Klei Aê Diê Blŭ: Philip 4:4
Êlan kliăng: “Mơak bĕ nanao hlăm Khua Yang. Kâo lŏ mñă mơh, mơak bĕ.” (Philip 4:4)
Klei êmuh ksiêm mĭn: Ya klei Khua ƀĭng kna Y‑Pôl mtă kơ phung đăo ti Philip? Ya klei đru kơ phung đăo dưi hơ̆k mơak “nanao”? Ya ngă Khua ƀĭng kna Y‑Pôl lŏ mñă wĭt klei mtă “mơak bĕ”? Ya klei brei drei ngă čiăng mơak nanao hlăm thŭn bhang mrâo?
Diih tuôm nao čuă mơ̆ sa čô dôk tuôm hŏng klei truh prŏng snăk čiăng mđĭ ai digơ̆, ƀiădah digơ̆ lŏ jing pô mđĭ ai leh anăn bi mơak kơ drei? Mơ̆ng sang mnă, Khua ƀĭng kna Y‑Pôl čih leh hră kơ phung đăo ti Philip, sa Sang Aê Diê bŏ hŏng klei khăp leh anăn uêñ mđing snăk kơ ñu. Mơ̆ng dŭm êlan tal êlâo leh kkuh čhưn, ñu lač leh grăp blư̆ mĭn kơ phung đăo ti ƀuôn Philip, ñu buh hơ̆k mơak kơ digơ̆ (Philip 1:3-4). Boh blŭ “mơak” ăt dưi mñă lu blư̆ hlăm jih hră ñu čih (Philip 2:1-2; 28-29; 3:1; 4:1, 4). Knŏng hlăm sa êlan 4 hruê anei, Khua ƀĭng kna Y‑Pôl dua blư̆ mtă kơ phung đăo ti anei “mơak bĕ”. Khădah snăn, amâo djŏ knŏng mtă “mơak bĕ” ôh, ñu lŏ thiăm dua boh blŭ yuôm bhăn hlăm klei mtă anăn: “hlăm Khua Yang” leh anăn “nanao”.
Tơdah boh blŭ “hlăm Khua Yang” brei ƀuh phŭn agha kơ klei mơak, snăn “nanao” brei ƀuh klei mơak phung đăo kơ Krist dôk lă lar. Phŭn agha klei mơak snăn jing “Khua Yang”, jing bruă phung đăo dôk nanao hlăm klei Khua Yang kiă kriê. Dôk hlăm Khua Yang, drei srăng dlăng djăp mta klei mâo amâodah hơăi hlăm hnơ̆ng čuăn Khua Yang. Drei srăng luč jih jang ƀiădah amâo luč ôh Aê Diê, kyua anăn, klei mơak drei dưi răng kriê nanao. Hlăm boh klei msĕ si amâo dưi mơak ôh, hlăm boh klei msĕ si amâo mâo ôh ya mta êngao kơ klei ruă knap, rŭng răng, snăn klei mơak phung đăo ăt adôk. Hlăm Y‑Yôhan 16:22, Khua Yang Yêsu lač “arăng amâo dưi mă ôh klei hơ̆k mơak anăn mơ̆ng diih.”
Ƀiădah ya ngă Khua ƀĭng kna Y‑Pôl lŏ mñă wĭt mñă nao klei blŭ “Mơak bĕ hlăm Khua Yang”? Năng ai kyua anak mnuih drei khăng rŭng răng leh anăn ênguôt hnĭng kyua klei mơak drei khăng dlăng kơ boh klei ti êngao. Kyua anăn, “mơak nanao hlăm Khua Yang” jing klei brei arăng mñă kơ drei, brei drei hriăm, brei drei bi mưng.
Sa klei mklăk khăng mâo jing tăp năng drei dưi tŭ djăp klei lông dlăng, ênguôt hnĭng prŏng snăk hlăm klei hdĭp ƀiădah lŏ đĭ ai, ngêñ ƀêñ, rŭng răng kyua klei điêt dhiêt. Drei hdĭp hruê anei ƀiădah lŏ dưm ti mra pô klei ktrŏ hruê mgi, ƀiădah “diih amâo thâo ôh ya klei srăng truh mgi” (Y‑Yakơ 4:14a). Kyua anăn, ai tiê Khua Yang čiăng drei mâo hlăm thŭn mrâo jing brei dôk hlăm Khua Yang grăp hruê, mơak nanao hŏng klei mơak hlăm Khua Yang, anăn jing klei amâo mâo pô dưi tlĕ mă ôh mơ̆ng drei.
Drei khăng mñă kơ pô đăm wơr ôh dôk hlăm klei mơak lă lar hlăm Khua Yang mơ̆?
Wal lač: Ơ Khua Yang, kâo bi mni kơ Ih kyua klei mơak hlăm Ih jing dôk lă lar, akâo kơ Ih đru kâo dôk hlăm klei Khua Yang kiă kriê, dlăng djăp mta bruă hlăm klei Khua Yang dlăng bŏ hŏng čang hmăng čiăng kâo dưi mơak hlăm Khua Yang nanao hlăm jih thŭn mrâo anei.
Dlăng Klei Aê Diê Blŭ hlăm tlâo thŭn: Y‑Êsêkiêl 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
