Henplais 13:17-19
Nqe cim:
“Nej yuav tsum mloog cov thawj uas saib xyuas nej tej lus thiab ua raws li lawv hais. Lawv niaj hnub saib xyuas nej lawv tsis nkees thiab tsis dhuav li, rau qhov lawv yuav tsum qhia tej haujlwm uas lawv ua rau Vajtswv. Yog nej mloog lawv lus, lawv yuav kaj siab lug ua lawv tej haujlwm. Yog nej tsis mloog lawv lus, lawv yuav nyuaj siab xwb, lawv yuav pab tsis tau nej hlo li.” (Henplais 13:17)
Lus nug rau sawvdaws xav:
– Tus sau tsab ntawv Henplais ntuas cov ntseeg yuav tsum ua licas rau cov thawjcoj sab ntsujplig? Vim licas?
– Nws kuj qhia pom hais tias tus thawjcoj sab ntsujplig yuav tsum muaj tej yam zoo twg?
Tus sau tsab ntawv Henplais ntuas cov ntseeg txog yam yuav tsum ua rau tus thawjcoj sab ntsujplig, ntawd yog “mloog lus”, “nyob hauv qab tswjhwm” (HMOWSV) thiab “thov Vajtswv” pab lawv. Vim “lawv niaj hnub saib xyuas nej lawv tsis nkees thiab tsis dhuav li”, txhais tau hais tias tus thawjcoj sab ntsujplig siv Vajtswv Txojlus los yug tus ntseeg lubneej sab ntsujplig. Yog li ntawd, cov ntseeg yuav tsum mloog lus thiab nyob qab tswjhwm ntawm Vajtswv Txojlus dhau ntawm tej lus uas tus thawjcoj sab ntsujplig tau qhia. Zoo li tus yug yaj, tus thawjcoj sab ntsujplig muaj feemxyuam siv Vajtswv Txojlus los saib xyuas, tu, pab kom cov neeg tus Tswv muab rau nws saibxyuas muaj kev loj hlob hauv kev ntseeg thiab ua neej raws nraim li Vajtswv Txojlus qhia. Ntawd yog feemxyuam loj vim tus thawjcoj yuav tsum qhia rau Vajtswv txog “pab yaj” uas Vajtswv pub rau nws saibxyuas.
Yuav kom pab tau cov thawjcoj sab ntsujplig ua tiav tes haujlwm no, peb yuav tsum thov Vajtswv thiab pab lawv, kom lawv ua tus Tswv tes haujlwm kaj siab lug. Tus thawjcoj sab ntsujplig muaj kev kaj siab thaum saib pom cov neeg uas lawv saibxyuas loj hlob thiab tawg paj txi txiv hauv sab kev ntseeg, tau tus Tswv siv los ua thawjcoj sab ntsujplig pub rau lwm tus.
Nyob hauv ntu Vajluskub no, tus sau tsab ntawv Henplais qhia tawm txog lub luag haujlwm thiab feemxyuam hnyav ntawm tus thawjcoj sab ntsujplig, thiab kuj hais meej txog tej yam zoo lawv cheemtsum muaj thaum coj lwm tus. Ntawd yog yuav tsum zov tu cov ntseeg tus ntsujplig los ntawm Vajtswv Txojlus, muaj lub siab dawb paug thiab xyaum zoo rau txhua fab. Vim tus thawjcoj sab ntsujplig kuj tseem yog tibneeg zoo li lwm tus, lawv tseem muaj kev qaug zog, tsis tau zoo txaus txhua fab, yog li ntawd lawv thiaj cheemtsum tau tus Tswv cov menyuam thov Vajtswv pab kawg li. Peb muaj cuab kav thov tus Tswv pub rau lawv muaj tswvyim, peevxwm thiab dag zog kom lawv ua tau tus Tswv tes haujlwm, thov tus Tswv tiv thaiv lawv lub cuabyig, tshwjxeeb yog thov pab kom lawv tus kheej loj hlob txhua hnub nyob hauv kev sib raug zoo nrog tus Tswv. Dhau ntawm kev thov Vajtswv, peb tsis yog tsuas pab cov thawjcoj ua tiav lawv tes haujlwm xwb, peb tseem tau koom tes nrog lawv ua Vajtswv haujlwm thiab.
Thaum tus ntseeg thiab tus thawjcoj sab ntsujplig ua neej raws nraim li Vajtswv Txojlus qhia, Nws yuav foom koob hmoov kom txhua tus tau loj hlob sab kev ntseeg, Pawg Ntseeg yuav tau txhim kho thiab huamvam.
Thov Vajtswv,
Tus Tswv, nyuam yaus ua Koj tsaug vim cov thawjcoj sab ntsujplig uas Koj siv los coj nyuam yaus loj hlob raws li Koj Txojlus. Thov Koj pab kom lawv ua tau lub neej zoo txhua fab thiab muaj nplooj siab dawb paug tu Koj pab yaj. Nyuam yaus tuav Yexus Khetos lub npe thov, Amees.
Peb tabtom koom tes nrog cov thawjcoj sab ntsujplig txhim kho thiab ua rau Pawg Ntseeg huamvam licas?
Nyeem Vajluskub hauv peb lub xyoos: II Kevcai 20
Kênh Youtube BHKTHN:
