Mathais 16:13-17
Nqe cim:
“Ximoos Petus teb hais tias, “Koj yog tus Mexiyas uas yog Vajtswv tus uas muaj sia nyob tus Tub”( Mathais 16:16).
Lus nug rau sawvdaws xav:
– Thaum uas mus txog cheebtsam uas nyob ze lub nroog Xixaleyas Filipis, Tswv Yexus nug nws cov thwjtim txog yam dabtsi?
– Lawv teb tus Tswv li cas?
– Vim li cas Tswv Yexus nug cov thwjtim li ntawd?
– Teb Tswv Yexus lolus nug saib peb muaj kev ntseeg thiab tus cwjpwm li cas rau Nws?
Thaum uas ncaim pab neeg coob coob mus lawm, Tswv Yexus xav muaj ib lub sijhawm nyob ntsiag to los nrog Nws cov thwjtim sib tham. Yog li ntawd lawv thiaj mus rau tim cheebtsam Xixaleyas Filipis uas yog lwm haivneeg tebchaws. Nyob ntawd, Tswv Yexus thiaj nug Nws cov thwjtim hais tias, “Sawvdaws hais tias Neeg Leej Tub yog leejtwg?” cov thwjtim teb hais tias “Qee leej hais tias, nws yog Yauhas tus uas muab neeg ua kevcai raus dej, qee leej hais tias nws yog Eliyas, qee leej hais tias nws yog Yelemis lossis yog ib tug cev Vajtswv lus” (nqe 13-14). Tswv Yexus yeej paub tseeb lawv txhua tus kev xav, lawv tsuas saib Nws zoo li ib tug uas los kho kev rau tus Mexiyas uas lawv tabtom tos xwb. Tswv Yexus thiaj nug lolus no saib cov thwjtim txhua tus xav li cas txog Nws, “Nej ne, nej ho hais tias kuv yog leejtwg?” (nqe 15). Tswv Yexus xav kom lawv txhua tus nyias cim civ zeem paub nyias txog Tswv Yexus tsis txhob paub zoo li sawvdaws paub. Kev ntseeg yog txiav txim ntawm yus ntiag tug, tsis yog raws li lwm tus lossis pab neeg coob kev xav.
Timthawj Petus sawv cev cov thwjtim teb hais tias “Koj yog tus Mexiyas uas yog Vajtswv tus uas muaj sia nyob tus Tub” (nqe 16). Lolus “Khetos” yog lus Kilis txhais hais tias yog tus ua raug ywg roj, tus Cawmseej, tus Vajntxwv nyob mus ib txhis. Lolus Khetos hauv lus Kilis zoo thooj ib yam li lolus “Mexiyas” hauv lus Henplais, yog tus uas coglus tom Vajluskub qub uas cov Yixalayees tabtom tos. “Vajtswv tus uas muaj sia nyob tus Tub” txhais hais tias yog Vajtswv. Petus kev paub thiab lo lus teb tau Tswv Yexus qhuas hais tias nws yog tus hmoov zoo kawg! Thiab tej lus Petus teb tsis yog neeg qhia, tiamsis yog Vajtswv tus uas nyob saum ntuj ceebtsheej qhia rau Nws paub Tswv Yexus.
Niaj hnub nimno, peb txhua tus ntseeg puavleej ntsib Tswv Yexus lolus nug tseemceeb no, kom peb zeem paub Nws yog leejtwg nyob rau hauv peb. Qhov uas zeem paub Tswv Yexus yog leejtwg yuav pab tau peb muaj tus cwjpwm txiav txim siab ua neej rau tus Tswv uas yog lub neej yuav nyob mus ib txhis. Yog Tswv Yexus tsuas yog ib tug neeg tseemceeb, tus neeg zoo, ib tug thawjcoj… ces peb yeej ua neej tsis ncaj ncees thiab tsis tas siab rau Nws. Tiamsis yog peb zeem paub tseeb Tswv Yexus yog Vajtswv, peb yuav ua neej paub ua Nws tsaug thiab mloog Nws lus tas siab vim peb twb tau txais Nws txoj cawmdim lawm. Tswv Yexus lolus nug hais tias “Nej ne, nej ho hais tias kuv yog leejtwg?” yog ib lolus nug tseemceeb heev rau peb, yog tsis zeem paub peb yuav ua lubneej yuam kev thiab yuav raug txiav txim vim tsis cia Vajtswv ua Vajntxwv thiab ua tus Tswv rau peb lub neej thiab tsis ua lub neej pub rau Nws.
Thov Vajtswv,
Tswv Yexus, thov pab nyuam yaus zeem paub Koj yog Vajtswv thiab cia Koj ua Vajntxwv thiab tus Tswv rau nyuam yaus lub neej, kom nyuam yaus paub mloog Koj lus thiab ua neej pub rau Koj mus tas nyuam yaus sim neej. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Tswv Yexus puas yog “tus Mexiyas uas yog Vajtswv tus uas muaj sia nyob tus Tub” rau peb?
Nyeem Vajluskub hauv peb lub xyoos: Mathais 18
Kênh Youtube BHKTHN:
