Klei Aê Diê Blŭ: Y‑Luk 1:39-47
Êlan kliăng: “Tơdah H’Êlisabet hmư̆ klei H’Mari kkuh, anak hlăm tian gơ̆ kpư̆, leh anăn H’Êlisabet bŏ hŏng Yang Mngăt Jăk” (Y‑Luk 1:41)
Klei êmuh ksiêm mĭn: Hlăm trăn Klei Aê Diê Blŭ anei mâo dŭm čô hơ̆k mơak? Ya ngă diñu mơak? Ya klei msĕ hlăm klei diñu mơak? Ya klei drei mơak hlăm yan Noel thŭn anei? Si drei kah mbha klei mơak anăn hŏng klei blŭ leh anăn bruă ngă kơ pô mkăn?
Leh hmư̆ dĭng buăl jăk hưn srăng ba tian Anak Aê Diê, mniê êra H’Mari amâo hlue gưt hŏng klei mgô̆, huĭ hyưt, mdăp hlăm adŭ ôh, ƀiădah “kgŭ nao hŏng klei ruăt kơ sa boh ƀuôn hlăm čar kngư Yuđa. Ñu mŭt sang Y‑Sakari leh anăn kkuh kơ H’Êlisabet” (êlan 39-40). Ñu nao čhưn hŏng găp djuê, ăt dôk ba tian êlâo kơ pô. Klei nao čhưn anăn ba klei mơak leh anăn klei bi mni kơ Aê Diê kơ tlâo čô.
Tal sa, H’Êlisabet ƀuh pô yuôm bhăn snăk dưi mâo “amĭ Khua Yang” hriê čhưn (êlan 41-42). Kyua klei “bŏ hŏng Yang Mngăt Jăk” (êlan 41), ñu thâo hđeh hlăm tian H’Mari jing Anăn Aê Diê. Ñu bi mklă H’Mari jing mnuih “mâo klei jăk jĭn hĭn kơ phung mniê mkăn” leh đăo leh anăn tŭ mă bruă Aê Diê jao (êlan 42). Tal dua, hđeh hlăm tian H’Êlisabet hơ̆k mơak. Pruê̆ blŭ “anak hlăm tian gơ̆ kpư̆” lŏ mñă dua blư̆ hlăm trăn Klei Aê Diê Blŭ anei (êlan 41,44). Năng ai ăt dưi bŏ hŏng Yang Mngăt Jăk mơ̆ng hlăk anăn (Y‑Luk 1:15) anăn hđeh hlăm tian amĭ Y‑Yôhan Pô Ngă Ƀaptem êlâo kơ amĭ kkiêng ăt hơ̆k mơak kơ klei Khua Yang Yêsu hlăm tian H’Mari. Klei mơak anăn tui hlue ñu hlăm jih bruă ñu ngă ti lăn (Y‑Yôhan 3:29-30). Tal tlâo, mniê êra H’Mari mơak leh hmư̆ klei H’Êlisabet bi mklă leh anăn mđĭ ai. Mơ̆ng bruă ñu čŏng nao čhưn hŏng găp djuê pô, leh anăn ñu lŏ mâo klei mđĭ ai prŏng snăk, tơl klei mơak anăn jing klei mmuñ bi mni kơ Aê Diê dưi pioh lă lar (êlan 46-55), wăt tơdah bruă Aê Diê jao kơ ñu bŏ hŏng klei lông dlăng, dleh dlan.
H’Êlisabet, hđeh hlăm tian amĭ Y‑Yôhan Pô Ngă Ƀaptem leh anăn H’Mari hơ̆k mơak mơ̆ng klei H’Mari nao čhưn, ƀiădah yuôm bhăn hĭn, klei mơak anăn mguôp hŏng bruă mâo hđeh điêt hlăm tian H’Mari. Kyua hđeh điêt anăn H’Êlisabet lač klei yuôm hgăm leh anăn dleh đăo. Kyua hđeh điêt anăn, Y‑Yôhan kpư̆ hlăm tian amĭ. Kyua hđeh điêt anăn, H’Mari thâo pô mâo klei jăk mơak kyua Aê Diê yua.
Yan Noel, drei mâo lu klei bi kƀĭn, lu klei bi tuôm, klei huă mnăm. Ƀiădah klei yuôm bhăn hĭn brei hdơr jing ya klei drei bi blŭ hrăm brei kčưm mơ̆ng klei mâo Aê Diê hlăm klei hdĭp drei. Klei mơak Noel srăng dưi mâo lu hĭn sĭt drei kah mbha klei Aê Diê bi êdah kơ pô leh anăn mđĭ ai phung mkăn hrăm mbĭt bi mni kơ Aê Diê.
Drei ba klei mđĭ ai kơ pô mkăn leh anăn đru digơ̆ mâo thiăm hlăm klei bi mni kơ Aê Diê hlăm yan Noel mơ̆?
Wah lač: Ơ Khua Yang, akâo kơ klei mơak kơ klei Pô Bi Mtlaih Trŭn Hriê jing akŏ kơ klei kâo bi blŭ hrăm. Akâo kơ klei mơak mâo klei Ih bi mtlaih, Ih yua jing klei kâo kah mbha čiăng bi mđĭ ai hlăm yan Klei Khăp anei.
Dlăng Klei Aê Diê Blŭ hlăm tlâo thŭn: Y‑Yêrêmi 43:1–44:6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
