Zoo Siab Thiab Ua Rau Zoo Siab – 22/12/2022 

607

 

 

Lukas 1:39-47

Nqe cim:

Thaum Elixanpes hnov dheev Malis lub suab hais rau nws, ces nws tus menyuam hauv plab txawm nti cuag dabtsi, thiab Elixanpes puv npo Vaj Ntsujplig tus Dawbhuv” (Lukas 1:41).

 

Lus nug rau sawvdaws xav:

  • Hauv ntu Vajluskub no muaj pestsawg tus neeg zoo siab?
  • Vim li cas lawv zoo siab?
  • Lawv qhov kev zoo siab muaj qhov twg zoo thooj tib yam?
  • Peb zoo siab yam dabtsi rau lub caij ua koobtsheej nco txog Yexus los yug xyoo no?
  • Peb txhua tus pub txojkev zoo siab ntawd rau lwm tus los ntawm tej lus thiab tej haujlwm peb ua li cas?

Tom qab uas timtswv los qhia hais tias nws yuav xeeb Vajtswv tus Tub, Malis tsis yog raug yuam kom ua raws, txhawj ntshai, nkaum twjywm hauv tsev, tiamsis nws “txawm sawv kev thiab rau siab ntso mus txog ntawm ib lub nroog uas nyob saum laj roob hauv lub xeev Yudas, nws mus rau hauv Xakhaliyas tsev thiab hais noj qab nyob zoo rau Elixanpes” (nqe 39-40). Malis mus saib nws tus phauj uas twb xeeb tub lawm thiab. Qhov kev sib ntsib zaum no ua rau peb tug tibneeg muaj kev zoo siab heev thiab muaj lus qhuas Vajtswv.

Tim ib, Elixanpes zeem paub nws yog tus tau koob hmoov vim Malis uas yog Yexus niam tuaj saib nws (nqe 41-42). Vim “puv npo Vaj Ntsujplig tus Dawbhuv(nqe 41), Elixanpes zeem paub tus menyuam hauv Malis plab yog Vajtswv tus Tub. Nws hais rau Malis hais tias, “koj yog tus uas tau koob hmoov ntau tshaj plaws txhua tus pojniam huv tibsithaum ntseeg thiab ua raws li tus Tswv hais (nqe 42). Tim ob, tus menyuam nyob hauv Elixanpes plab zoo siab. Nqe lus “nws tus menyuam hauv plab txawm nti cuag dabtsihais ob zaug hauv ntu Vajluskub no (nqe 41, 44). Tej zaum vim yog puv npo Vaj Ntsujplig (Lukas 1:15) tus menyuam uas yog Yauhas Npatitus muaj kev zoo siab rau qhov Tswv Yexus los ua neeg xeeb hauv Malis plab. Txojkev zoo siab ntawd nrog nraim Yauhas lub neej thaum nws ua haujlwm (Yauhas 3:29-30). Tim peb, Malis zoo siab thaum hnov Elixanpes tej lus hais thiab txhawb zog. Ntawm qhov uas mus saib cov txheebze, nws tau txais tej lus txhawb zog, muaj kev zoo siab heev thiab qhov kev zoo siab ntawd ua rau Malis sau zaj nkauj qhuas tus Tswv (nqe 46-55), txawm yog tes haujlwm nws tau txais muaj kev nyuaj.

Txojkev zoo siab ntawm Elixanpe, tus menyuam Yauhas Npatitus thiab Malis pib muaj ntawm qhov uas Malis mus saib Elixanpes, tiamsis qhov tseemceeb tshaj yog txojkev zoo siab ntawd los ntawm tus menyuam hauv Malis plab. Vim tus menyuam ntawd, Elixanpes qhia paub tej uas tsis tau muaj neeg paub thiab nyuaj ntseeg. Vim tus menyuam ntawd, Yauhas zoo siab nti cuag dabtsi hauv leejniam plab. Vim tus menyuam ntawd, Malis zeem paub nws yog tus tau koob hmoov vim tus Tswv siv nws.

Lub koobtsheej nco txog Yexus los yug xyoo no, peb muaj ntau lub sijhawm txoos ua ke, sib ntsib, noj haus zoo siab. Tiamsis qhov tseemceeb uas cheemtsum nco ntsoov yog tej lus uas peb ib leeg hais rau ib leeg yuav tsum yog pib ntawm lub hauvpaus muaj tus Tswv nyob hauv peb lub neej. Txojkev zoo siab Yexus los yug yuav ntxiv rau peb thaum peb faib pub yam uas tus Tswv qhia rau peb thiab txhawb lwm tus nrog peb qhuas tus Tswv.

Thov Vajtswv,

Tus Tswv, thov Koj cia zaj uas hais txog Yexus los yug ua neeg yog zaj lus uas nyuam yaus tham txhua zaus. Txojkev zoo siab cawm dim uas Koj pub, nyuam yaus yuav qhia tawm rau lub koobtsheej xyoo no. Amees.

Peb puas coj tau txojkev txhawb zog mus rau lwm tus thiab puas ua rau lawv muaj lus qhuas tus Tswv rau lub koobtsheej nco txog Yexus los yug xyoo no?

 Nyeem Vajluskub hauv peb lub xyoos: Yelemis 43:1-44:6

Kênh Youtube BHKTHN:

https://www.youtube.com/c/bhkthn

Bài trướcTruyện ngắn: Mùa Noel Đáng Nhớ
Bài tiếp theoHơ̆k Mơak Leh Anăn Ba Klei Mơak – 22/12/2022