Klei Aê Diê Blŭ: Y‑Tit 3:2-5
Êlan kliăng: “Kyuadah mphŭn dô drei pô jing mluk, amâo thâo gưt asăp ôh, klah đuĕ leh, jing hlŭn kơ djăp mta klei kđeh tluh leh anăn klei kđeh čiăng, drei hdĭp hlăm klei jhat ƀai leh anăn hlăm klei tluh, arăng bi êmut kơ drei leh anăn drei bi êmut hdơ̆ng drei.” (Y‑Tit 3:3)
Klei êmuh ksiêm mĭn: Ya dua mta klei yuôm bhăn brei phung đăo kơ Khua Yang thâo čiăng hdĭp djŏ hlue si Klei Aê Diê Blŭ mtô? Si klei thâo anăn đru drei hdĭp hŏng grăp čô mnuih? Si drei hdĭp čiăng năng hŏng ai tiê thâo pap mơ̆ng Aê Diê?
Phung đăo kơ Khua Yang brei hdĭp bi guh kơang Anăn Ñu hŏng bruă jăk, thâo pap kơ phung mkăn wăt phung amâo đăo kyua êlâo dih drei ăt tuôm hdĭp msĕ snăn. Knŏng tơdah jing phung đăo kơ Khua Yang kơh drei thâo klei “mluk” jing klei kƀah thâo săng hlăm mngăt mơ̆ng pô hruê êlâo. Klei thâo săng anăn ngă kơ drei tui tiŏ nanao klei mơak klei hdĭp anei, hiu duah klei soh jhat, tă tăn hlăm lu mta klei knhông, jing hlŭn kơ klei soh. Klei hdĭp anăn năng kơ arăng bi êmut, leh anăn čŏng drei ăt hdĭp hlăm klei bi êmut hdơ̆ng pô mơh. Kyua anăn, hlăm klei jing leh phung đăo kơ Khua Yang, mâo leh klei thâo săng hlăm mngăt, tơdah dlăng hlăm klei hdĭp phung riêng gah ka thâo kral Khua Yang, drei đăm bi êdah ôh knuih mưč mač leh anăn phat kđi. Anăn jing klei tal êlâo brei drei thâo čiăng dưi hdĭp djŏ hŏng Klei Aê Diê Blŭ mtô hlăm klei hdĭp hdơ̆ng pô.
Klei tal dua brei thâo jing wăt tơdah drei mluk dưn, klei soh snăn dưn ƀiădah Aê Diê ăt bi êdah klei pap Ñu hŏng grăp čô mnuih hlăm bruă brei Anak Ñu Pô Mâo Knŏng Sa Čô jing Khua Yang Yêsu Krist hriê ti lăn ala čiăng bi mtlaih drei mơ̆ng klei tluh leh anăn klei soh, “Ƀiădah tơdah klei jăk leh anăn klei khăp Aê Diê, Pô Bi Mtlaih drei, bi êdah leh…” (êlan 4). Aê Diê bi mtlaih drei “amâo djŏ kyua bruă kpă drei ngă leh ôh, ƀiădah tui si klei Ñu pô pap,…” (êlan 5). Snăn, klei pap Aê Diê dưi bi êdah hlue si klei pap Ñu čiăng bi mtlaih phung amâo năng leh anăn bi mlih jing phung hdĭp năng kơ Ñu. Đăm ngă mgao ôh kyua drei dưi bi mtlaih kluôm dhuôm kyua klei pap leh anăn klei Khua Yang pap brei hŏng phung mluk msĕ si drei.
Tơdah jing leh phung đăo kơ Khua Yang, drei thâo klei soh pô hlăm knuih hdĭp êlâo dih, leh anăn thâo klei pap êbeh dlai Aê Diê, snăn brei hdĭp năng hŏng klei pap Khua Yang. Jing anak Aê Diê, brei drei mâo nanao knuih bi ti gŭ pô, luă gŭ êdu êun hdơ̆ng pô leh anăn ñĕ kơ klei hdĭp “mluk” hlăk êlâo. Đăm bi kdơ̆ng ôh, đăm lŏ dơ̆ng lĕ hlăm klei mplư ôh, đăm dôk nanao hlăm klei soh ngă knhông, klei măk ƀai, klei ră.
Drei hdĭp năng hŏng klei thâo kral pô leh anăn klei pap Aê Diê leh mơ̆ ka?
Wah lač: Ơ Aê Diê klei khăp, klei pap. Bi mni kơ Ih kyua bi mtlaih leh kâo mơ̆ng klei soh. Akâo kơ Ih đru kâo thâo dưi jing anak Ih jing kyua klei pap Aê Diê brei. Akâo kơ Ih đru kâo mâo klei mđing uêñ, thâo khăp leh anăn ba phung dôk rai luč hriê kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Hriêng 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
