Loos 15:22-33
Nqe cim:
“Cov kwvtij, vim peb cov uas ntseeg peb tus Tswv Yexus Khetos thiab vim Vaj Ntsujplig twb ua rau peb txawj sib hlub lawm, yog li ntawd kuv thov nej kub siab lug thov Vajtswv pab kuv” (Loos 15:30)
Lus nug rau sawvdaws xav:
– Timthawj Paulus qhia txog nws txojkev npaj twg rau cov ntseeg hauv nroog Loos?
– Lub homphiaj uas Paulus qhia nws txojkev npaj tseg yog dabtsi?
– Peb kawm tau dabtsi dhau los ntawm zaj no?
Timthawj Paulus muab qhov uas mus qhia Txojmoo Zoo rau tej chaw uas tsis tau muaj neeg hnov Tswv Yexus txojkev cawmdim saib ua qhov tseemceeb. Paulus qhia Txojmoo Zoo rau cov ntseeg thiab txhim tsa cov thawjcoj sab ntsujplig rau txhua qhov kom lawv sib pab txhawb Pawg Ntseeg kom loj hlob (Loos 15:14-21). Nimno, Paulus qhia txog nws txojkev npaj tseg rau cov ntseeg hauv lub nroog Loos. Thawj qhov, Paulus yuav mus nram lub nroog Yeluxalees, coj tej khoom uas cov ntseeg nyob rau Akhayas thiab Makedaunias mus pab cov ntseeg nrad. Paulus coj cov ntseeg uas yog lwm haivneeg tus qauv zoo txog kev hlub thiab kev pab mus pab cov ntseeg uas yog neeg Yudais. Qhov no qhia rau cov ntseeg hauv lub nroog Loos paub tias lawv yuav tsum muab tej uas lawv muaj coj mus pab cov neeg tabtom raug txomnyem, tsis yog pheej pab hauv Pawg Ntseeg xwb (nqe 25-27). Paulus cheemtsum tej lus thov Vajtswv pab kom cov ntseeg tsis raug cov neeg Yudais tsimtxom thiab tes haujlwm uas nws coj khoom mus pab ua tau zoo. Paulus ntseeg hais tias tej lus uas cov neeg ncaj ncees thov Vajtswv haum Vajtswv siab (Yakaunpaus 5:16). Timthawj Paulus tiv txomnyem ntau yam thaum rov mus nram lub nroog Yeluxalees ua tes haujlwm cov ntseeg txib. Paulus nqa tej khoom pab mus nram nroog Yeluxalees los ntawm lub siab txo hwjchim, tsis yog pub koob hmoov, tiamsis nws xav kom cov ntseeg hauv nroog Yeluxalees zoo siab txais yuav.
Raws li twb npaj tseg, Timthawj Paulus yuav mus saib cov ntseeg hauv lub nroog Loos thiab coglus hais tias yuav coj Yexus Khetos txojkev hlub mus rau lawv (nqe 29,32). Paulus tsis hais txog lub sijhawm nyob ntawm no ntev li cas, nyob ntawm qhov uas lawv cheemtsum nws nyob hauv lub nroog Loos xwb. Tomqab ntawd, Paulus thov kom lawv pab xa nws mus rau tebchaws Xapees ua tes haujlwm qhia tus Tswv zaj. Timthawj Paulus yog ib tug neeg muaj zeem muag deb dav. Nws ua qauv rau kev npaj haujlwm, Paulus ua raws Vaj Ntsujplig coj qhia hauv txhua yam haujlwm yuav ua. Peb txhua tus puavleej tau Vajtswv pub sijhawm 24 teev, ib hnub ib yam nkaus, qhov uas npaj haujlwm tseg ua rau peb paub muab tej haujlwm tseemceeb, tshwjxeeb los ua ua ntej tej haujlwm yau thiab tsis tau cheemtsum txog. Ua raws li Timthawj Paulus tus qauv, peb cheemtsum qhia tej kev uas yus npaj tseg rau lwm tus kom lawv txhawb peb los ntawm kev thov Vajtswv thiab koom tes pab.
Thov Vajtswv,
Tus Tswv, nyuam yaus ua Koj tsaug qhov Koj qhia paub Timthawj Paulus tus qauv ua haujlwm, thiab cov ntseeg nyob Makedaunias thiab Akhayas tus qauv pab cov ntseeg. Thov Koj pab kom nyuam yaus muaj zeem muag dav los pab thiab thov Vajtswv rau cov ntseeg uas tabtom ntsib kev txomnyem, nyob toj siab. Nyuam yaus tuav Tswv Yexus lub npe thov, Amees.
Peb puas ntsia pom deb pom dav kom paub tej chaw nyob deb, txomnyem tej kev cheemtsum thiab cev tes pab?
Nyeem Vajluskub hauv peb lub xyoo: Efexus 5
Kênh Youtube BHKTHN:
