Khiavdim 32:11-13
Nqe cim:
“Tiamsis Mauxes thov tus Tswv uas yog nws tus Vajtswv hais tias, “Tus Tswv, koj twb tau siv koj lub zog thiab lub hwjchim coj lawv tawm nram tebchaws Iziv los, vim li cas koj yuav chim rau koj haivneeg ua luaj?” (Khiavdim 32:11)
Lus nug rau sawvdaws xav:
– Thaum Vajtswv chim Mauxes tau ua dabtsi?
– Mauxes hais txog tus cai dabtsi hauv nws kev thov Vajtswv?
– Peb kawm tau yam dabtsi ntawm Mauxes tus qauv thov Vajtswv?
Mauxes chim rau cov Yixalayees vim lawv tej kev txhaum thiab paub txog tus Tswv txoj kev chim, tiamsis Mauxes tsis tso tseg kev thov Vajtswv txawm paub tias tus Tswv yuav rau txim los nws tseem rov qab thov Vajtswj rau lawv. Thov Vajtswv rau yus tej txheeb ze thiab tej phoojywg thaum lawv tsis ceevfaj tau ua txhaum mas yoojyim, tiamsis yog thov Vajtswv rau ib haivneeg tawv ncauj, ua tej kev txhaum loj tawm tsam Vajtswv mas yog ib qhov uas nyuaj heev. Yuav tsum ceevfaj tsam peb muaj lub siab ntxub lawv, saib tsis taus tus neeg txhaum, thiab cia li tsis thov Vajtswv pab rau lawv lawm.
Txawm yog Vajtswv twb txiav txim siab thiab tsis xav kom Mauxes cheem Nws los (nqe 10), Mauxes tseem pheej taij thov Vajtswv zam txim rau lawv. Tseeb tiag, Mauxes yeej tsis kav tawmtsam Vajtswv nws tsuas yog “taij thov” Vajtswv xwb. Mauxes thov Vajtswv vim nws ntseeg hais tias “… tus Tswv, koj yog tus uas muaj kev hlub thiab yog tus Vajtswv uas muaj kev hlub tshua; koj ibtxwm muaj lub siab ntev, siab zoo thiab ua ncaj ncees” (Phau Ntawv Nkauj 86:15). Xub thawj, Mauxes thov Vajtswv hais tias, cov Yixalayees yog “Koj haivneeg” (nqe 11). Hauv kev chim, Vajtswv muab cov Yixalayees hu ua “koj….cov pejxeem” (nqe 7), tiamsis Mauxes hais rau Vajtswv, cov no tsis yog kuv cov pejxeem, lawv yog Koj haivneeg, haivneeg uas Koj tau xaiv lawm. Ntxiv mus Mauxes hais tias Vajtswv yog tus uas muaj hwjchim loj kawg nkaus tau pab cawm Nws haivneeg thiab kuj yog tus Tswv uas muaj hwjchim ua kom tiav Nws lub hom phiaj. Mauxes kuj hais txog Vajtswv lub koobmeej thiab Nws txoj kev ncajncees (nqe 11-13). Yog li ntawd, peb pom tias Mauxes zaj lus thov Vajtswv tsuas yog hais txog yam uas zoo kawg nkaus ntawm Vajtswv xwb. Vim nws paub tias cov pejxeem yeej tsis muaj ib qhov zoo uas yuav tsimnyog tau txais Vajtswv kev zam txim li. Txhua yam uas Vajtswv pub rau tibneeg yog los ntawm Nws txoj kev zoo, ncajncees, thiab kev hlub. Yam tseemceeb ntawm Mauxes zaj lus thov Vajtswv yog nrhiav Vajtswv lub hwjchim uas ci ntsab iab thiab txoj kev hlub pub rau cov Yixalayees txawm hais tias lawv yeej tsis tsimnyog tau txais .
Mauxes tau ua ib tus qauv zoo rau peb kawm xyaum. Nws yeej tsis tau txais dabtsi thaum thov Vajtswv rau cov Yxalayees, tej thaum Vajtswv txoj kev chim tseem yuav raug Mauxes thiab tseem yuav raug poob qhov koob hmoov uas yuav dhau mus ua ib haiv neeg tseemceeb los muaj (nqe 10), tiamsis vim txoj kev ntseeg ruaj khov rau Vajtswv tus uas ncajncees, muaj lub siab zoo, thiab vim txoj kev hlub cov Yixalayees ua rau Mauxes ruaj siab thov Vajtswv zam txim rau lawv.
Thov Vajtswv,
Vajtswv, thov pab kom nyuam yaus muaj nplooj siab hlub ib yam li Mauxes kom nyuam yaus paub thov Koj pab rau nyuam yaus tej phoojywg uas tabtom yuam kev lawm, thiab cov neeg uas tabtom raug kev puas tsuaj kom lawv tig rov los nrog Koj sib raug zoo. Nyuam yaus tuav Tswv Yexus Khetos lub npe thov. Amees.
Yam dabtsi thaiv peb kev thaum thov Vajtswv pab rau lwm tus ?
Nyeem Vajluskub hauv peb lub xyoos: Yaxayas 2
Kênh Youtube BHKTHN:
