Klei Aê Diê Blŭ: Y-Mathiơ 16:13-17
Êlan kliăng: “Y-Simôn Pêtrôs lŏ wĭt lač, “Ih jing Yang Krist, Anak Aê Diê hdĭp.” (Y-Mathiơ 16:16)
Klei êmuh ksiêm mĭn: Tơdah truh ti krĭng Sêsarê-Philip ya klei Khua Yang Yêsu êmuh leh phung ƀĭng kna ñu? Si diñu wĭt lač hŏng Khua Yang? Ya ngă Khua Yang Yêsu êmuh phung ƀĭng kna snăn? Wĭt lač klei êmuh anei si bi hmăi hlăm klei đăo leh anăn knuih drei hŏng Khua Yang?
Leh đuĕ mơ̆ng phung ƀuôn sang tui hlue Ñu, Khua Yang Yêsu čiăng pioh mnĭt mmông hjăn hŏng phung ƀĭng kna anăn Ñu hŏng digơ̆ nao ti krĭng Sêsarê-Philip jing sa krĭng lăn phung tue. Tinăn, Khua Yang Yêsu êmuh phung ƀĭng kna, “Hlei Anak Mnuih jing tui si arăng lač?” Leh anăn digơ̆ lač, “Đa đa lač Y-Yôhan Pô Ngă Ƀaptem, phung mkăn lač Y-Êli, leh anăn đa phung mkăn lač Y-Yêrêmi amâodah sa čô hlăm phung khua pô hưn êlâo” (êlan 13-14). Khua Yang thâo kluôm dhuôm klei arăng lač kơ Ñu, diñu knŏng dlăng Gơ̆ jing pô mprăp êlan kơ Yang Mêsi diñu dôk čang guôn đuč. Khua Yang êmuh snei čiăng pŏk êlan kơ klei mĭn phung ƀĭng kna, “Bi diih, hlei diih lač kâo jing?” (êlan 15). Ñu čiăng kơ digơ̆ thâo kral Khua Yang mdê hjăn pô amâo djŏ hlue si phung lu ôh. Klei đăo jing bi mklă hjăn pô dê, amâo hlue si klei mĭn phung mkăn amâodah phung lu ôh.
Khua ƀĭng kna Y-Pêtrôs bi ala kơ phung ƀĭng kna wĭt lač “Ih jing Yang Krist, Anak Aê Diê hdĭp” (êlan 16). “Yang Krist” jing boh blŭ Grĕk mblang jing Pô tŭ klei trôč êa ƀâo mngưi , Pô bi mtlaih, Mtao hlŏng lar; boh blŭ anei bi knar hŏng boh blŭ Hêbrơ “Yang Mêsi” ƀuăn leh mơ̆ng Klei Bi Mguôp Hđăp phung ƀuôn sang Israel dôk čang guôn. “Anak Aê Diê hdĭp” bi knar hŏng Aê Diê. Klei bi mklă leh anăn klei Khua ƀĭng kna Y-Pêtrôs lač mâo Khua Yang Yêsu bi mni jing mnuih mâo klei hơêč hmưi kyua amâo djŏ ñu thâo klei anei ôh ƀiădah kyua Aê Diê pŏk mngăt ai tiê ñu čiăng thâo kral kơ Khua Yang Yêsu.
Hruê anei, grăp čô phung đăo tuôm hŏng klei êmuh yuôm bhăn anei mơ̆ng Khua Yang Yêsu čiăng bi mklă hlei Khua Yang jing hŏng pô. Bruă bi mklă Khua Yang Yêsu jing hlei pô jing phŭn kơ klei bi mguôp drei hŏng Ñu, ya klei drei bi mĭn kơ Khua Yang srăng bi mklă knuih hdĭp pô hŏng Khua Yang ăt msĕ mơh klei hdĭp drei. Tơdah Khua Yang Yêsu knŏng jing sa čô mdê hjăn, sa čô mnuih mâo kơhưm, sa čô khua klei đăo… snăn drei srăng hdĭp hơăi mang, amâo sĭt suôr leh anăn amâo myơr jih ôh. Tơdah drei thâo Khua Yang Yêsu jing Aê Diê, drei srăng hdĭp hlăm klei hdơr knga kyua thâo kơ klei bi tui, leh anăn hlue gưt klei Ñu čiăng hŏng klei kluôm dhuôm. Klei Khua Yang Yêsu êmuh “Bi diih, hlei diih lač kâo jing?” hŏng phung drei klă sĭt yuôm bhăn snăk kyua klei bi mklă soh drei srăng hdĭp soh leh anăn tŭ klei bi kmhal kơ phung amâo mpŭ kơ Khua Yang jing Mtao, jing Khua kơ klei hdĭp pô leh anăn amâo hdĭp sa klei hdĭp myơr jih kơ Khua Yang.
Khua Yang Yêsu dôk jing “Yang Krist, Anak Aê Diê hdĭp” kơ drei mơ̆?
Wah lač: Ơ Khua Yang, akâo kơ Ih đru kâo bi mklă nanao Khua Yang jing Aê Diê kơ klei hdĭp kâo čiăng kâo hdĭp klei hdĭp hlue gưt leh anăn mpŭ mni Khua Yang. Akâo kơ klei hdĭp kâo bi êdah nanao kơ Ih Pô kơ phung riêng gah. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Mathiơ 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.coma
Kênh Youtube BHKTHN:
