Loos 16:25-27
Nqe cim:
“Peb cia li ua rau Vajtswv tau koob meej! Vajtswv yog tus uas pab tau kom nej muab siab rau ntseeg, txhua zaus uas kuv qhia txojmoo zoo kuv yeej qhia hais tias Vajtswv pab tau nej. Txojmoo zoo ntawd hais txog Yexus Khetos zaj uas ntau tiam yav tas los tsis muaj neeg paub.” (Loos 16:25)
Lus nug rau sawvdaws xav:
– Lo lus qhuas kawg ntawm tsab ntawv Loos no qhia tias Txojmoo Zoo uas Timthawj Paulus tshajtawm yog dabtsi?
– Txojmoo Zoo no muaj hwjchim thiab muaj lub zog li cas?
– Peb yuav qhia Txojmoo Zoo no rau cov neeg nyob ib ncig peb li cas?
Timthawj Paulus xaus tsab ntawv Loos no los ntawm lo lus qhuas Vajtswv rau qhov Vajtswv muaj hwjchim pab kom cov neeg txais Txojmoo Zoo uas nws tshaj tawm hais txog Yexus Khetos zaj muab siab rau ntseeg (nqe 25). Txojmoo Zoo uas Timthawj Paulus tshaj tawm no tsis yog los ntawm neeg los, tiamsis yog los ntawm Vajtswv los, raws li nws twb sau nyob rau feem pib tsab ntawv hais tias: “Kuv yog Paulus uas yog Yexus Khetos tus tubtxib; Vajtswv xaiv kuv ua ib tug timthawj thiab tsa kuv ua tus qhia nws Txojmoo Zoo” (Loos 1:1).
Tej uas muab npog cia tob tob thaum ub los ntawm no yog Vajtswv txojkev cawm tibneeg uas tau ua tiav dhau ntawm Tswv Yexus Khetos. Qhov no kuj yog lub ntsiab ntawm tsab ntawv Loos. Zaj no yeej raug zais cia ntau tiam dhau los lawm, thiab raws li Vajtswv tus uas muaj sia zees nyob samhwm, thiaj li maj mam qhib tawm los dhau ntawm tej lus cev tseg hauv Vajluskub Qub, thiab tau qhib tawm kiag dhau ntawm Tswv Yexus, uas yog Vajtswv Lub Chaw Xyeem Thib Ob. Txojmoo Zoo cawm dim puv npo koob hmoov no tau Vajtswv pub dawb vim Nws txojkev hlub uas loj kawg nkaus thiab vim Tswv Yexus txojkev theejtxhoj saum tus ntoo khaublig. Raws li Vajtswv lub siab nyiam, Txojmoo Zoo no yuav tsum raug tshaj tawm rau txhua haiv neeg kom coj tau sawvdaws los mloog lus hauv kev ntseeg. Nroog Loos yog lub chaw lag luam thiab chaw tswjfwm tseemceeb, muaj kev tsheb kev loj mus thoob plaws txhua qhov chaw hauv lub ntiajteb nyob tiam ntawd, pab txhawb rau txoj haujlwm tshajtawm Vajtswv Txojmoo Zoo mus thoob qab ntuj khwb.
Tswv Yexus Txojmoo Zoo coj ib lub neej tshiab kiag los rau txhua tus uas txais Nws txoj koob hmoov cawm dim los ntawm kev ntseeg (II Kauleethaus 5:17); lub meejmom tau hloov txij ntawm tus neeg txhaum uas raug Vajtswv txiav txim los ua Vajtswv tus menyuam uas Nws hlub, tau dim ntawm kev txhaum txoj saw khi thiab kev txiav txim. Tswv Yexus Txojmoo Zoo hloov cov uas ntseeg Nws txojkev xav txog lub neej, kev npaj tej yam xub ua, thiab hloov lawv lub homphiaj ua neej. Cov uas ntseeg tseeb yuav tau kev thaj yeeb txaus nkaus hauv lubneej tiam no thiab tau tabpov yuav tau lubneej ruaj khov tomntej hauv Vajtswv lub Tebchaws. Peb cia li tshaj tawm Tswv Yexus Txojmoo Zoo dhau ntawm peb lub neej uas tau hloov dua tshiab, muaj kev sib hlub, thiab los ntawm peb zaj lus timkhawv txog Tswv Yexus txoj haujlwm theejtxhoj. Peb cia li koom siab qhuas Vajtswv Vaj Peb Leeg txij no mus txog ibtxhis.
Thov Vajtswv,
Tus Tswv, nyuam yaus qhuas Koj vim Koj tau qhib zaj txujci uas tau zais cia lawm rau txhua haivneeg pom tseeb dhau ntawm Tswv Yexus Khetos! Ua tsaug rau Koj txoj koob hmoov cawm dim thiab txoj sia ib txhis uas Koj tau pub rau nyuam yaus. Thov Koj pab kom nyuam yaus txoj kev ntseeg ruaj khov, thiab thov Vaj Ntsujplig ua kom nyuam yaus muaj zog thiab kub siab lug hauv kev tshaj tawm Txojmoo Zoo rau cov uas tseem tsis tau paub Koj nyob ib ncig nyuam yaus. Nyuam yaus tuav Yexus Khetos lub npe thov, Amees.
Peb ua lub neej li cas thiaj qhia tau tias peb niaj hnub qhuas Vajtswv?
Nyeem Vajluskub hauv peb lub xyoos II Xwmtxheej 29
Kênh Youtube BHKTHN:
