Pajlug 20:14
Tus uas tuaj muas khoom yws hais tias luag muag kim heev, tiamsis thaum nws tawm lawm, nws khav hais tias nws khom tau tus nqi pheejyig kawg li.
Lus nug rau sawvdaws xav:
– Nqe Pajlug no qhia dabtsi txog tus mus yuav khoom?
– Tus Tswv qhia yuav tsum ua licas thaum muag lossis yuav khoom?
– Koj qhia tshwm tus Tswv txojkev ncajncees licas thaum muag lossis yuav khoom txhua hnub?
Yib ces yuav haum ces muag yog kev ua lag luam muaj nqis rau tus muag thiab tus yuav huv tibsi. Txawm li ntawd los muaj ib cov neeg muag lawv siv tej tswvyim phem los dag tus mus yuav khoom xws li siv tus teev ntxo (Pajlug 20:10), thiab kuj muaj tus yuav khoom kuj siv tswvyim phem, lus hais dag los ua khom nqis kom zoo rau tus kheej.
Nqe Pajlug hnub no qhia cov ntseeg Tswv Yexus yuav tsum ua ncajncees rau lwm tus thiab tus kheej, tsis txhob ua li “Tus uas tuaj yuav khoom yws hais tias luag muag kim heev, tiamsis thaum nws tawm lawm, nws khav hais tias nws khom tau tus nqi pheejyig kawg li” (nqe 14). Phau Txhais Tshiab HMOWSV txhais li no: “Tus uas rho nyiaj yuav kuj hais tias, ‘Tsis zoo, tsis zoo’ tiamsis thaum nws coj dhau lawm nws kuj khav.” Tsuas yog tib yam khoom, tiamsis , thaum yuav ces nrhiav txhua lub tswvyim los thuam hais tias “tsis zoo, tsis zoo”, yam khoom no phem heev, kom yuav tau tus nqi qis tshajplaws tiamsis thaum yuav tau lawm txawm khav hais tias nws paub hais nqi heev thiaj yuav tau yam khoom zoo ntawm nqi qis. Hais tau hais tias, tus neeg rho nyiaj mus muas khoom yuav nrhiav tswvyim los ntxias tus muag khoom kom ntseeg hais tias yam khoom ntawd tus nqi siab dhau lawm, tiamsis thaum tawm mus lawm ces khav hais tias yus siv tej lus dag los ntxias tau tus muag tso nqi qis rau yam khoom yus yuav. Cov neeg zoo li ntawd qhia tshwm lub neej tsis ncajncees, dag ntxias kom tau yam zoo tiamsis tseem tsis paub txaj muag, tseem khav hais tias nws tau yam khoom ntawd yog los ntawm nws tej lus dag ntxias thiab!
Thaum txo nqi hauv kev ua lag luam yeej tsis txhaum, tiamsis thaum dag ntxias thiab khavtheeb thiaj yog txhaum. Anplahas tau nrog Vajtswv Tus Uas Muaj Kev Hlub sib hais txog cov neeg ncaj ncees hauv lub nroog Xaudoos, tiamsis nws tsis hais dag thiab tsis khav, nws tsis taij thov tus Tswv pab nws tiamsis thov rau cov neeg nyob hauv nroog Xaudoos (Chivkeeb 18:22-33). Peb yuav tsum ceevfaj thaum ua lag ua luam yuav khoom, muag khoom, tsis cia lwm tus ua phem lossis ntxo peb, tiamsis peb kuj txhob siv tej lus dag lwm tus kom peb tau tsam nyiaj txiag, tshwjxeeb yog cov neeg pluag ua luam me, txomnyem lossis tsis muaj tswvyim li peb. Timthawj Paulus qhia hais tias: “Nej tsis txhob ua ib yam dabtsi kom zoo rau nej lossis kom neeg qhuas nej xwb; tiamsis nej yuav tsum txo hwjchim thiab ib tug tsis txhob khav hais tias ib tug zoo dua ib tug. Nej tsis txhob xav txog nej xwb, tiamsis nej yuav tsum xav txog lwm tus thiab” (Filipis 2:3-4). Yog Vajtswv tus uas ncajncees ib tug menyuam, peb cia li ua lub neej ncaj ncees, txo hwjchim, vim peb txhua tus yuav sawv ntawm Vajtswv lub rooj txiav txim hnub tus Tswv rov qab los thiab qhia tawm txhua yam uas nyias tau ua los lawm rau Nws (Loos 14:10-12; II Kauleethaus 5:10).
Thov Vajtswv
Vajtswv tus uas ncajncees, thov zam txim rau nyuam yaus vim ntau zaug ntshaw yam ub yam no nyuam yaus tau ua tsis ncaj ncees rau lwm tus. Thov Koj pub rau nyuam yaus paub hwm Koj dhau ntawm lub neej, kev ua zoo rau lwm tus. Amees.
Peb puas tau qhia tshwm tus Tswv qhov tseeb thiab kev ncajncees thaum muas khoom thiab muag khoom lawm tau?
Nyeem Vajluskub hauv peb lub xyoos: Yauhas 9
Kênh Youtube BHKTHN:
https://www.youtube.com/c/bhkthn
Nyeem Vajluskub hauv peb lub xyoos: Yauhas 7:1-44
