Tes Haujlwm 8:1-5
Nqe cim:
“Koj yuav tsum muab siab rau qhia Vajtswv Txojlus, tsis hais lub sijhawm twg los koj yuav tsum qhia. Koj yuav tsum ua siab ntev qhuab qhia.” (II Timautes 4:2a)
Lus nug rau sawvdaws xav:
– Thawj Pawg Ntseeg raug tsimtxom zoo li cas?
– Cov ntseeg khiav ri sua mus rau qhov twg thiab lawv ua dabtsi?
– Nimno peb kawm tau cov ntseeg xubthawj tus qauv zoo li cas?
Tom qab uas Xatefanaus tuag (Tes Haujlwm 7:56) thiab muaj tej kev tsimtxom cov ntseeg Yexus, xav hais tias cov ntseeg yuav qaug zog rau txojkev tawm mus qhia Txojmoo Zoo. Tiamsis tsis yog li, lawv hajyam muaj siv zog qhia ntxiv. Ntawm qhov kev tsimtxom cov ntseeg no ua rau lawv yim huab kub siab rau kev qhia Txojmoo Zoo ntau dua mus rau txhua qhov chaw uas lawv mus txog (nqe 4).
Tes Haujlwm txij tshooj 4 mus txog tshooj 7 hais txog cov ntseeg Yexus xubthawj nyob hauv lub nroog Yeluxalees ntsib kev tsimtxom heev zuj zus. Thawj qhov yog tej lus hem, txuas ntxiv yog ntaus, nplawm, tom qab ntawd yog txiav txim rau Xatefanaus, thiab ntxiv yog “raug tsimtxom heev.” Tsis yog tas qhov ntawd, Pawg Ntseeg tseem raug Xaulus ntes coj mus tsimtxom thiab kaw hauv tsev lojcuj (nqe 1-3). Txawm yog li ntawd los, twb yog los ntawm qhov kev nyuaj no haj yam txhawb tau tes haujlwm qhia Txojmoo Zoo ntawm cov ntseeg uas raug khiav ri mus nyob rau txhua qhov chaw thoob ntiajteb. Tus Tswv nthuav dav Nws lub Tebchaws los ntawm qhov uas cov yeebncuab kev tawmtsam.
Ntu Vajluskub no yog tus Tswv tej lus muaj tiav hauv Tes Haujlwm 1:8 uas yog ua timkhawv qhia tus Tswv zaj “hauv lub nroog Yeluxalees, xeev Yudas, xeev Xamalis, mus txog qab ntuj kawg.” Lub homphiaj tus Tswv cawm neeg yeej loj hlob. Txawm yog cov ntseeg lub sijhawm ntawd tsis pom tus Tswv lub homphiaj uas cia lawv raug txomnyem, los tus Tswv lub homphiaj yeej tseem ua haujlwm thiab Txojmoo Zoo yeej loj hlob. Rau qhov “cov ntseeg uas khiav mus nyob rau txhua qhov chaw, lawv kuj mus qhia Txojmoo Zoo rau qhov ntawd.” (nqe 4).
Qhov uas Pawg Ntseeg Yeluxalees raug tsimtxom thiab tawg ri sua yog ib lub zoo sijhawm mus qhia Txojmoo Zoo thiab cawm ntau leej los ntseeg tus Tswv. Kev tsimtxom yog tej kev txhaum ntawm cov neeg siab phem uas ntxub tus Tswv, tiamsis Vajtswv tso cai tshwm muaj tej no thiab Nws siv tej kev tsimtxom no los nthuav dav Nws lub Tebchaws. Qhov no ua rau cov ntseeg muaj lub siab tawv rau kev qhia Vajtswv Txojlus thiab kuj ua kev zoo siab rau cov uas txais yuav tus Tswv Txojmoo Zoo.
Nimno, kev tsimtxom Txojmoo Zoo tseem tabtom muaj nyob ntau qhov hauv ntiajteb no. Tiamsis vim ntseeg tus Tswv qhov kev uas sawv hauv qhov tuag los, Vajtswv haivneeg muaj lub siab tawv tiv dhau tej kev sim siab tawm mus qhia Txojmoo Zoo txawm yog raug txomnyem thiab tau zoo. Vajtswv yeej tswj rawv thiab muaj hwjchim kav txhua yam, Nws txojkev npaj tsis hloov. Thaum cov ntseeg muaj lub siab xav tias yim raug tsimtxom, Txojmoo Zoo yim tau qhia ntxiv mus ces Txojmoo Zoo yuav ntxov tseb mus thoob qab ntuj.
Thov Vajtswv,
Tus Tswv, thov Koj pub Vaj Ntsujplig lub hwjchim thiab lub siab tawv qhawv rau nyuam yaus zoo ib yam li cov ntseeg xubthawj, lawv tiv dhau sim siab, ncaj ncees qhia Txojmoo Zoo cawm neeg; txawm yog yuav tau zoo thiab txomnyem. Nyuam yaus tuav Tswv Yexus lub npe thov, Amees.
Thaum ntsib kev tsimtxom, txomnyem, sim siab, peb yuav siv zog qhia Moo Zoo los yog peb yuav nres cia?
Nyeem Vajluskub hauv peb lub xyoo: I Xamuyees 5
Kênh Youtube BHKTHN:
