I Xwmtxheej Vajntxwv 16:7-15, 23-29
Nqe cim:
“Ua tus TSWV tsaug! Hu nws los pab nej los mas! Qhia tej uas nws tau ua tas los rau txhua haivneeg; qhia nws lub hwjchim uas loj kawg nkaus rau lawv paub!” (Yaxayas 12:4)
Lus nug rau sawvdaws xav:
– Daviv tau ua dabtsi thaum coj lub Phijxab los rau hauv nroog Yeluxalees?
– Hauv zaj nkauj no, nws nqua hu cov pejxeem ua tus Tswv tsaug rau yam dabtsi?
– Thaum thov Vajtswv, peb pheej ua Nws tsaug rau yam dabtsi?
Daviv yog ib tug neeg yug yaj tau Vajtswv xaiv los ua vajntxwv rau cov Yixalayees. Lub sijhawm uas coj lub Phijxab los rau hauv nroog, nws zoo siab heev sau ib zaj nkauj qhuas Vajtswv zoo kawg nkaus thiab muaj nqis heev rau pab hu nkauj hu qhuas ua Vajtswv tsaug. Qhov ntawd, tsis yog nws ua Vajtswv tsaug xwb tiamsis nws tseem qhia kom cov pejxeem paub tus lw nco tus Tswv txiajntsig, thiab nqua hu kom sawvdaws cia li ua raws li ntawd.
Xub thawj, nws nqua hu kom cov pejxeem cia li xav, nco txog, cim ntsoov “tej haujlwm uas xav tsis thoob”, tej txujci tseemceeb uas tus Tswv tau ua, txhua zaus uas tus Tswv tau cawm thiab qhuab ntuas lawv (nqe 8-9, 13-15). Rov qab tshawb nco tej uas dhau los pab peb zeem pom tej txujci tseemceeb thiab tej koob hmoov uas Vajtswv tau pub rau peb lawd. Tus sau zeem paub tej no thaum uas nws hais tias: “Tus TSWV, kuv yuav nco ntsoov Koj tej haujlwm uas tseemceeb; Kuv yuav rov nco ntsoov tej txujci tseemceeb uas Koj tau ua yav tas los lawm. Kuv yuav xav txog txhua yam uas Koj tau ua tas los; kuv yuav xavntsoov txog Koj tej haujlwm uas tseemceeb” (Phau Ntawv Nkauj 77:11-12). Tim ob, lub siab uas paub nco tus Tswv txiaj ntsig, vajntxwv Daviv ntuas yuav tsum ua tus Tswv tsaug los ntawm qhov uas pehawm thiab hu nkauj qhuas Nws (nqe 9, 23). “Kuv lub siab, ciali qhuas tus TSWV, ncontsoov Nws txiajntsig.” (Phau Ntawv Nkauj 103:2). Tim peb, Daviv kom cov pejxeem yuav tsum qhia rau lwm tus txog “tej haujlwm tseemceeb” uas tus Tswv ua kom ua timkhawv rau lawv hais tias “tus TSWV yog tus loj tshaj plaws, tsimnyog txhawb nqa Nws rau qhov siab vim Nws yog tus txaus ntshai tshaj tej timtswv huv tibsi. Txhua haivneeg tej vajtswv puavleej yog mlom xwb; tiamsis tus TSWV yog tus uas tsim lub ntuj” (nqe 25-26). Ua timkhawv txog tus Tswv tej koobhmoov yog yam uas zoo tshaj ntawm kev nco tus Tswv txiajntsig. Qhov kawg, Daviv nqua hu sawvdaws ua Vajtswv tsaug los ntawm “…nqa tej khoom fij thiab tuaj cuag nws hauv Nws lub Tuamtsev hnav tej tsoos tsho dawbhuv mus pehawm tus TSWV xwb” (nqe 29), txhais tau hais tias muab yus lub neej ua khoom fij ciaj sia thiab dawbhuv los ua Vajtswv tsaug(Loos 12:1).
Hnub thaud, tus Cevlus Yaxayas nqua hu sawvdaws , “Ciali ua tus TSWV tsaug! Ciali hu Nws los pab nej! Qhia tej uas Nws tau ua tas los rau txhua haivneeg paub! Qhia rau lawv tias Nws muaj hwjchim npaum licas!” (Yaxayas 12:4). Hauv kev thov Vajtswv yuav tsum muaj lo lus ua tsaug. Peb cia li tas siab tig saib kom pom tej koobhmoov uas Vajtswv twb pub rau yus tus kheej, tsevneeg thiab Pawg Ntseeg, kom txaus siab hlo fij sijhawm, dag zog, thiab tagnrho yus lub neej zoo li ib qhov khoomfij ua Vajtswv tsaug. Cia li ua Vajtswv tsaug rau ntau yam vim ntawd tsis yog lolus samhwm xwb tseem yog Vajtswv lub siab nyiam hauv Tswv Yexus Khetos thiab (1 Thexalaunikes 5:18).
Thov Vajtswv,
Hawm Leej Txiv tus uas hlub tshua! Thaum nco txog Koj tej koobhmoov, nyuam yaus ua Koj tsaug, Vajtswv tus muaj siab zoo, tsis chim sai thiab muaj hwjchim. Nyuam yaus thov muab hlo lub qhov ncauj, kev txawj ntse, dag zog thiab tag nrho lubneej ua ib qhov khoom ua tsaug fij rau Koj! Nyuam yaus tuav Tswv Yexus Khetos lub npe thov, Amees.
Ib tsoom mloog uas hmov tshua,
Peb puas tig mus saib tej uas Vajtswv twb pub rau peb lawd thiab ua Nws tsaug?
Nyeem Vajluskub hauv peb lub xyoo: Yelemis 27
Kênh Youtube BHKTHN:
