Yakơ 4:1-3
“Yua kơ kiơ iĕm hil areh pơjah pơjăng dih băl? Yua kơ jơhngơ̆m iĕm hưch kơ tơdrong âu tơdrong to, jing pơtuah kuă ăn iĕm kiơ̆ tơdrong ‘Bok Kei-Dei hăm trŏ?” (Yakơ 4:1)
Nơ̆r jet tơchĕng pơwao:
– ‘Bok Yakơ tơbăt ăn lu bơngai lui oei tơ’bơ̆p tơdrong kiơ?
– Yua kơ kiơ lu sư oei tơ’bơ̆p tơdrong noh?
– Bơ̆n athei pơm kiơ wă kơ tŭk lê̆ dôm tơdrong pơm kơ bơ̆n jing tơhil areh dih băl?
Lơ bơngai tơchĕng khan ‘brư̆ kơ khei ‘brư̆ kơ sơnăm kon bơngai bơ̆n rai hơgei gơh pơm tơdrong âu gơh pơm tơdrong to, lei tơdrong arih kon bơngai bơ̆n rai wơ̆ tŏk, dôm tơmam kăl yua gô đei tôm mah păng mă bu bu gô đei tơdrong hiôk hian. Mălei tơpă dang ei bơ̆n ‘bôh phara. Lăm dôm sơnăm adrol ki, lăm teh đak đei ’bôh tơdrong hil areh pơjah pơjăng dih băl, đei tơdrong rŭng răng. Đei tơdrong tơblah wang oei pơtrơp păng lanh rai să pơm kơ lơ bơngai hiong răm krưp dêh. Yua kơ kiơ lăm teh đak dang ei oei tơblah hơnơ̆ng ưh kơ pơdơh?
Bơ̆n lăng lăng khul bơngai lui blŭng a sơ̆. Đơ̆ng rŏng kơ tơblang ăn kơ lu bơngai lui băt gah tơdrong hơgei ‘Bok Kei-Dei tơ’bôh ăn kơ lu bơngai ngôi đĕch adrĕch ngôi hiôk sư wă pơhiôk đe ling lang, ưh kơ layơ areh kơ bôl buăl, sư pơm tôm tơdrong ‘lơ̆ng bôl buăl ‘beh kơ sư, thoi noh na đĭ đăng kơ bôl buăl hơdai wang băt kơ pơm ‘lơ̆ng dih băl (Yakơ 3:18), lei na ‘bok Yakơ tơ’bôh ăn tơdrong đei tơpă ưh kơ thoi noh. Trŏ sư arih lăm tơdrong hiôk rơnŭk, lu bơngai lui kơplah noh sơ̆ oei đei tơdrong “hil areh pơjah pơjăng dih băl” (trong 1). Mă khan nơ̆r ‘nâu wă pơma kơ tơdrong tơblah wang, hrang tơ’bet ră, mălei ‘bok Yakơ wă pơma lăm âu ưh kơ trŏ kơ pơma gah tơdrong tơblah băl ôh, ‘nâu wă pơma gah tơdrong hil areh pơjah pơjăng dih băl oei đei lăm lu bơngai lui.
Yua kơ kiơ na jing đei tơdrong pơjah pơjăng băl noh? Mă minh, yua kơ “jơhngơ̆m hưch kơ tơdrong âu tơdrong to…” (trong 1). Đơ̆ng lăm jơhngơ̆m ưh kơ gơh bơwei na gô jing pơm ăn kơ rim ‘nu ưh kơ hơđơ̆ng. Kơlih kơ akâu rŭng răng, đơ̆ng noh pơjah pơjăng hăm bơngai nai. Mă ‘bar, yua kơ đơ̆ng hưch kơ tơdrong âu, ‘nhĕng kơ tơdrong to, mălei ưh kơ đei kơ iĕm na iĕm jing tơhil areh dih băl, tơgar sa băl, truh tơ wă pơlôch dih băl mơ̆n” (trong 2). Mă pêng, yua kơ wă yua kơ akâu kơdih đĕch. “Phŏ iĕm kư̆m krao khan apinh ră, mă iĕm apinh ưh kơ trŏ kơ tơdrong Sư wă, na Sư ưh kơ ăn. Iĕm apinh tơdrong wă yua kơ akâu iĕm kơdih đĕch” (Trong 3).
Layơ lăm bơ̆n oei đei tơdrong wă yua kơ akâu kơdih đĕch, păng dôm tơdrong noh ưh kơ đei kơ bơ̆n, ưh kơ gơh bơwei, lei gô ba truh tơ tơdrong hil areh pơjah pơjăng dih băl lăm tơpôl. Pơma să ‘biơ̆, layơ bơ̆n oei arih wă pơyua akâu kơdih đĕch, arih wă pơhiôk kơdih bơ̆n, lei ưh kơ đei layơ gơh mơn đei hiôk hian lăm bơ̆n kơdih păng lăm kon pơlei mă bơ̆n arih. Wă kơ weh đơ̆ng tơdrong hil areh dih băl păng gơh đei hiôk hian, rim ‘nu bơ̆n athei “arih huay kơ pơyua akâu bơ̆n kơdih, sư wă kơ bơ̆n arih yua kơ tơdrong jang Sư” (II Kôrintô 5:15), păng athei “pơm ‘lơ̆ng ling lang thoi bơngai dim jô̆ kơ đe bơngai ‘lơ̆ng hloh kơ iĕm” (Philip 2:3).
Ơ Kră Yang, inh băt tơpă dôm tơdrong kiơ̆ kơ jơhngơ̆m ‘maih wă kơdih pơm kơ inh ưh kơ layơ wă đei tơdrong hiôk hian lăm inh păng hăm bôl buăl. Apinh Ih mơnat ăn kơ inh păng apinh Yang Bơhngol ‘Lơ̆ng Ih tơgŭm inh kĕ hlôi đơ̆ng tơdrong arih kiơ̆ kơ kơdih, arih pơyơ̆r ư-ang kơ Ih. Yua anăn Kră Yang Yêsu Krist, Amen.
Bơ̆n oei arih wă pơyua kơ akâu bơ̆n kơdih dah mă arih pơyua kơ Kră Yang păng đĭ đăng bơngai?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 24
Kênh Youtube BHKTHN:
