Klei Aê Diê Blŭ: Klei Bi Hriêng 20:14
Êlan kliăng: “Pô blei lač dŏ anăn “jhat, jhat”, ƀiădah leh ñu đuĕ nao ñu bi mni kơ ñu pô.” (Klei Bi Hriêng 20:14)
Klei êmuh ksiêm mĭn: Ya klei bi hriêng anei mtô kơ phung blei ? Si Aê Diê mtô hlăm klei mnia blei ? Si drei bi êdah klei kpă ênô Aê Diê mơ̆ng bruă mnia blei, blei mnơ̆ng dhơ̆ng hlăm grăp hruê ?
Găl blei mơak čhĭ jing klei mnia blei ba klei tŭ dưn kơ jih dua tĭng pô blei wăt pô čhĭ. Wăt tơdah snăn, mâo đa đa phung čhĭ yua djăp mnêč jhat čiăng mplư phung blei msĕ si mkă boh ktrŏ soh amâo djăp (Klei Bi Hriêng 20:10), leh anăn ăt mâo phung blei yua mnêč mplư, blŭ luar čiăng duah klei tŭ dưn kơ pô,
Klei Bi Hriêng hruê anei mtô grăp čô đăo brei hdĭp kpă ênô hŏng grăp čô mnuih, hŏng pô, đăm ôh msĕ si “Pô blei lač dŏ anăn “jhat, jhat”, ƀiădah leh ñu đuĕ nao ñu bi mni kơ ñu pô” (êlan 14). Hră mblang 2011 mblang êlan anei snei: “Jhat êdi! Jhat êdi! Pô blei lač yuôm đei. Blei leh anăn đuĕ leh anăn hưn dưi blei leh hŏng ênoh êlưih”. Hŏng sa mta mnơ̆ng, ƀiădah tơdah duah djăp klei mưč mač “Jhat, jhat”, mnơ̆ng anei jhat êdi, hŏng mta kñăm čiăng dưi blei hŏng ênoh êlưih ƀiădah tơdah dưi blei leh snăn lŏ hưn pô dưi blei mnơ̆ng jăk hŏng ênoh êlưih. Lŏ mblang, pô blei kpĭ ênoh pô čhĭ mĭndah diñu kčah ênoh yuôm đei kơ mnơ̆ng anăn anăn čhĭ yuôm, ƀiădah leh đuĕ snăn hưn ktưn mni kơ pô tŭ jing hlăm bruă yua klei blŭ mplư phung čhĭ bi hrŏ ênoh mnơ̆ng dhơ̆ng. Phung snăn bi êdah klei hdĭp amâo kpă ênô, mplư mplêč čiăng duah klei tŭ dưn ƀiădah amâo thâo hêñ ôh, lŏ ktưn hưn mâo leh klei tŭ kyua klei pô blŭ luar mplư!
Amâo soh ôh tơdah drei bi trông kơ ênoh hlăm klei mnia blei, ƀiădah luar, mplư leh anăn mčeh jing klei soh. Y‑Abraham dưi lač jing thâo kơ Aê Diê jing Pô bŏ hŏng klei pap čiăng bi hrŏ hnơ̆ng čuăn ênoh mnuih kpă ênô ti Sôđôm, ƀiădah ñu amâo blŭ luar ôh leh anăn kăn mčeh rei, ñu akâo kơ Aê Diê amâo djŏ kyua kơ pô ôh ƀiădah kyua phung hlăm ƀuôn Sôđôm (Klei Mphŭn Dơ̆ng 18:22-33). Brei drei răng hlăm bruă mnia blei, amâo brei phung mkăn ba klei jhat amâodah bi ênguôt drei ôh, ƀiădah ăt kăn yua klei mplư čiăng duah klei tŭ dưn mơ̆ng pô mkăn, boh nik hŏng phung ƀun ƀin čhĭ mnơ̆ng điêt, dleh dlan amâodah amâo thâo mĭn hĭn kơ drei. Khua ƀĭng kna Y‑Pôl mtô :“Đăm ngă ôh sa mta klei hŏng klei mĭn kơ pô amâodah hŏng klei mgao, ƀiădah hŏng klei luă gŭ brei diih yap phung mkăn jing prŏng hĭn kơ diih pô. Brei grăp čô hlăm phung diih đăm mĭn kơ klei tŭ dưn knŏng kơ ñu pô ôh, ƀiădah mĭn wăt kơ klei tŭ dưn kơ phung mkăn msĕ mơh” (Philip 2:3-4). Jing anak Pô Kpă Ênô, brei hdĭp kpă ênô, luă gŭ, kyua jih jang phung drei srăng dôk ti anăp jhưng phat kđi Aê Diê hlăm hruê Khua Yang lŏ hriê čiăng hưn jih djăp bruă pô ngă leh (Rôm 14:10-12; II Kôrantô 5:10).
Si drei bi êdah klei mngač, klei kpă ênô Aê Diê hlăm bruă mia blei?
Wah lač: Ơ Aê Diê kpă ênô, akâo kơ Ih pap brei kơ kâo kyua lu mmông kâo khăp kơ klei tŭ dưn anăn hdĭp amâo kpă ênô hŏng pô mkăn. Akâo kơ Aê Diê đru kâo hdĭp huĭ mpŭ kơ Aê Diê mơ̆ng knuih hdĭp, klei blŭ tlao bruă ngă hŏng grăp čô mnuih.
Dlăng Klei Aê Diê Blŭ hlăm tlâo thŭn: Y‑Yôhan 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
