Kalatias 2:11-21
Nqe cim:
“Vajtswv txoj koob hmoov kuv yeej tsis vwjtxheej, yog Vajtswv suav hais tias tus uas xyaum ua raws li Vajtswv txoj kevcai yog tus ncaj ncees lawm, ces qhov uas Yexus Khetos tuag yeej tsis muaj nqis dabtsi li!” (Kalatias 2:21)
Lus nug rau sawvdaws xav:
– Timthawj Petus ua dabtsi es Timthawj Paulus thiaj yws nws tabmeeg sawvdaws li ntawd?
– Qhov uas Petus ua hnyav txog qib twg thiab ua hiam lwm tus li cas es Paulus thiaj hais Petus li ntawd?
– Peb kawm tau qhov sib txuas ntawm qhov lees ntseeg thiab qhia tshwm kev ntseeg zoo li cas?
Yog hauv ntu Vajluskub ua ntej, Timthawj Paulus twb mus nram lub nroog Yeluxalees ntsib cov thawjcoj saib Pawg Ntseeg, cov ntawd muaj Petus, nrog lees paub Txojmoo Zoo uas Paulus qhia thiab Txojmoo Zoo uas Petus qhia yog tib txoj, ces ntu Vajluskub hnub no hais txog zaj uas Timthawj Petus raug Timthawj Paulus yws tabmeeg sawvdaws. Zaj xwm no tshwm muaj thaum Timthawj Petus mus txog hauv lub nroog Ati-aukias, qhov chaw uas Timthawj Paulus mus qhia Txojmoo Zoo ntau xyoo. Zaum uas rov mus ncig saib cov Pawg Ntseeg no, Timthawj Petus thiab “cov neeg Yudais” zaum nrog cov ntseeg uas yog lwm haivneeg tsis ua kevcai tiav noj mov ua ke. Tiamsis thaum “cov neeg uas Yakaunpaus” txib mus txog, Petus txawm “cia li tsis nrog lwm haivneeg” noj mov ua ke lawm, “rau qhov nws ntshai cov neeg uas tsis ua kevcai txiav”. Qhov uas Petus ua li no, yog “ua ntsejmuag ncaj siab nkhaus”, ua hiam Npananpas thiab lwm cov neeg Yudais. Yog li ntawd, Timthawj Petus thiaj raug Timthawj Paulus tus uas tuav rawv txoj cai tsis ua rau lwm tus ua txhaum yws (I Kauleethaus 8:9), tabmeeg yws rau sawvdaws pom ntsoov.
Raws li Timthawj Paulus hais ntxiv, qhov uas Petus ua no zoo nkaus li rov muab txoj kevcai uas rhuav lawd ua dua (nqe 18), lossis “vwjtxheej Vajtswv txoj koob hmoov” (nqe 21), vim qhov ntawd yog qhov uas qhia tshwm hais tias tau suav tias ncaj ncees los ntawm txojkev ntseeg tsis tau txaus. Txawm yog Timthawj Petus twb qhia, lees yuav thiab ua tabpov rau Timthawj Paulus ua ntej ntawd los, qhov uas Petus ua li no tabtom qhia tshwm qhov yuam kev tias ntseeg Tswv Yexus tsis tau txaus, yuav tsum coj kevcai txiav rau lwm haivneeg, yog hais tias lawv xav kom ua tau zoo li cov Yudais. Yog ua li ntawd, ces Petus thiab cov xibhwb cuav puavleej ntseeg ib yam nkaus, tsuas yog qhov qhia tshwm sib txawv xwb.
Yog cov xibhwb cuav yuav tsum raug rhuav tabmeeg sawvdaws, ces qhov uas Petus tsis lees tias tus uas tau suav hais tias ncaj ncees yog tus uas ntseeg Yexus kuj yuav tsum tau rhuav tabmeeg thiab, tsis tau lam suav hais tias yog kev txhaum ntawm tus kheej ces mam ua twj ywm hais xwb. Yog tsis ua li, qhov ntawd yuav cuab zog rau txojkev qhia kev ntseeg yuam kev. Qhov uas peb lees tias yus ntseeg tseemceeb heev, tiamsis qhov uas qhia tshwm hais tias peb ntseeg kuj tseemceeb ib yam nkaus thiab.
Thov Vajtswv,
Tus Tswv, nyuam yaus ua Koj tsaug vim Koj Txojlus qhia kom yuav tsum tuav rawv Txojmoo Zoo kom tseeb thiab dawbhuv. Thov Koj pab kom nyuam yaus tswj tau lub neej ua raws nraim li qhov nyuam yaus ntseeg Koj. Nyuam yaus tuav Tswv Yexus lub npe thov, Amees.
Peb txojkev ua neej puas qhia tshwm yog kiag li qhov uas peb ntseeg?
Nyeem Vajluskub hauv peb lub xyoo: I Vajntxwv 14
Kênh Youtube BHKTHN:
