Mathiơ 27:45-54
“Lăp pêng jơ kơsơ̆ Yêsu pơma ‘bơ̆r re khan: Êli, Êli, lamma sabatthani,” wă khan: “Ơ ‘Bok Kei-Dei, ơ ‘Bok Kei-Dei, yua kơ kiơ Ih achăng lê̆ Inh?” (Mathiơ 27:46)
Nơ̆r jet tơchĕng pơwao:
– Kră Yang Yêsu krao khan thoi yơ tơ ‘long pơglang?
– Tơdrong ‘Bok Kei-Dei tơl tơwih đei tơ’bôh thoi yơ?
– ‘Bai pơhrăm đei tơ’blŏk kơ lu bơ̆n pơm kiơ kơplah tơ’bơ̆p tơdrong pơmat ơh sơ ‘ngon dah mưh pơm yoch hăm Kră Yang?
Đĭ đăng dôm Nơ̆r Kră Yang Yêsu krao khan, ‘nâu bơih lu nơ̆r krao khan tơ’bôh tơdrong ơh sơ’ngon, jĭ pơmat dêh, nơ̆r Sư krao ôr jĭ jăn gah sĕch akar đêl đe huăt hăm sơnguĕt, păng đe pơ̆ng sư tơ ‘long pơglang đei tơ’bôh lăm tơdrong Sư chu pŭ iŏk tơdrong pơmat mă Sư đei hlôi pŭ iŏk wă pơkeh tơdrong dŏng pơklaih. Mă-lei tơdrong jĭ ơh sơ’ngon hloh noh ‘Bok Kei-Dei “achăng” tŭk Sư kơplah tơdrong yoch kon bơngai tơpŭ đĭ kơ Sư. Lăm jơ ‘noh, Yêsu krao khan ưh kơ đei pao anăn ‘Bok Kei-Dei “’Bă” mă ‘mêm kơ eng (Mathiơ 26: 39,42), tơplih kơ noh, Kră Yang Yêsu tơ’bôh anăn ‘Bok Kei-Dei hăm nơ̆r tơ tok thoi Đawĭt đei krao khan: “Kră Yang ‘Bok Kei-Dei ơi! Liơ Ih achăng lê̆ inh” (Hơriso 22:1).
Kơplah Kră Yang Yêsu krao khan, đei lơ bơngai khan ‘Bok Kei-Dei ‘Bă ưh kơ bơngơ̆t, ngăn hreh, mă-lei tơpă sư Kră Yang bơih ‘Bok Kei-Dei ‘bĕnh tơdrong mơnat păng ‘bĕnh tơdrong ‘mêm, sư tơl tơwih nơ̆r Yêsu krao khan hăm tơdrong mơsêh che lăm hnam akŭm tơhek chuơ̆ng tŏk-bŏk đơ̆ng kơpal tơ ala hloi, Sư ăn kon bơngai gơh tơ’bưh hăm Kră Yang đơ̆ng tơdrong Yêsu lôch tang tơdrong yoch kon bơngai “ teh adrŏ mơnưt mơ’nat” păng “ tơmo kŭk mah pơchah” “ lơ ‘măng bơsat tơpơih kơdih” (trong 51-52 BTTHĐ) tơdrong mơsêh noh bơ̆n ‘bôh rơđah dêh na lu bơngai linh wei Yêsu na lu sư khan: “Sư âu kon ‘Bok Kei-Dei tơpă” (trong 54)
Hăm đei lai yơ bơ̆n ‘bôh Kră Yang achăng lê̆ bơ̆n ưh, dah mă bơ̆n krao apinh na Sư ưh kơ kơtơ̆ng? Kră Yang ưh kơ đei lai yơ achăng lê̆ bơ̆n ôh. Yang Bơhngol ‘Lơ̆ng ling lang oei hơdai păng tơl tơwih tôm nơ̆r kon pơlei Kră Yang krao apĭnh. Athei pơhrăm iŏk đơ̆ng Kră Yang Yêsu lăm chăl arih rim năr athei ling lang krao chă tơdrong chông anhăk đơ̆ng Kră Yang ăn jơhngơ̆m pran păng dŏng pơklaih đơ̆ng ‘Bok Kei-Dei kơplah bơ̆n tơ’bơ̆p tơdrong anat bơ̆n ‘nĕ kơ bơ̆l hăl athei adrin krao khan, bơ̆n athei kơchăng păng chang gô Kră Yang tơl tơwih, chơ chă tơdrong Kră Yang wă lăm nơ̆r Kră Yang tơl tơwih. Tơdrong bơ̆n athei băt, ‘Bok Kei-Dei bơih Yang ‘lơ̆ng rơgoh ưh kơ wă tơdrong yoch kơnê̆, thoi noh Kră Yang gô phak tơpă achăng lê̆ lu bơngai pơm yoch. Mă-lei dah bơngai pơm yoch băt tơbral, krao apĭnh Kră Yang lei na ưh kơ đei tơdrong yoch ayơ mă Kră Yang ưh kơ mơnat. Tơdrong yoch pơm kơ bơ̆n tơklah đơ̆ng tơdrong tơ’bưh ‘Bok Kei-Dei hăm kon bơngai, mă-lei tơdrong ‘mêm Kră Yang ‘măn kơ lu bơ̆n noh tơdrong ‘mêm ling lang Kră Yang Yêsu đei pơkeh tơdrong dŏng pơklaih tơ ‘long pơglang. Athei jah năm tơbral tơdrong yoch wă kơ gơh mơnat, kĕ jei đơ̆ng tơdrong yoch păng hơmet ming tơdrong tơ’bưh hăm Kră Yang.
Ơ Kră Yang inh bơnê kơ Ih đei tơ’blŏk kơ inh gah tơdrong iŏk jơhngơ̆m iơ̆m dim, ‘mêm mơnat păng Ih đei mơnat kơ inh. Apĭnh Ih tơgŭm inh kơjăp, đĭ jơhngơ̆m chă trong kiơ̆ thoi Ih wă rim năr. yua Anăn Kră Yang Yêsu Krist, Amen!
Lu bơ̆n tam tơbral tơdrong yoch kơnê̆ ưh? Lu bơ̆n hăm đĭ jơhngơ̆m krao khan mưh tơ’bơ̆p tơdrong anat ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 4
Kênh Youtube BHKTHN:
