Klei Aê Diê Blŭ: Rôm 15:22-33
Êlan kliăng: “Ơ phung ayŏng adei, hŏng Khua Yang drei Yêsu Krist leh anăn hŏng klei khăp mơ̆ng Yang Mngăt Jăk, kâo kwưh kơ diih đru bi blah mbĭt hŏng kâo hŏng klei diih wah lač kơ Aê Diê kyua kâo” (Rôm 15:30)
Klei êmuh ksiêm mĭn: Ya hdră Khua ƀĭng kna Y‑Pôl čiăng hưn mthâo kơ phung đăo ti ƀuôn Rôm? Ya klei ñu kñăm čiăng tơdah hưn mthâo kơ hdră anei? Ya klei hriăm drei mâo mơ̆ng klei hriăm hruê anei?
Êlâo hĭn Khua ƀĭng kna Y‑Pôl hưn Klei Mrâo Mrang Jăk kơ anôk arăng ka tuôm hưn ôh klei Khua Yang Yêsu Krist bi mtlaih. Ñu mtô Klei Mrâo Mrang Jăk kơ phung đăo leh anăn mkŏ mjing phung gĭt gai klei hdĭp myang phung đăo ti anôk digơ̆ pô čiăng kơ digơ̆ dưi mkŏ mjing leh anăn bi mđĭ kyar Phung Sang Aê Diê (Rôm 15:14-21). Ară anei hin, ñu hưn kơ phung đăo ti ƀuôn Rôm thâo kơ hdră ñu mkra leh. Ƀiădah êlâo hĭn ñu srăng nao kơ ƀuôn Yêrusalem djă ba mnơ̆ng đru mơ̆ng phung đăo phung tue ti čar Akai leh anăn čar Masêdôn đru phung đăo ƀun ƀin jing phung Yuđa dôk ti ƀuôn Yêrusalem. Ñu bi êdah klei phung đăo phung tue bi hmô jăk tơdah hŏng klei khăp leh anăn klei kmah digơ̆ đru leh mnơ̆ng kơ phung ayŏng adei hlăm klei đăo jing phung Yuđa. Klei anei lŏ mñă brei phung đăo ti ƀuôn Rôm ăt mĭn mơh kơ klei đru bi mbha mnơ̆ng diñu mâo kơ phung tuôm hŏng klei dleh dlan, amâo djŏ uêñ mĭn knŏng hjăn kơ Phung Sang Aê Diê pô ôh (êlan 25-27). Ñu akâo kơ digơ̆ đru wah lač čiăng kơ ñu srăng tlaih mơ̆ng kngan phung Yuđa amâo đăo ôh leh anăn bruă bi mbha mnơ̆ng đru mâo klei ênưih. Ñu thâo klei sa čô mnuih kpă wah lač mâo klei myang leh anăn klei dưi (Y‑Yakơ 5:16). Khua ƀĭng kna Y‑Pôl amâo uêñ kơ klei huĭ hyưt ôh tơdah wĭt kơ ƀuôn Yêrusalem čiăng bi leh bruă Aê Diê jao leh. Ñu djă ba mnơ̆ng đru kơ ƀuôn Yêrusalem hŏng klei luă gŭ, amâo djŏ hŏng knuih brei mnơ̆ng pap ôh, leh anăn ñu čiăng phung đăo ti ƀuôn Yêrusalem mă tŭ mnơ̆ng đru anăn hŏng klei hơ̆k mơak.
Tui si hdră mkra leh, Khua ƀĭng kna Y‑Pôl srăng hriê čuă phung đăo ti ƀuôn Rôm leh anăn ƀuăn ñu srăng bi bŏ digơ̆ hŏng klei jăk jĭn mơ̆ng Krist (êlan 29, 32). Ñu amâo brei thâo ôh dŭm boh sui ñu srăng dôk tinei, kyuadah klei anăn tui si klei arăng čiăng kơ ñu dôk ti ƀuôn Rôm. Ruê̆ bruă anăn, ñu akâo digơ̆ atăt ñu hlŏng nao kơ čar Êspañ lŏ ngă bruă hưn Klei Mrâo Mrang Jăk. Khua ƀĭng kna Y‑Pôl jing sa čô mnuih thâo săng êlam leh anăn thâo ƀuh kbưi. Ñu ngă klei bi hmô hlăm klei dăp hdră, anăn jing mâo klei thâo mĭn tui si Yang Mngăt Jăk atăt gai čiăng dưi mkra hdră kơ jih jang bruă srăng ngă. Aê Diê brei kơ grăp čô drei sa hruê mâo 24 mmông msĕ sơaĭ, klei mkra hdră đru drei dưm jih jang bruă yuôm jing êlâo hĭn, jing bruă mâo klei bi hmăi prŏng, amâo tŭ klei bi hmăi mơ̆ng bruă amâo jăk đei yuôm ôh. Tui knuih Khua ƀĭng kna Y‑Pôl, brei drei bi hưn mthâo ya hdră drei mkra leh čiăng kơ jih jang phung djŏ tuôm hŏng hdră anăn mâo klei sa ai đru wah lač brei leh anăn đru mbĭt hlăm hdră anăn.
Si ngă drei tuôm ksiêm êlam čiăng dưi thâo săng leh anăn đru phung ayŏng adei hlăm klei đăo jing ƀun ƀin dôk hlăm anôk taih kbưi mơ̆?
Wah lač: Ơ Khua Yang, kâo lač jăk kơ Ih kyuadah Ih brei leh kơ kâo mâo sa klei bi hmô kơ knuih mă bruă msĕ si Khua ƀĭng kna Y‑Pôl, klei bi hmô kơ klei đru hŏng klei kmah mơ̆ng phung đăo ti čar Akai leh anăn čar Masêdôn. Đru kâo thâo ksiêm êlam čiăng kơ kâo dưi đru leh anăn wah lač brei kơ phung ayŏng adei hlăm klei đăo dôk hlăm klei dleh dlan, boh nik nak hlăm anôk taih kbưi. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Êphêsô 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
