II Xwmtxheej 33:14-20
Nqe cim:
“Nej tsis txhob ua nej lub neej zoo li tej neeg ntiajteb ua, tiamsis nej yuav tsum cia Vajtswv hloov nej lub siab kom nej muaj lub siab tshiab…” (Loos 12:2a)
Lus nug rau sawvdaws xav:
– Tom qab uas hloov siab lees txim rov los cuag tus Tswv lawm, Vajntxwv Manaxes tau ua dabtsi?
– Vim li cas cov pejxeem tseem pheej tua tsiaj hlawv fij rau tus Tswv ntawm tej qhov chaw siab?
– Peb muaj kev hloov pauv li cas hauv lub neej tshiab nrog Yexus Khetos?
Tom qab Vajntxwv Manaxes lees txim, thov tus Tswv thiab tau tus Tswv zam txim lawm, ces nws lub neej kuj tau hloov dua tshiab, qhia tshwm dhau ntawm tej haujlwm sab nraud. Vajntxwv pib ua tej yam zoo thiab ua txawv tej kev phem uas nws tau ua yav tas los.
Yav tas los, Vajntxwv Manaxes tsuas saib hlob kev pe mlom xwb, nws tsis quav ntsej txog kev tiv thaiv tebchaws. Tiamsis nimno vajntxwv txhim tus ntsayeej uas thaiv sab nraum Daviv lub nroog, thiab tso ib co thawj tubrog coj tej pab tubrog mus nyob hauv txhua lub nroog uas muaj ntsayeej thaiv hauv lub tebchaws Yudas. Nyob hauv phau Xwmtxheej Vajntxwv, tej vajntxwv uas ua zoo mas Vajtswv yeej pub koob hmoov rau lawv ua tiav tej haujlwm txhim kho tej nroog, thiab muaj tub rog muaj zog. Kev txhim kho ntsayeej thiab tsa cov thawj tubrog yog tej lub cim qhia tau hais tias Vajntxwv Manaxes tau Vajtswv koob hmoov tomqab uas nws lees txim thiab tig rov los cuag Vajtswv.
Nyob hauv lub neej pehawm, Vajntxwv Manaxes muaj kev hloov pauv pom tseeb. Yav tas los, nws yog tus uas txhim tej thaj rau lwm haivneeg tej mlom thiab coj tej mlom los rau hauv tus Tswv lub Tuamtsev, tiamsis nimno nws muab lwm haivneeg tej vajtswv, tej mlom uas muab tso rau hauv lub Tuamtsev, tej thaj teev dab uas luag ua rau saum lub pov roob ntawm lub Tuamtsev, thiab hauv lub nroog Yeluxalees tshem coj mus povtseg rau sab nraum ntug nroog huv tibsi (nqe 15). Vajntxwv rov kho lub thaj ntawm qhov chaw pehawm tus TSWV, tua tsiaj hlawv fij ua kev sib raug zoo thiab ua Vajtswv tsaug rau saum lub thaj ntawd. Yav tas los, nws yuam cov Yudas thiab cov neeg uas nyob hauv nroog Yeluxalees mus pe tej mlom, tiamsis nimno Nws samhwm rau cov Yudas txhua tus kom pehawm tus TSWV uas yog cov Yixalayees tus Vajtswv nkaus xwb (nqe 16). Txawm li ntawd los, cov pejxeem kuj tseem khaws lawv cov cwjpwm qub, tseem mus tua tsiaj fij rau tus Tswv ntawm tej qhov chaw siab (nqe 17). Qhov ntawd yeej tsis yog kev pehawm raws li txojcai thiab tsis yog chaw. Vajtswv twb samhwm kom Nws haiv neeg tsuas tua tsiaj fij rau tej qhov chaw uas Nws xaiv xwb (Kevcai 12:13-14), lub homphiaj yog kom lawv tsis txhob raug lwm haivneeg tej kev ntseeg cuam tshuam. Qhov no qhia tau hais tias tej kev phem uas Vajntxwv Manaxes tau ua yav tas los tseem cuam tshuam ntev rau cov pejxeem, txawm yog nws twb tig rov los pehawm Vajtswv lawm.
Dhau ntawm Vajntxwv Manaxes lub neej hloov tshiab, peb pom ib tug neeg uas hloov siab lees txim rov los cuag tus Tswv, cia tus Tswv kav nws lub neej, ces tus ntawd yuav tsum muaj kev hloov pauv uas pom tseeb, qhia tawm los ntawm tej haujlwm sab nraud. Yog ib tug neeg uas twb txais Tswv Yexus los ua tus Tswv kav lub neej lawm, peb kuj yuav tsum muaj kev hloov pauv pom tseeb raws li Vajtswv Txojlus qhia tias: “Nej tsis txhob ua nej lub neej zoo li tej neeg ntiajteb ua, tiamsis nej yuav tsum cia Vajtswv hloov nej lub siab kom nej muaj lub siab tshiab…” (Loos 12:2). Peb yuav tsum ncaj ncees hauv kev pehawm tus Tswv, saib xyuas Pawg Ntseeg thiab pub rau Vajtswv haiv neeg muaj txaus sab nqaij tawv thiab sab ntsujplig huv tibsi. Tshwjxeeb yog yuav tsum txav deb kev txhaum, vim tej haujlwm tsis zoo uas peb ua yuav muaj kev cuam tshuam phem thiab ntev rau coob leej tomqab.
Thov Vajtswv,
Tus Tswv, thov pab nyuam yaus muaj kev hloov tseeb hauv lubneej thiab ua tshwm dhau ntawm tej haujlwm sab nraud, kom nyuam yaus lubneej ua rau Koj tau koobmeej. Nyuam yaus tuav Yexus Khetos lub npe thov, Amees.
Peb pom tus kheej lubneej zoo li qub lossis muaj kev hloov tshiab thaum los ntseeg Tswv Yexus?
Nyeem Vajluskub hauv peb lub xyoos: Yelemis 15
Kênh Youtube BHKTHN:
