Pajlug 24:19-20
Nqe cim:
“Tsis txhob nyuaj siab rau tej neeg ua phem, tsis txhob khib tej uas lawv ua. Tus neeg ua phem yeej tsis muaj kev cia siab rau yav tom ntej, thiab lawv lub neej tsaus ntuj nti” (Pajlug 24:19-20).
Lus nug rau sawvdaws xav:
– Vim li cas tsis pub chim rau tus neeg ua phem?
– Nqi zog rau tus neeg ua phem yuav zoo li cas?
– Peb yuav tsum tswj yus kev chim li cas?
Hauv Pajlug 23:17, Vajntxwv Xalumoos qhia nws cov menyuam: “Tsis txhob khib rau tej neeg txhaum”, thiab hais meej ntxiv hais tias, “Tsis txhob nyuaj siab rau tej neeg ua phem”. Mloog dhau tej lus qhia no, txhua tus uas nyiam qhov tseeb yeej tsis txaus siab rau tej lus qhia no, vim cuag li tus qhia saib tes haujlwm ua phem yeej haum kev haum cai lossis nws tabtom txhawb tes haujlwm ua txhaum. Thiab ua li ntawd ces yog tawmtsam Vajtswv txoj kev ncaj ncees lawm! Yog vim li cas vajntxwv Xalumoos hais mus hais los kom tsis txhob chim rau tus neeg ua phem? Vim kev chim yog txoj kev xav yam tsis zoo, tsis muaj qabhau thiab tsis pab tau dab tsi, qee zaug tseem rhuav yus thiab. Lo lus “tsis txhob nyuaj siab” lus Henplais lub ntsiab yog tsis txhob hlawv kub, txhob ntsawv siab, txhob khib lossis npautaws. Hais rau lwm seem, tsis txhob cia txoj kev xav, kev chim ua rau yus mob siab, ua rau kev npautaws ntau ntxiv. Lub siab khib fuam loj tej zaum yuav ua rau peb muaj tus cwjpwm tsis zoo, tsuas xav txog kev phem thiab xav ua kom txaus yus lub siab.
Txuas ntxiv, Vajntxwv Xalumoos tsis pub chim rau tus neeg ua phem, vim lawv yuav tau txais tej nqi zog hnyav los ntawm lawv tes haujlwm. “Tus neeg phem yeej tsis muaj kev ciasiab rau yav tomntej, lawv lub teeb yuav raug muab tshuab kom tuag mus” (nqe 20 MWW 2022). Tus neeg ua phem tsis yog raug rau txim kom puastsuaj hauv ntiajteb no xwb, tiamsis tseem raug txiav txim pov mus hauv qhov chaw nyob mus ibtxhis thiab. Thaum paub tus neeg phem tsis muaj kev ciasiab rau yav tomntej, lawv lub teeb yuav raug muab tshuab kom tuag mus, lawv tus ntsujplig yuav nyob hauv qhov tsaus ntuj nti, lawv txoj kev vammeej tsuas yog ib vuag dua xwb, ces tsis tsimnyog peb nkim sijhawm nyuaj siab rau cov ntawd ua dabtsi! Tej zaum thaum peb chim rau cov neeg phem yuav ua rau peb muaj tus cwjpwm zoo li tus neeg phem thiab.
Hauv tsab ntawv sau xa rau pawg ntseeg Efexus, timthawj Paulus qhia hais tias: “Yog thaum twg nej chim, nej tsis txhob pub qhov uas nej chim ntawd ua rau nej ua txhaum thiab tsis txhob chim tas hnub” (Efexus 4:26). Thov Vajtswv pab peb paub tswj kev chim, vim kev chim, yuav yoojyim ua yuam kev thiab poob rau kev txhaum. Peb kuj tsis txhob cia txoj kev chim nraim nkoos hauv siab fuam loj, tiamsis yuavtsum thov Vajtswv pab kom txoj kev chim tuag mus thiab tswj lub neej raws li Vajtswv Txojlus qhia: “Cia siab rau tus TSWV thiab ua zoo” (Ntawv Nkauj 37:3). Thiab kuj tsis txhob khib thaum uas pom tus neeg ua phem npluanuj, muaj meejmom siab hauv ntiajteb, tej ntawd yog yam uas yuav puastsuaj sai li tej nroj tsuag, tiamsis yuavtsum xav txog tes haujlwm zoo thiab lub neej uas nyob mus ibtxhis. Cia li tso siab rau Vajtswv txojkev ncaj ncees thiab muab txhua yam fij rau Nws, Nws yuav tuaj peb tog thiab foom koob hmoov rau peb.
Thov Vajtswv,
Vajtswv, nyuam yaus ua Koj tsaug, vim Koj pub rau nyuam yaus paub ua neej txaus siab rau txhua lub sijhawm. Thov pab kom nyuam yaus paub ua neej ncaj ncees, muaj kev hlub, tsis chim sai, thiab pab kom nyuam yaus tso siab rau Koj kev tswj kav nyuam yaus lub neej. Nyuam yaus tuav Tswv Yexus Khetos lub npe thov. Amees.
Peb pheej muaj tus cwjpwm li cas rau cov neeg phem?
Nyeem Vajluskub hauv peb lub xyoos: 1 Xwmtxheej Vajntxwv 29
Kênh Youtube BHKTHN:
