Klei Aê Diê Blŭ: Bruă Phung Khua Ƀĭng Kna 8:1-5
Êlan kliăng: “Mtô klei Aê Diê blŭ, brei ih gĭr thâodah mông găl amâodah amâo găl ôh,” (II Y‑Timôthê 4:2a)
Klei êmuh ksiêm mĭn: Si klei arăng ngă jhat kơ Phung Sang Aê Diê tal êlâo? Ti anôk Phung đăo bra hiu leh anăn ya bruă digơ̆ ngă? Hruê anei ya klei drei hriăm mơ̆ng klei phung đăo tal êlâo bi hmô leh?
Leh klei Y‑Êtiên djiê (Bruă Phung Khua Ƀĭng Kna 7:56) leh anăn ti anăp klei arăng ngă jhat kơ klei đăo Khua Yang, mĭndah ai tiê klei mĭn phung đăo tal êlâo srăng dlưh trŭn hlăm bruă hiu hưn Klei Mrâo Mrang Jăk. Ƀiădah mklăk wĭt, digơ̆ lŏ ktang kjăp hĭn êjai. Mơ̆ng klei arăng ngă jhat yơh lŏ mtrŭt digơ̆ hiu hưn bi lar Klei Mrâo Mrang Jăk lu hĭn hlăm djăp anôk digơ̆ truh (êlan 4).
Bruă Phung Khua Ƀĭng Kna dơ̆ng mơ̆ng kdrêč 4 truh kơ kdrêč 7 čih wĭt klei Phung đăo kơ Krist tal êlâo ti ƀuôn Yêrusalem tlă anăp hŏng klei arăng ngă jhat ƀrư̆ hruê ƀrư̆ đĭ hĭn. Êlâo hĭn jing klei arăng arưp aram bi huĭ, êdei anăn čăm hŏng giê, êdei hĭn truh kơ klei bi mdjiê Y‑Êtiên, leh anăn lŏ čuê hŏng klei “ngă jhat ktang snăk”. Amâo mjưh tăp anăn ôh, Phung Sang Aê Diê lŏ tŭ klei Y‑Sôl duah bi rai leh anăn mă krư̆ phung đăo hlăm war (êlan 1-3). Ƀiădah lĕ, mơ̆ng klei dleh dlan anei yơh lŏ mtrŭt hĭn bruă hiu hưn Klei Mrâo Mrang Jăk mơ̆ng phung đăo bra hiu, lar tar ƀar lăn ala. Khua Yang pŏk prŏng Ƀuôn Ala Mtao Ñu ti krah klei phung roh dôk ksŭng ngă mtam.
Trăn Klei Aê Diê Blŭ anei bi sĭt Klei Khua Yang Yêsu lač hlăm Bruă Phung Khua Ƀĭng Kna 1:8, jing hưn bi sĭt kơ Ñu “hlăm ƀuôn Yêrusalem, hlăm tar čar Yuđa, čar Samari, leh anăn tơl truh ti knhal lăn ala.” Hdră bruă klei Khua Yang bi mtlaih mnuih ăt đĭ kyar nanao. Wăt tơdah năng ai phung đăo hlăk anăn amâo ƀuh ôh klei Khua Yang kñăm čiăng hlăm klei digơ̆ dôk tŭ klei knap mñai, ƀiădah klă sĭt hdră bruă Khua Yang ăt dôk ngă leh anăn Klei Mrâo Mrang Jăk dôk đĭ kyar nanao. Kyuadah “Phung bra đuĕ mdê mdê hiu tar ƀar mtô klei mrâo mrang jăk.” (êlan 4).
Klei arăng ngă leh anăn klei Phung Sang Aê Diê ti ƀuôn Yêrusalem bra hiu jing mông găl čiăng hiu hưn Klei Mrâo Mrang Jăk leh anăn bi mtlaih mnuih lu hĭn kơ Khua Yang. Klei ngă jhat jing klei soh mơ̆ng phung mâo ai tiê bi êmut kơ klei đăo kơ Khua Yang, ƀiădah Aê Diê brei klei dưi kơ klei anăn truh, leh anăn Ñu yua klei arăng ngă jhat anăn čiăng pŏk prŏng Ƀuôn Ala Mtao Khua Yang. Klei anăn lŏ bi mđĭ hĭn klei jhŏng kơ phung đăo hlăm bruă hiu mtô Klei Aê Diê Blŭ leh anăn wăt ba klei hơ̆k mơak kơ anôk mă tŭ Klei Mrâo Mrang Jăk Khua Yang.
Hruê anei, klei arăng ngă jhat kơ Klei Mrâo Mrang Jăk ăt adôk truh hlăm lu anôk mdê mdê ti lăn ala. Ƀiădah hŏng klei đăo kơ Khua Yang Pô Bi Mtlaih kbiă lŏ hdĭp yơh, leh anăn hŏng klei jhŏng phung anak ƀuôn sang Aê Diê, lu Phung đăo kơ Krist ăt amâo mdei ôh găn klei lông dlăng čiăng hiu hưn Klei Mrâo Mrang Jăk thâodah mông găl amâodah amâo găl ôh. Khua Yang ăt dôk kiă kriê leh anăn mâo klei dưi hĭn ti dlông jih jang klei truh, leh anăn hdră bruă Ñu amâo tuôm mlih ôh. Tơdah grăp čô Phung đăo kơ Krist dôk mĭn nanao hlăm ai tiê, ktang arăng ngă jhat, Klei Mrâo Mrang Jăk ktang hĭn mơh hiu hưn snăn Klei Mrâo Mrang Jăk srăng djăl lar truh ti knhal lăn ala.
Tơdah tuôm hŏng klei arăng ngă jhat, klei dleh dlan, klei lông dlăng, si ngă drei ăt jhŏng hiu hưn Klei Mrâo Mrang Jăk mơ̆ amâodah êdu ai?
Wah lač: Ơ Khua Yang, brei kơ kâo klei myang Yang Mngăt Jăk leh anăn klei jhŏng msĕ si phung đăo tal êlâo, čiăng kơ kâo dưi găn klei lông dlăng, ăt dôk sĭt suôr hiu hưn Klei Mrâo Mrang Jăk bi mtlaih kơ lu mnuih, thâodah tuôm hŏng klei arăng bi kdơ̆ng amâodah klei truh dleh dlan dưn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
