Zoo Siab Hauv Lub Xyoo Tshiab – 24/1/2023

645

 

 

Filipis 4:4 

4 Nej yuav tsum niaj hnub zoo siab, rau qhov nej twb nrog tus Tswv koom ib txojsia lawm. Kuv rov hais ib los ntxiv hais tias: nej cia li zoo siab!

 

Lus nug rau sawvdaws xav:

  • Timthawj Paulus ntuas cov ntseeg hauv nroog Filipis yam dabtsi?
  • Qhov twg ua rau cov ntseeg Yexus “niaj hnub” zoo siab?
  • Vim licas Timthawj Paulus hais mus hais los lo lus “cia li zoo siab”?
  • Peb cheemtsum ua dabtsi kom niaj hnub muaj kev zoo siab hauv lub xyoo

tshiab?

Puas muaj ib zaug twg uas koj tau mus ncig xyuas txhawb ib tug neeg tabtom raug kev txomnyem nyuaj siab lub zog, tiamsis lawv tseem yog tus uas txhawb koj lub zog thiab ua rau koj muaj kev zoo siab? Nyob hauv tsev lojcuj, Timthawj Paulus sau ntawv xa mus rau cov ntseeg nyob hauv lub nroog Filipis, yog lub Pawg Ntseeg muaj kev hlub thiab hmov tshua txog Paulus. Tomqab uas hais lus noj qab nyob zoo, Paulus hais tias txhua zaus uas nws xav txog cov ntseeg hauv nroog Filipis, ua rau nws zoo siab rau lawv heev (Filipis 1:3-4). Lo lus“zoo siab” hais mus hais los ntau zaus hauv tsab ntawv Filipis (Filipis 2:1-2; 28-29; 3:1; 4:1, 4). Tsuas hais hauv nqe 4 hnub no xwb, Timthawj Paulus twb hais ob zaug lo lus “zoo siab”. Tiamsis, tsis yog nws tsuas hais kom “cia li zoo siab” xwb, nws tseem hais ntxiv ob lo lus tseemceeb: “nrog tus Tswv” thiab “niaj hnub”.

Yog hais tias lo lus “nrog tus Tswv” qhia paub txog qhov uas ua rau muaj kev zoo siab, ces lo lus “niaj hnub” qhia paub txog lub sijhawm ntawm txojkev zoo siab. Qhov uas muaj kev zoo siab yog muaj “tus Tswv”, yog qhov uas tus ntseeg Yexus niaj hnub tau nyob hauv tus Tswv. Nyob hauv tus Tswv, peb yuav ntsia txhua yam tau lossis poob raws li tus Tswv seem. Peb poob tagnrho txhua yam tiamsis peb yuav tsis muaj ib hnub poob Vajtswv, yog li ntawd, peb muaj kev zoo siab mus li. Nyob rau lub tsamthawj muaj tsis taus kev zoo siab, tsuas pom kev nyuaj siab, tu siab, los cov ntseeg Yexus txojkev zoo siab yeej nyob mus li. Hauv Yauhas 16:22, Tswv Yexus hais tias, Txojkev zoo siab ntawd tsis muaj leejtwg txeeb tau ntawm nej mus li.

Tiamsis vim licas Timthawj Paulus pheej hais mus hais los cov lus “cia li zoo siab”? Tej zaum vim peb tibneeg txojkev xav pheej muaj kev txhawj thiab nyuaj siab, rau qhov peb txojkev zoo siab tsis ruaj khov. Yog li ntawd, “niaj hnub zoo siab hauv tus Tswv” yog yam uas peb cheemtsum yuav tau hais, kawm, ua kom swm.

Ib yam tsis zoo pheej tshwmsim yog qhov uas qee zaug peb tiv taus tej kev sim siab, nyuaj siab loj kawg hauv lub neej tiamsis ho pheej chim, npautaws, txhawj rau tej nyuag yam me me. Peb ua neej nyob hnub no tiamsis pheej xav txog tej kev nyuaj siab kaj ntug, tiamsis twb tsis paub hais tias xyov tagkis…txojsia yuav zoo licas(Yakaunpaus 4:14a). Yog li ntawd, qhov uas tus Tswv xav kom peb ua rau lub xyoo tshiab no yog cia li txaus siab hauv tus Tswv txhua hnub, niaj hnub zoo siab hauv tus Tswv, tsis muaj leejtwg yuav txeeb tau qhov no ntawm peb mus li.

 

Thov Vajtswv

Tus Tswv, nyuam yaus ua Koj tsaug vim txojkev zoo siab Koj pub nyob mus ibtxhis, thov Koj cia nyuam yaus niaj hnub nyob hauv, ntsia txhua yam raws Koj xav kom nyuam yaus niaj hnub muaj kev zoo siab hauv lub xyoo tshiab mus li. Amees.

 

Peb puas niaj hnub ntuas yus tus kheej kom tsis hnov qab txojkev zoo siab ibtxhis hauv tus Tswv?

 

Nyeem Vajluskub hauv peb lub xyoo: Exekees 17

Kênh Youtube BHKTHN:

https://www.youtube.com/c/bhkthn

Bài trướcKhông Phải “Đã” Mà “Đang” – 23/1/2023
Bài tiếp theoHơ̆k Mơak Hlăm Thŭn Mrâo – 24/1/2023