li. Tiamsis nws zoo siab tso ib puas tsav yam tseg, nws los yug ua neeg. Nws ua nws lub neej zoo li ib tug tubqhe, thiab nws txo hwjchim” (Filipis 2:6-7). Tswv Yexus tau txo hwjchim los yug hauv qhov chaw txomnyem tshaj, nyob hauv lub zos me Npelehees, thiab Nws tau tuag txhiv tibneeg saum tus ntoo khaublig. Vajtswv tau siv txhua yam ntawd los coj txojkev cawmdim los rau cov tibneeg txhaum thiab phem tshajplaws, uas muaj peb nyob hauv. Lub caij Koob Tsheej nco txog Tswv Yexus yug xyoo no, peb cia li los xav txog Vajtswv Tus uas muaj hwjchim txojkev hlub thiab txojkev cawmdim kom peb paub nyo hau ua Vajtswv tsaug thiab txiav txim siab ua neej rau Nws mus tas peb simneej.
Thov Vajtswv,
Tus Tswv, nyuam yaus ua Koj tsaug vim Tswv Yexus tau zoo siab los yug hauv lub dab zaub thiab lub nkuaj tsiaj uas txomnyem tshaj plaws nyob hauv lub zos Npelehees thaum ub, kom nyuam yaus tau txais kev zam txim thiab kev cawmdim. Thov Koj pab kom nyuam yaus ua neej rau Koj tag nrho lub siab thiab tshaj tawm Koj txoj kev cawmdim rau coob tus tibneeg. Nyuam yaus tuav Yexus Khetos lub npe thov. Amees.
Peb coglus dabtsi rau tus Tswv thaum tuaj ua Koob Tsheej nco txog Tswv Yexus yug?
Vajluskub hauv peb lub xyoos: Tes Haujlwm 12
Kênh Youtube BHKTHN:
