I Kauleethaus 1:17-31
Nqe cim:
“Cov neeg uas yuav raug kev puastsuaj xav hais tias, qhov uas Yexus Khetos tuag saum tus ntoo khaublig tsis tseemceeb dabtsi rau lawv li; tiamsis peb cov uas twb tau txais txojkev cawm dim lawm, peb paub hais tias qhov ntawd yog Vajtswv lub hwjchim ntag.” (I Kauleethaus 1:18)
Lus nug sawvdaws xav:
– Vim li cas cov ntseeg hauv Kauleethaus ho nyiam nrhiav kev txawj ntse, lus hais zoo thiab kev txawj sib cav?
– Timthawj Paulus siv qhov sib txawv twg los qhia txog qhov tseem ceeb ntawm txojkev cawmdim?
– Peb xaiv raws li Vajtswv txojkev txawj ntse los yog raws li ntiajteb txoj kev txawj ntse?
Kauleethaus yog ib lub nroog nplua nuj nyob ntawm ntug hiav txwv hauv lub xeev Akhayas, raug cuam tshuam kev coj noj coj ua Kilis yog li kev txawj sib cav thiab kev paub yog yam uas luag saib muaj nqis heev. Cov neeg txawj ntse nyiam siv tej txoj cai sib cav zoo li tej txujci los ntxias cov uas mloog. Qhov ntawd ua rau cov mloog saib lub ntsiab ntawm tej lus tsis tseemceeb cuag tej lus txawj lus ntse uas rub tau neeg siab. Yug los hauv kev ua neej zoo li ntawd, cov ntseeg hauv Kauleethaus thiaj tseem nqa txoj kev xav qub ntawd los rau hauv txoj kev ntseeg. Lawv nyiam nrhiav kev txawj ntse thiab kev sib cav ntawm ntiajteb heev dua li nrhiav Yexus Khetos tus ntoo khaublig (nqe 17-21). Qhov no yog keeb tiv ua rau Pawg Ntseeg sib faib.
Thaum pom teeb meem no, Timthawj Paulus thiaj qhia txog qhov sib txawv ntawm zaj uas hais txog tus ntoo khaublig thiab tej lus uas tibneeg qhuas hais tias yog “kev txawj ntse.” Nws tseem hais txog qhov sib txawv ntawm tej uas “cov neeg uas yuav raug kev puastsuaj” thiab “cov uas twb tau txais txojkev cawm dim lawm” nrhiav. Qhov uas qhia txog tus ntoo khaublig yog qhov tseemceeb ntawm kev ntseeg Yexus, raug “cov neeg uas yuav raug kev puastsuaj” saib zoo li “tsis tseemceeb dabtsi rau lawv li”. Lawv paub Vajtswv raws li “neeg lub tswvyim”, xws li cov neeg Yudais xav pom tej txujci tseemceeb lawv thiaj ntseeg, thiab cov neeg Kilis tsuas cia siab rau tej kev txawj ntse xwb (nqe 22). Tiamsis, tus ntoo khaublig thiaj yog “Vajtswv lub hwjchim” uas cawm tau peb dim (nqe 18, 24).
Ua neej nyob hauv lub ntiajteb uas saib hlob kev kawm, kev txawj ntse kuj ua rau coob leej xav txog kev ua sab nraud heev dua li lub ntsiab sab hauv, qhov ntawd ua rau muaj kev khav theeb thiab sib cais. Ntau zaus peb nyiam mloog cov neeg hais lus uas muaj ncauj lus “tshoov tau neeg siab” ntau dua li ua tib zoo saib lawv zaj lus qhia puas yog Txojmoo Zoo tseeb los yog cuav. Timthawj Paulus qhia hais tias tib neeg txojkev txawj ntse txawv Vajtswv txojkev txawj ntse. Vajtswv txoj kev txawj ntse raug neeg ntiajteb saib hais tias “ruam kawg nkaus” tiamsis tau Vajtswv siv los ua kom “cov neeg txawj ntse txajmuag”, vim kev txawj ntse ntawm tibneeg cawm tsis tau leej twg, tsuas yog kev ntseeg hauv Tswv Yexus xwb thiaj cawm tau, thiab li ntawd, thiaj tsis muaj leej twg khav tau nws tej haujlwm. Thov Vajtswv pab peb txiav txim siab ua raws li Vajtswv txojkev txawj ntse, lees yuav Tswv Yexus tus ntoo khaublig yog lub hauvpaus ntawm txojkev ntseeg thiab kev cawmdim kom nrog tus Tswv mus tas peb lub neej.
Thov Vajtswv,
Tus Tswv, thov pab nyuam yaus tsis txhob mus raws li ntiajteb txoj kev txawj ntse tiamsis txiav txim siab raws li Koj txoj kev txawj ntse txawm raug ntiajteb saib tias yog kev vwm, tiamsis nyuam yaus yuav tau txais Koj txoj sia. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Yuav ua li cas peb thiaj nco ntsoov coj peb tus kheej mus raws li Vajtswv txoj kev txawj ntse?
Nyeem Vajluskub hauv peb lub xyoo: Yelemis 49
Kênh Youtube BHKTHN:
