Klei Aê Diê Blŭ: Galati 2:11-21
Êlan kliăng: “Kâo amâo yap ôh klei Aê Diê pap jing hơăi mang; kyuadah tơdah arăng dưi mâo klei yap kpă hŏng klei bhiăn, snăn klei Krist djiê jing hơăi mang yơh” (Galati 2:21)
Klei êmuh ksiêm mĭn: Ya klei Khua ƀĭng kna Y‑Sêphas ngă leh tơl Khua ƀĭng kna Y‑Pôl ƀuah kơ ñu ti anăp lu mnuih? Tăp hnơ̆ng boh kjham bruă ñu ngă leh anăn bi hmăi jhat kơ hlei pô tơl Khua ƀĭng kna Y‑Pôl amâo čuăn blŭ klei đru kčĕ knŏng hjăn ñu ôh? Si klei hriăm drei mâo kơ klei bi mguôp plah wah klei hưn klei drei đăo hŏng klei bi êdah klei đăo?
Tơdah hlăm trăn Klei Aê Diê Blŭ tal êlâo, Khua ƀĭng kna Y‑Pôl đĭ nao kơ ƀuôn Yêrusalem bi tuôm hŏng phung arăng yap jing kmeh kơ Phung Sang Aê Diê, hlăm anăn mâo wăt Y‑Sêphas, jing Y‑Pêtrôs mơh čiăng bi klă kơ Klei Mrâo Mrang Jăk ñu mtô hŏng Klei Mrâo Mrang Jăk phung ƀĭng kna mkăn mtô knŏng jing sa, snăn trăn Klei Aê Diê Blŭ hruê anei čih kơ klei Khua ƀĭng kna Y‑Pôl ƀuah Khua ƀĭng kna Y‑Sêphas ti anăp lu mnuih. Klei anei truh tơdah Khua ƀĭng kna Y‑Pêtrôs truh ti ƀuôn Antiôs, jing anôk phŭn Khua ƀĭng kna Y‑Pôl hưn Klei Mrâo Mrang Jăk sui thŭn leh. Hlăm klei čuă čhưn Phung Sang Aê Diê phung tue anei, Khua ƀĭng kna Y‑Pêtrôs mbĭt hŏng “phung Yuđa mkăn” dôk gŭ ƀơ̆ng huă mbĭt hŏng phung tue ka khăt klĭt ôh. Ƀiădah lĕ, tơdah “phung mnuih Y‑Yakơ tiŏ hriê truh”, ñu “kdŭn đuĕ leh anăn bi ktlah dôk mdê”, “kyua huĭ kơ phung khăt klĭt”. Bruă ñu ngă hŏng klei amâo sĭt, hŏng “klei ai ngăm” anăn bi hmăi kơ Y‑Ƀarnaƀas leh anăn wăt kơ “phung Yuđa mkăn” msĕ mơh. Kyuanăn Khua ƀĭng kna Y‑Pêtrôs tŭ klei Khua ƀĭng kna Y‑Pôl, jing sa čô mnuih hdĭp djŏ hŏng klei mtô amâo ngă klei bi têč hnêč kơ phung awăt ôh (I Kôrantô 8:9) ƀuah ti anăp lu mnuih.
Msĕ si klei Khua ƀĭng kna Y‑Pôl lŏ mblang ti tluôn anăn, klei Khua ƀĭng kna Y‑Pêtrôs ngă amâo mdê ôh hŏng klei lŏ mdơ̆ng klei ñu ruh leh (êlan 18), amâodah “yap klei Aê Diê pap jing hơăi mang” (êlan 21), kyuadah anăn jing êlan hưn hŏng bruă ngă kơ klei arăng dưi mâo klei yap kpă hŏng klei đăo knŏng dŭm anăn ka djăp ôh. Măng ai ya klei Khua ƀĭng kna Y‑Pêtrôs tuôm mtô leh, hưn leh anăn bi klă leh hŏng Khua ƀĭng kna Y‑Pôl êlâo tinăn, klei ñu ngă msĕ si tŭ ư hŏng klei mtô soh msĕ hŏng klei phung khua pô mtô soh mtô leh, knŏng đăo kơ Khua Yang đuč jing ka djăp ôh, tơdah phung đăo phung tue čiăng jing mđơr hŏng phung đăo phung Yuđa snăn brei digơ̆ lŏ khăt klĭt. Snăn yơh, Khua ƀĭng kna Y‑Pêtrôs leh anăn phung khua pô mtô soh đăo kơ sa klei msĕ wăt tơdah klei bi êdah jing mdê mdê dưn mơh.
Tơdah arăng srăng pŏk lưk ti anăp lu mnuih brei jih jang mnuih thâo kral phung khua pô mtô soh, snăn klei Khua ƀĭng kna Y‑Pêtrôs hngah kơ klei mtô arăng dưi mâo klei yap kpă hŏng klei đăo ăt srăng ƀuah ti anăp lu mnuih mơh, klei anăn amâo dưi yap jing klei ngă soh hjăn leh anăn srăng mkra hjăn ôh. Tơdah amâo ngă msĕ snăn ôh, sĭt nik năng ai êdei dih srăng mâo pô yua klei ngă anăn kăp đru mgang klei mtô soh. Klei drei hưn kơ ya klei drei đăo jing yuôm, ƀiădah klei yuôm msĕ mơh jing bruă drei ngă čiăng bi êdah kơ ya klei drei đăo anăn.
Klei drei dôk dơ̆ng ƀơ̆ng huă bi êdah djŏ tui si ya klei drei đăo mơ̆?
Wah lač: Ơ Khua Yang, kâo lač jăk kơ Ih kyuadah Klei Ih Blŭ bi hriăm kâo djă pioh Klei Mrâo Mrang Jăk doh jăk leh anăn sĭt nik. Akâo Khua Yang đru kâo dôk dơ̆ng ƀơ̆ng huă djŏ tui si klei kâo hưn kâo đăo kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Bruă Mtao 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
