Klei Aê Diê Blŭ: Hêbrơ 13:17-19
Êlan kliăng: “Gưt bĕ kơ phung gĭt gai diih leh anăn mpŭ kơ diñu; kyuadah diñu răng kriê kơ mngăt diih msĕ si phung srăng hưn bi êdah bruă diñu kơ Aê Diê. Brei diñu hưn hŏng klei hơ̆k, amâo ênguôt ôh, kyuadah tơdah klei diñu hưn amâo jing mơak ôh, klei anăn amâo srăng brei klei jăk kơ diih ôh” (Hêbrơ 13:17)
Klei êmuh ksiêm mĭn: Pô čih hră Hêbrơ mtă kơ phung đăo si knuih brei digơ̆ mâo hŏng phung gĭt gai mngăt? Ya ngă? Ñu brei ƀuh msĕ mơh si knuih brei phung gĭt gai mngăt mâo?
Pô čih hră Hêbrơ mtă kơ phung đăo kơ knuih digơ̆ srăng dôk dơ̆ng hŏng phung gĭt gai mngăt, anăn jing “gưt asăp”, “mpŭ” leh anăn “wah lač” kơ digơ̆. Kyuadah “diñu răng kriê kơ mngăt diih”, čiăng lač jing kyuadah phung gĭt gai mngăt yua Klei Aê Diê Blŭ čiêm rông klei hdĭp mngăt phung đăo. Snăn yơh, brei phung đăo gưt leh anăn mpŭ kơ Klei Aê Diê Blŭ mơ̆ng klei phung gĭt gai mngăt mtô. Msĕ si phung mgăt kiă kriê phung biăp, phung gĭt gai mngăt klam bruă răng kriê, čiêm rông, leh anăn đru bi mđĭ ai hŏng Klei Aê Diê Blŭ čiăng kơ jih jang phung Aê Diê jao leh kơ digơ̆ gĭt gai dưi đĭ hriê kơ prŏng hlăm klei đăo leh anăn hdĭp djŏ tui si Klei Aê Diê Blŭ. Anei jing bruă klam prŏng kyuadah phung gĭt gai srăng bi êdah ti anăp Aê Diê kơ “phung biăp” Ñu jao leh kơ digơ̆ răng kriê.
Čiăng đru phung gĭt gai mngăt ngă bruă klam anei, mâo klei mtă kơ drei wah lač leh anăn đru digơ̆ čiăng kơ digơ̆ dưi mă bruă kơ Khua Yang hŏng klei hơ̆k mơak. Klei mơak kơ phung gĭt gai mngăt jing ƀuh phung digơ̆ răng kriê đĭ hriê kơ prŏng leh anăn mâo boh hlăm klei đăo, Khua Yang yua čiăng jing pô gĭt gai mngăt kơ lu mnuih mkăn.
Hlăm trăn Klei Aê Diê Blŭ anei, pô čih hră Hêbrơ brei ƀuh bruă klam kơ phung gĭt gai mngăt jing ktrŏ snăk, mbĭt hŏng klei anăn mñă wăt kơ knuih brei digơ̆ mâo tơdah atăt gai mnuih mkăn. Anăn jing khăp mĭn kơ bruă răng kriê kơ mngăt phung ayŏng adei hŏng Klei Aê Diê Blŭ, mâo ai kpă êngeh leh anăn ngă jih jang klei hŏng klei djŏ. Kyuadah phung gĭt gai mngăt ăt jing sa čô mnuih awăt êdu leh anăn amâo mâo klă ênŭm msĕ si phung mnuih mkăn mơh, kyuanăn digơ̆ čiăng snăk kơ klei phung anak čô Aê Diê wah lač kơ digơ̆. Drei wah lač akâo Khua Yang brei kơ digơ̆ klei thâo mĭn, klei ktang leh anăn klei suaih pral čiăng kơ digơ̆ dưi mă bruă, akâo Khua Yang răng mgang gŏ sang digơ̆, boh nik nak akâo Khua Yang đru digơ̆ pô msĕ mơh đĭ hriê kơ prŏng grăp hruê hlăm klei bi mguôp hŏng Khua Yang. Hŏng klei drei wah lač, amâo djŏ drei knŏng đru phung gĭt gai ngă bi jăk bruă digơ̆ ôh ƀiădah wăt drei đru bi mguôp mbĭt hlăm bruă Aê Diê ngă găn hŏng digơ̆ msĕ mơh.
Tơdah phung đăo leh anăn phung gĭt gai mngăt hdĭp djŏ tui si klei Khua Yang mtă, Ñu srăng brei klei jăk jĭn čiăng kơ grăp čô dưi đĭ hriê kơ prŏng hlăm klei hdĭp mngăt. Phung Sang Aê Diê mâo klei bi mđĭ ai leh anăn đĭ kyar.
Si ngă drei đru bi mguôp mbĭt hŏng phung gĭt gai mngăt čiăng mbĭt mđrăm mkŏ mjing leh anăn bi mđĭ kyar Phung Sang Aê Diê?
Wah lač: Ơ Khua Yang, kâo lač jăk kơ Ih kyua jih jang phung gĭt gai mngăt Ih yua leh čiăng atăt kâo dưi đĭ hriê kơ prŏng djŏ tui si Klei Ih Blŭ. Akâo Khua Yang đru digơ̆ dôk dơ̆ng ƀơ̆ng huă hŏng klei djŏ leh anăn mâo ai tiê kpă êngeh čiăng kơ digơ̆ dưi čiêm rông phung biăp mâo boh tŭ dưn. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
