I Kauleethaus 9:19-23
Nqe cim:
“Thaum kuv nrog cov neeg uas tsis tshua paub Vajtswv pestsawg nyob ua ke, kuv ua ib yam li lawv, kuv thiaj coj tau lawv los ntseeg. Kuv xyaum ua li txhua haivneeg ua. Kuv ua li ntawd saib puas yuav pab tau qee leej rov los ua neeg tshiab.” (I Kauleethaus 9:22)
Lus nug rau sawvdaws xav:
– Qhov vimchiv twg Timthawj Paulus tso taus qee yam ntawm tus kheej?
– Thaum los ntseeg thiab ua haujlwm, Paulus raug lwm tus ntxub, saib zoo li cas?
– Lub tswvyim pab kom Paulus tiv dhau yog dabtsi?
– Peb kawm tau dabtsi ntawm Timthawj Paulus tus qauv?
Xaulus tus uas muaj dua lub npe hu ua Paulus, yog tus neeg uas ua ntej tsis tau los ntseeg tawmtsam, tsimtxom cov ntseeg heev. Tiamsis tom qab no los ntseeg Yexus ntawm txojkev mus rau pem lub nroog Damaxes thiab tau tus Tswv hu, Paulus txojkev xav thiab lub neej hloov tshiab. Yog ib tus neeg tsimtxom Vajtswv cov menyuam, nimno Paulus dhau los ua neeg tso txhua yam ntawm tus kheej los nrhiav txhua hom neeg thiab coj lawv los ntseeg Txojmoo Zoo, txais yuav kev cawm dim ntawm Tswv Yexus.
Tsis yog Timthawj Paulus tsis ntsib tej kev tawmtsam, ua xyem xyav thiab ntxub sab hauv Pawg Ntseeg hnub thaud, nws kuj raug tsimtxom ntawm tej neeg ntiajteb thaum nws mus ua timkhawv qhia Tswv Yexus zaj rau cov neeg Yudais thiab lwm haivneeg. Thaum Xaulus nyuam qhuav los ntseeg thiab qhia Tswv Yexus rau cov neeg Yudais, Paulus raug lawv tawm tswvyim yuav muab nws tua povtseg, tiamsis lub tswvyim ntawd ua tsis tiav rau qhov muaj tus Tswv cawm (Tes Haujlwm 9:23-25). Thaum Paulus mus txog hauv nroog Yeluxalees, nws xav mus ntsib cov ntseeg thiab koom nrog lawv ua timkhawv qhia Tswv Yexus zaj “tiamsis lawv ntshai nws, lawv tsis ntseeg hais tias nws yog ib tug thwjtim tiag” (Tes Haujlwm 9:26). Lub sijhawm mus qhia lwm haivneeg, Timthawj Paulus ntsib ntau yam kev tsimtxom, tsis paub thaum twg luag yuav muab tua povtseg thaum ua timkhawv raws li II Kauleethaus 11:23-29 hais.
Vamkhom qhov twg Timthawj Paulus thiaj tiv taus dhau tej kev nyuaj uas neeg thuam, ntxub, tawmtsam no? Nws yog qhov uas Paulus hlub tus Tswv tas siab, rau siab ntso ua tus Tswv tes haujlwm, vim tus Tswv thiab vim cov neeg txhaum tabtom raug puastsuaj es nws ua siab ntev, nrog sawvdaws sib raug zoo, nrhiav sijhawm zoo pab kom lawv paub thiab los ntseeg Yexus, zoo ib yam li Paulus hais: “Thaum kuv nrog cov neeg uas tsis tshua paub Vajtswv pestsawg nyob ua ke, kuv ua ib yam li lawv, kuv thiaj coj tau lawv los ntseeg. Kuv xyaum ua li txhua haivneeg ua. Kuv ua li ntawd saib puas yuav pab tau qee leej rov los ua neeg tshiab.” (nqe 22).
Nimno, lub neej uas nrog tus Tswv mus thiab ua Nws tes haujlwm. Vajtswv cov menyuam yuav khiav tsis dhau txojkev txob thuam, tawmtsam, qee zaus yuav ua hiam peb. Timthawj Paulus yog ib tug neeg rau siab ntso ua rau tus Tswv qhia rau peb paub lub tswvyim tiv taus dhau tej kev nyuaj, tsimtxom; txawm yuav nyob rau lub tsamthawj twg los ua neeg ntse koom nrog sawvdaws ua haujlwm. Lub siab zoo yog tus qauv zoo rau peb txhua tus kawm xyaum.
Thov Vajtswv,
Vajtswv, nyuam yaus ua Koj tsaug vim koj hlub, zam txim rau nyuam yaus. Thov Koj pub kev hlub, kev ua siab ntev, txo hwjchim nrog txhua tus neeg kom qhia tawm txojkev hlub thiab kev cawm dim rau neeg ntiajteb. Nyuam yaus tuav Tswv Yexus lub npe thov, Amees.
Peb twb qhia tawm lub siab hlub tus Tswv los ntawm peb kev ua neej thiab ua siab ntev rau tej neeg ibncig peb zoo li cas lawm?
Nyeem Vajluskub hauv peb lub xyoo: Yauhas 9
Kênh Youtube BHKTHN:
