Pajlug 23:12-14
Nqe cim:
“Muab siab rau kawm tej uas koj tus xibhwb qhia thiab khaws txhua yam ntawd cia.” (Pajlug 23:12)
Lus nug rau sawvdaws xav:
– Vajntxwv Xalumoos hais txog kev qhia menyuam zoo li cas?
– Txojcai siv nplawm hauv phau Pajlug no qhia li cas?
– Peb zeem paub feem xyuam qhia menyuam li cas?
Vajntxwv Xalumoos hais txog kev cob qhia menyuam, taw qhia lawv ua li txojkev txawj ntse qhia. Lo lus “muab siab” thiab “kawm” hais txog qhov uas ua tib zoo khaws tej kev qhia cia. Cov menyuam uas tseem yau tawv ncauj, txhoj pob ces yuav tau muaj kev tswj nruj. Lo lus “qhia” (nqe 12) hauvpaus lus Henplais kuj muaj lub ntsiab tias “nplawm” (nqe 13), rau qhov kev qhia muaj cov lus ntuas qhia thiab nplawm huvsi, lub homphiaj yog coj, qhia. Cov lus “koj nplawm” cov menyuam tawm ncauj tsis mloog lus, tsis tau txhais tias pom zoo rhuav menyuam cev nqaij tawv, tiamsis yog tivthaiv kom menyuam tsis txhob mus ua txhaum ntxiv xwb. Txojkev qhia, qhia tshwm feem xyuam ua tib zoo cob thiab nplawm tus menyuam ua qhov zoo. Nplawm menyuam tsis yog ua kom yus kev npautaws nqig, tiamsis lub homphiaj yog nplawm tus menyuam cev nqaij mob, nws paub tso tseg tej kev tsis zoo, tsis yuam kev mus ua txhaum (Pajlug 2:12), thiab qhov tseemceeb dua yog “cawm tau nws dim ntawm txojkev puastsuaj.” (nqe 14).
Nimno, yuav muaj coob leej tsis pom zoo qhov uas Vajtswv Txojlus hais kom qhia menyuam los ntawm qhov muab pas nplawm. Tiamsis yuav paub tseeb hais tias txojcai nplawm uas phau Pajlug hais no tsis yog txhawb kom cov niamtxiv tsimtxom cov menyuam hnyav lossis ntaus cov menyuam thaum npautaws, tiamsis cov menyuam uas tawv ncauj, tsis mloog lus, hais tsis tau cheemtsum siv nplawm los kho nws.
Tej laus ibtxwm hais tias: “menyuam puas yog niam, xeebntxwv puas yog pog”, nqe lus no lub ntsiab yog liamtxim rau leejniam, tus neeg uas tsis qhia menyuam zoo, tso menyuam ywj siab ua rau menyuam cia li tsis ntshai kev txhaum, dhau mus ua neeg liam, tawv ncauj. Vajtswv Txojlus hauv phau Pajlug qhia hais tias, leejniam thiab leejtxiv puavleej muaj feem xyuam rau qhov kev cob qhia yus cov menyuam (Pajlug 1:8; 6:20), yog cia tej menyuam puas neeg, niamtxiv puavleej koom ris feem xyuam ntawm Vajtswv xubntiag.
Yog tus ntseeg Yexus, txawm peb yog pogyawg thiab niamtxiv los puavleej muaj feem xyuam rau tej menyuam uas yog koob hmoov Vajtswv pub rau peb, peb yuav tsum muaj feem xyuam rau siab ntso qhia tej menyuam, xeebntxwv ua raws li Vajtswv Txojlus qhia. Yog cheemtsum, peb kuj yuav tsum siv kev tswj nruj rau tej menyuam, tiamsis ua los ntawm txojkev hlub thiab kev saib taus. Tej lub sijhawm ntawd, peb yuav tau qhia rau tej menyuam paub meej yog vim li cas nws raug nplawm komxwv nws zeem paub yus txojkev hlub, hmov tshua, thiab qhov muaj nqis rau cov menyuam sab ntsujplig thiab saib nqaij tawv.
Thov Vajtswv,
Vajtswv, ua tsaug Koj Txojlus qhia kom nyuam yaus paub qhia tej menyuam. Thov Koj pab kom nyuam yaus nco ntsoov feem xyuam, rau siab ntso coj qhia, ntuas tej menyuam kom lawv ua tau neeg zoo, sab ntsujplig tau kev cawm dim, tau txojsia, tsis yuam kev, tsis poob kev ntseeg. Tuav Tswv Yexus lub npe thov, Amees.
Peb rau siab qhia menyuam raws li Vajtswv Txojlus zoo li cas?
Nyeem Vajluskub hauv peb lub xyoo: I Vajntxwv 5
Kênh Youtube BHKTHN:
