Klei Aê Diê Blŭ: Philip 1:3-8
Êlan kliăng: “Kâo bi mni kơ Aê Diê kâo grăp blư̆ kâo hdơr kơ diih,” (Philip 1:3)
Klei êmuh ksiêm mĭn: Ya klei Khua ƀĭng kna Y-Pôl ngă grăp blư̆ ñu hdơr kơ Phung Sang Aê Diê ti ƀuôn Philip? Ya klei ñu hdơr knga leh anăn bi mni Khua Yang kơ diñu? Ya jing mta phŭn klei drei khăng wah lač brei?
Trăn Klei Aê Diê Blŭ anei kñăm kơ klei mơak, klei thâo hdơr knga, leh anăn ai tiê klei mĭn wah lač bi mni kơ Khua Yang mơ̆ng Khua ƀĭng kna Y-Pôl grăp blư̆ ñu hdơr kơ phung đăo Phung Sang Aê Diê Philip. Ñu hdơr knga leh anăn bi mni kơ Khua Yang kơ klei phung đăo ti ƀuôn Philip ngă bruă mbĭt hŏng ñu hlăm klei hiu hưn Klei Mrâo Mrang Jăk. Digơ̆ kah mbha, tŭ mbĭt hŏng ñu klei jăk mơak wăt klei lông dlăng hlăm bruă bŏ hŏng klei dleh dlan anei (êlan 3-6). Khua ƀĭng kna Y-Pôl bi êdah ai tiê leh anăn klei ñu khăp êlam hŏng phung Philip. Ñu hdơr jih klei găn leh, klei mơak wăt klei ênguôt hlăm bruă hiu hưn Anăn Khua Yang hlăk tal êlâo ñu truh ti ƀuôn Philip (Bruă Phung Khua Ƀĭng Kna 16:6-40). Wăt tơdah ară anei ñu dôk hlăm war mnă, ƀiădah ai tiê ñu ăt phă digơ̆ hŏng klei hơ̆k mơak leh anăn hdơr knga. Klei ñu khăp kơ phung đăo ti ƀuôn Philip jing klei khăp êdu êun bi êdah klei khăp Khua Yang Yêsu Krist. Khua ƀĭng kna Y-Pôl hơ̆k mơak nanao tơdah ñu bi êdah klei khăp ñu hŏng phung anak ƀuôn sang Aê Diê, msĕ si ñu tuôm lač leh hŏng phung đăo ti ƀuôn Têsalônik snei, ñu răng kriê digơ̆ êdu êun msĕ si sa čô amĭ bi mam anak gơ̆ leh anăn kăp kah mbha wăt klei hdĭp pô kơ digơ̆ (I Têsalônik 2:7-8).
Ai tiê klei mĭn bi mni kơ Khua Yang êjai wah lač brei, bi mdrŏng klei hdĭp wah lač Khua ƀĭng kna Y-Pôl. Ai tiê hdơr knga leh anăn bi mni kơ Khua Yang bi êdah klă mngač hlăm klei ñu wah lač hlăm hră ñu čih mơĭt kơ jih jang Phung Sang Aê Diê. Ñu ƀuh klei pap Khua Yang hlăm djăp anôk, hlăm grăp klei hdĭp mâo klei bi mlih, hlăm grăp klei digơ̆ ngă jăk, leh anăn wăt hlăm grăp klei lông dlăng. Găn hlăm jih jang klei truh, Khua ƀĭng kna Y-Pôl amâo tuôm kƀah ôh klei hdơr knga kơ Khua Yang, wăt êjai dôk hlăm war mnă msĕ si ară anei hin (êlan 7, 13-14), ñu amâo ktrŏ ai tiê kơ ñu pô ôh ƀiădah hdơr nanao kơ phung ayŏng adei čiăng hơ̆k mơak bi mni kơ Khua Yang. Lu phung đăo kơ Krist ară anei knŏng bi mni kơ Khua Yang tơdah klei hdĭp mâo klei êđăp ênang leh anăn jăk mơak. Ƀiădah bi hŏng Khua ƀĭng kna Y-Pôl, ñu bi mni kơ Khua Yang hlăm jih jang klei truh, msĕ si klei ñu bi mđĭ ai leh phung anak ƀuôn sang Aê Diê: “Đăm ênguôt hnĭng kơ sa mta klei ôh, ƀiădah hlăm djăp mta klei hŏng klei wah lač, klei kwưh, leh anăn klei bi mni, akâo bĕ kơ Aê Diê klei diih čiăng.” (Philip 4:6).
Hruê anei, hlăm phung anak ƀuôn sang Aê Diê khăng kƀah ai tiê klei mĭn bi mni kơ Khua Yang êjai wah lač, wah lač brei. Drei khăng nao kơ Khua Yang čiăng kwưh akâo Khua Yang mgaih mkra brei klei dleh dlan kơ drei, ƀiădah wơr bĭt bi mni kơ Khua Yang kơ jih bruă Khua Yang ngă leh hŏng ayŏng adei pô. Akâo Khua Yang brei drei mđing uêñ, thâo bi khăp hdơ̆ng pô hŏng jih ai tiê, ƀuh klei Khua Yang brei kơ ayŏng adei, čiăng mâo lu klei hơ̆k mơak bi mni kơ Khua Yang êjai wah lač, wah lač brei.
Si ngă drei myơr klei bi mni kơ Khua Yang êjai wah lač mơ̆?
Wah lač: Ơ Khua Yang, akâo Khua Yang pap brei kơ kâo kyuadah kâo kƀah klei bi mni êjai wah lač. Akâo Khua Yang bi hriăm kâo thâo bi mni kơ Khua Yang hlăm jih jang klei găn truh, bi mni kơ Khua Yang kơ kâo pô leh anăn wăt kơ phung ayŏng adei kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
