Klei Aê Diê Blŭ: I Kôrantô 9:19-23
Êlan kliăng: “Hŏng phung awăt kâo jing awăt, čiăng kơ kâo dưi atăt phung awăt. Snăn hlăm jih jang klei kâo čiăng jing msĕ si jih jang mnuih, čiăng kơ hŏng jih klei anăn kâo dưi bi mtlaih đa đa hlăm phung diñu.” (I Kôrantô 9:22)
Klei êmuh ksiêm mĭn: Ya phŭn knhal klei khua ƀĭng kna Y‑Pôl săn asei klei êngiê ñu? Hlăk lŏ wĭt đăo leh anăn mă bruă, si klei arăng đuĕ kơ ñu leh anăn đing đăo kơ ñu? Hŏng ya hdră êlan phŭn ñu dưi găn gao? Ya klei hriăm kơ drei mơ̆ng klei khua ƀĭng kna Y‑Pôl bi hmô?
Y‑Sôl jing Y‑Pôl, jing mnuih êlâo kơnăn bi kdơ̆ng ktang tĭt hŏng klei đăo kơ Khua Yang. Ƀiădah dơ̆ng mơ̆ng mmông Khua Yang Yêsu pô bi tuôm hŏng ñu ti êlan ñu nao kơ Đamas, ñu đup gưt kơ Khua Yang, klei mĭn leh anăn klei hdĭp ñu bi mlih kluôm dhuôm. Mơ̆ng anôk ngă jhat kơ phung anak ƀuôn sang Aê Diê ktang tĭt, ñu săn asei klei êngiê ñu, duah êlan bi mguôp, hdĭp jing msĕ si djăp mta êpul mdê mdê čiăng dưi đru lu mnuih thâo kral Klei Mrâo Mrang Jăk leh anăn mă tŭ klei bi mtlaih hlăm Khua Yang Yêsu Krist.
Wăt snăn dưn mơh, amâo djŏ ôh khua ƀĭng kna Y‑Pôl amâo găn klei đing đăo, bi kdơ̆ng leh anăn ñĕ đuĕ mơ̆ng hlăm lam êpul kiă kriê klei đăo hlăk anăn, wăt klei ngă jhat nanao mơ̆ng phung lăn ala ênuk anăn, tơdah ñu hưn bi sĭt Khua Yang Yêsu Krist kơ phung Israel leh anăn kơ phung tue. Hlăk Y‑Sôl mrâo wĭt đăo leh anăn mtô mblang Khua Yang Yêsu kơ phung Israel, arăng mkra mnêč čiăng bi mdjiê ñu, ƀiădah mnêč anăn amâo jing ôh kyuadah Khua Yang yua mnuih nao hưn čiăng kơ ñu dưi tlaih đuĕ (Bruă Phung Khua Ƀĭng Kna 9:23-25). Hlăk ñu nao ti ƀuôn Yêrusalem čiăng bi tuôm leh anăn bi mguôp hŏng phung đăo čiăng hưn bi sĭt kơ Khua Yang Yêsu “ƀiădah jih jang digơ̆ huĭ kơ ñu, kyuadah digơ̆ amâo đăo ôh kơ ñu jing leh sa čô đăo” (Bruă Phung Khua Ƀĭng Kna 9:26). Hlăm ktuê êlan hiu hưn Klei Mrâo Mrang Jăk kơ phung tue, khua ƀĭng kna Y‑Pôl tlă anăp hŏng lu snăk sơưn klei arăng ngă jhat, djiê hdĭp msĕ si ñu hưn bi sĭt leh hlăm hră čih mơĭt (II Kôrantô 11:23-29).
Hŏng ya klei khua ƀĭng kna Y‑Pôl dưi găn gao klei lông dlăng tơdah phung mnuih đuĕ kbưi, bi kdơ̆ng hŏng ñu msĕ snăn? Anăn jing mơ̆ng klei ñu khăp kơ Khua Yang hŏng jih ai tiê yơh, sĭt suôr hŏng Khua Yang, kyua Khua Yang leh anăn kyua mngăt phung mnuih rai luč, čiăng dưi hdĭp tŭ gĭr, mjĕ mjuk, jing msĕ hŏng jih jang mnuih, duah mmông găl đru digơ̆ thâo kral leh anăn jum Khua Yang Yêsu jing Khua Yang Pô Bi Mtlaih, leh anăn đĭ hriê kơ prŏng hlăm Khua Yang, msĕ si klei ñu lač: “Hŏng phung awăt kâo jing awăt, čiăng kơ kâo dưi atăt phung awăt. Snăn hlăm jih jang klei kâo čiăng jing msĕ si jih jang mnuih, čiăng kơ hŏng jih klei anăn kâo dưi bi mtlaih đa đa hlăm phung diñu.” (êlan 22).
Hruê anei, ktuê êlan tui hlue Khua Yang leh anăn mă bruă kơ Ñu, phung anak ƀuôn sang Aê Diê amâo tlaih ôh klei arăng đuĕ kbưi, bi kdơ̆ng, tơl wăt klei arăng ngă jhat kơ drei. Khua ƀĭng kna Y‑Pôl, sa čô sĭt suôr jih ai tiê hŏng Khua Yang, lui brei leh kơ drei êlan hdră phŭn čiăng dưi găn gao klei lông dlăng hlăk tuôm hŏng klei arăng đuĕ kbưi, ngă jhat, jing hlăm djăp mta boh klei truh, ăt dôk hdĭp thâo mĭn bi mguôp čiăng dưi atăt arăng. Ai tiê klei mĭn jăk siam anăn jing klei bi hmô jăk kơ grăp čô drei kăp hlue ngă msĕ.
Si drei bi êdah ai tiê khăp kơ Khua Yang, hŏng knhuah hdĭp thâo bi mguôp leh anăn tŭ gĭr hŏng phung riêng gah drei?
Wah lač: Ơ Khua Yang, bi mni kơ Ama khăp leh, pap brei klei soh kâo. Akâo kơ Ama brei kơ kâo thiăm klei thâo khăp, dưi tŭ gĭr hŏng jih jang mnuih čiăng bi êdah klei khăp leh anăn klei bi mtlaih mơ̆ng Khua Yang Yêsu Krist kơ digơ̆. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôhan 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
