Lukas 1:57-66
Nqe cim:
“Kuv tus metub, sawvdaws yuav hu koj hais tias, koj yog ib tug cev Vajtswv tus uas muaj hwjchim loj kawg nkaus lus. Koj yuav ua tus Tswv ntej mus kho kev tos nws.” (Lukas 1:76)
Lus nug xav:
– Xakhaliyas nkawd txiav txim siab tis tus metub lub npe hu licas?
– Zaj xwm hais txog Yauhas Npatitus yug qhia peb kawm tau yam dab tsi?
– Peb qhuas thiab ua Vajtswv tsaug txog yam dab tsi hauv lub caij Koob Tsheej nco txog Tswv Yexus yug xyoo no?
Tom qab nyob nrog Elixanpes nyob peb lub hlis, Malis rov qab mus tsev lawm, ces Elixanpes yug tau ib tug metub. Tom qab ntau xyoo nyob hauv kev tu siab thiab txaj muag vim xeeb tsis taus tub, txog lub sijhawm tus Tswv teem tseg, “tus Tswv foom koob hmoov rau nws”. Yog li ntawd thaum cov neeg zej zog hnov txog zaj no, lawv thiaj tuaj koom kev zoo siab nrog Xakhaliyas tsev neeg. Tseeb tiag, yeej tsis muaj kev zoo siab twg loj dua li thaum nkawd laus lawm los tseem yug tau ib tug metub. Thaum tau yim hnub lawm, lawv tuaj muab tus metub ua kevcai txiav tawv, thiab raws li kevcai, lawv xav muab tus metub lub npe tis hu ua Xakhaliyas raws li leej txiv lub npe. Tiamsis Elixanpes teb hais tias, “Tsis yog li ntawd! Yuav tsum tis nws lub npe hu ua Yauhas” raws li tus timtswv tau qhia ua ntej lawm. Xakhaliyas uas hais tsis tau lus, kuj sau rau hauv ib daim ntawv hais tias, “Tus metub no lub npe hu ua Yauhas.” Ces tam sim ntawd, Xakhaliyas txawm rov hais tau lus, thiab thawj lo lus nws qhib ncauj yog lus qhuas ua Vajtswv tsaug. Muaj ob yam peb kawm tau hauv zaj xwm hais txog Yauhas Npatitus yug.
Qhov xubthawj, raws li cov Yudais tej kevcai, ib tug neeg lub npe feem ntau muaj ib lub ntsiab tshwjxeeb rau tus ntawd lub neej. Lub npe Yauhas hauv lus Henplais txhais hais tias “Vajtswv qhia tshwm Nws txojkev hlub.” Nyob hauv Vajtswv txojkev cawmdim uas puv npo txojkev hlub, Yauhas yuav yog tus uas kho kev rau Tus Mexiyas. Lub npe Xakhaliyas txhais hais tias “Vajtswv nco txog”, qhia txog Vajtswv txojkev ncaj ncees rau Nws tej lus cog tseg. Lub npe Elixanpes txhais hais tias “Vajtswv tau cog lus”, qhia tau hais tias Vajtswv yog Tus uas txaus ntseeg siab tshajplaws. Xakhaliyas tsev neeg tej npe qhia tshwm Vajtswv txojkev cawmdim uas puv npo txojkev hlub thiab txojkev ncaj ncees uas tsis pauv hloov. Ua Vajtswv tsaug uas Nws tau npaj ib tug neeg los kho kev rau Tus Cawmseej uas yug los cawm tibneeg.
Qhov ob, txawm Vajtswv siv ntau tus neeg hauv zaj uas Tswv Yexus los yug, los tsis muaj ib tug twg tau txais kev qhuas; txhua yam puavleej tig lub siab los rau Vajtswv, qhuas thiab txhawb nqa Nws tibleeg xwb. Txij li Malis, Elixanpes, Xakhaliyas, thiab txhua tus uas pom zaj xwm Tswv Yexus los yug uas sau tseg hauv plaub phau Txojmoo Zoo, xws li cov timtswv saum ntuj, cov yug yaj, thiab cov txawj saib hnub qub,… txhua tus puavleej tsa suab qhuas Vajtswv thiab tus Metub.
Peb tabtom rhais ruam mus rau lub caij Koob Tsheej nco txog Tswv Yexus los yug. Tej zaum peb yuav yog cov uas pab qee yam haujlwm xws li tu, kho Tuamtsev kom zoo nkauj, npaj zaub mov, ua haujlwm pab lub rooj Koob Tsheej lossis koom nrog pab pawg hu nkauj qhuas Vajtswv. Thov Vajtswv pab kom peb tig siab los rau Nws, qhuas txog Nws txojkev hlub, Nws txoj koob hmoov thiab Nws txojkev ncaj ncees, tsis txhob muaj leejtwg qhuas nws tus kheej vim tej uas uas nws tau ua pab lub rooj. Cia li ua Tswv Yexus tsaug kawg siab kawg ntsws uas Nws tau los yug ua tibneeg, thiab tuag vim tibneeg tej kev txhaum kom peb thiaj tau cawmdim.
Thov Vajtswv,
Tus Tswv, thaum rov tshawb txog zaj xwm Yauhas Npatitus yug, ua rau nyuam yaus rov nco txog Koj txoj koob hmoov, txojkev hlub, thiab txojkev ncaj ncees uas loj kawg nkaus. Thov kom nyuam yaus paub tsa suab qhuas Koj, tsis yog tsuas qhuas hauv lub caij Koob Tsheej xwb, tiamsis qhuas tagnrho nyuam yaus lub neej. Nyuam yaus tuav Yexus Khetos lub npe thov. Amees.
Peb ua Koob Tsheej nco txog Tswv Yexus los yug ntawm nplooj siab zoo li cas?
Vajluskub hauv peb lub xyoos: Tes Haujlwm 11
Kênh Youtube BHKTHN:
