Klei Aê Diê Blŭ: Klei Kbiă 32:11-13
Êlan kliăng: “Ƀiădah Y-Môis kwưh kơ Yêhôwa Aê Diê ñu, lač, “Ơ Yêhôwa, si ngă klei Ih ngêñ trơ̆ng hŏng phung ƀuôn sang Ih, phung Ih bi kbiă leh mơ̆ng čar Êjip hŏng klei myang prŏng leh anăn hŏng kngan ktang Ih?” (Klei Kbiă 32:11)
Klei êmuh ksiêm mĭn: Dôk ti anăp klei Aê Diê ngêñ, ya klei Y-Môis ngă leh? Si klei mĭn ñu bi êdah hlăm klei ñu wah lač brei? Ya klei drei hriăm mơ̆ng rup bi hmô kơ klei Y-Môis wah lač brei?
Y-Môis ênguôt snăk kyua klei soh jhat phung ƀuôn sang Israel ngă, leh anăn ñu thâo kral klei Aê Diê ngêñ trơ̆ng, ƀiădah ñu amâo êdu ai ôh tơdah hmư̆ klei Aê Diê lač srăng ngă jhat kơ phung ƀuôn sang, ƀiădah ñu ruah klei ăt wah lač brei kơ phung ƀuôn sang. Wah lač brei kơ phung drei khăp amâodah kơ mah jiăng tơdah diñu tăm ngă soh năng ai jing ênưih, ƀiădah wah lač brei kơ sa phung ƀuôn sang khăng kŏ, bi kdơ̆ng, ngă klei soh kjham kjhuê̆ hŏng Aê Diê, jing sa mta bruă mdê kluôm dhuôm. Răng bĕ kyua tăp năng drei yap mnuih soh hŏng klei soh jing sa, snăn drei srăng bi êmut, dlăng kơ diñu jing hơăi mang, leh anăn amâo lŏ uêñ mĭn wah lač brei kơ diñu ôh.
Wăt tơdah Aê Diê lač leh klei Ñu srăng ngă leh anăn amâo čiăng kơ Y-Môis mgang ôh (êlan 10), ƀiădah Y-Môis ăt kwưh akâo kơ Aê Diê pap brei kơ phung ƀuôn sang Israel. Sĭt yơh ñu amâo jhŏng bi kdơ̆ng hŏng klei Aê Diê čiăng ngă ôh, ñu knŏng jhŏng “kwưh” kơ Aê Diê đuč yơh. Ñu wah lač brei kyuadah ñu đăo “Ƀiădah Ih, Ơ Khua Yang, jing Aê Diê thâo pap leh anăn mâo ai tiê jăk, amâo djăl ăl ôh, bŏ hŏng klei khăp leh anăn klei sĭt suôr”. (Klei Mmuñ Hđăp 86:15). Êlâo hĭn, ñu lač hŏng Aê Diê snei, phung Israel jing “phung ƀuôn sang Aê Diê” (êlan 11). Hlăm klei ngêñ trơ̆ng, Aê Diê iêô leh kơ phung Israel jing “phung ƀuôn sang ih” (êlan 7), ƀiădah Y-Môis lač hŏng Khua Yang, phung anei amâo djŏ jing phung ƀuôn sang kâo ôh, diñu jing phung ƀuôn sang Aê Diê, phung ƀuôn sang Aê Diê ruah. Êdei kơnăn, ñu lač, Aê Diê jing Pô bŏ hŏng klei myang bi mtlaih leh phung ƀuôn sang Aê Diê leh anăn wăt jing Pô mâo klei dưi bi leh jih kluôm ênŭm hdră bruă Ñu mkra. Ñu ăt lač mơh kơ klei guh kơang Aê Diê leh anăn klei sĭt suôr Ñu (êlan 11-13). Snăn, jih jang klei mĭn hlăm klei Y-Môis wah lač brei, knŏng dưm kluôm dhuôm ti knuih Aê Diê, amâo kna kơ ya mta klei mơ̆ng phung ƀuôn sang ôh. Kyuadah ñu thâo kral sĭt nik phung ƀuôn sang amâo mâo sa mta klei jăk ôh dưi knang, čiăng tui duah klei khăp leh anăn klei pap brei mơ̆ng Aê Diê. Jih jang klei Khua Yang pioh brei kơ anak mnuih, knŏng kbiă hriê kluôm dhuôm mơ̆ng klei jăk, klei sĭt suôr, leh anăn klei pap Ñu pô yơh. Klei yuôm hlăm klei Y-Môis wah lač brei, jing tui duah klei guh kơang Aê Diê leh anăn kyua klei khăp kơ phung ƀuôn sang Israel, wăt tơdah diñu amâo mâo klei năng dưi pap brei ôh.
Y-Môis lui brei leh kơ drei sa rup bi hmô kơ klei wah lač brei čiăng kơ drei ngă tui hlue. Ñu amâo mă tŭ sa mta klei tŭ dưn ôh tơdah wah lač brei kơ phung ƀuôn sang Israel, ƀiădah năng huĭ hĭn kyuadah ñu dôk tlă anăp hŏng klei Aê Diê ngêñ trơ̆ng, leh anăn wăt bi luč klei myun dưi mjing mơ̆ng ñu sa găp djuê mrâo mơh (êlan 10), ƀiădah kyua hŏng klei đăo kơ Aê Diê klei sĭt suôr, klei jăk, leh anăn kyua klei khăp kơ phung ƀuôn sang Aê Diê yơh, mtrŭt leh Y-Môis hŏng jih ai tiê wah lač brei kơ diñu.
Ya mta klei bi kgăn drei wah lač brei kơ mnuih mkăn?
Wah lač: Ơ Khua Yang, akâo Khua Yang brei kâo mâo ai tiê thâo khăp msĕ si Y-Môis čiăng kơ kâo uêñ mĭn wah lač brei kơ phung ayŏng amai adei dôk nao hlăm êlan soh čhuai, leh anăn wăt kơ phung dôk rai luč, čiăng kơ diñu lŏ dưi bi grăng hŏng Aê Diê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
