Klei Aê Diê Blŭ: Y‑Yêrêmi 31:21-30
Êlan kliăng: “Msĕ si Kâo ksiêm dlăng leh kơ diñu čiăng buč, bi klưh, mdlưh, bi rai, leh anăn bi truh klei jhat, msĕ snăn mơh Kâo srăng răng kriê diñu čiăng mdơ̆ng leh anăn pla,” Yêhôwa lač” (Y‑Yêrêmi 31:28).
Klei êmuh ksiêm mĭn: Ya ngă phung ƀuôn sang Israel “mdơ̆ng mnơ̆ng bi knăl leh anăn mdơ̆ng gơ̆ng ktrâo êlan”? Hŏng ya hdră Yêhôwa “mdơ̆ng leh anăn pla” sang Israel leh anăn sang Yuđa? Ya klei čiăng lač kơ sa čô mnuih ƀơ̆ng boh kriăk ƀâo msăm tĭng êgei ñu pô? Ya klei drei khăng bi mĭn sĭt ngă soh?
Kyua bi kdơ̆ng, phung ƀuôn sang Israel ngă soh hŏng Yêhôwa leh anăn tlă anăp hŏng boh klei ară anei. Khă gơ̆ wăt tơdah tŭ klei dleh dlan kyua Aê Diê bi kmhal ƀiădah Ñu amâo lui digơ̆ ôh. Aê Diê lač hŏng diñu. Hlăm ktuê êlan arăng ba nao jing mnă ti čar Ƀabylôn snăn “Mdơ̆ng bĕ mnơ̆ng bi knăl atăt gai, mdơ̆ng bĕ gơ̆ng ktrâo êlan; ksiêm bi nik êlan prŏng…” (êlan 21), hŏng klei čiăng lač srăng mâo sa hruê amâo sui ôh diñu srăng lŏ kplăk wĭt hlăm ktuê êlan diñu êbat nao leh. Yêhôwa lač leh Ñu ba phung mnă wĭt snăn hlăm lăn Yuđa leh anăn dŭm ƀuôn prŏng Aê Diê srăng hơêč hmưi kyua phung ƀuôn sang Aê Diê lŏ dưi nao ti “anôk klei kpă ênô dôk, Ơ kbuôn doh jăk” (êlan 23) jing anôk diñu lŏ dưi kkuh mpŭ kơ Yêhôwa leh anăn mâo klei Aê Diê hơêč hmưi. Leh anăn klei bi hluh lir plah wah Dưr leh anăn Dhŭng lŏ dưi mâo leh Yêhôwa “srăng rah sang Israel leh anăn sang Yuđa hŏng mjeh mnuih leh anăn mjeh hlô mnơ̆ng” (êlan 27). Klei bi blah bi luč jih mjeh hlô mnơ̆ng leh anăn mdjiê lu anak mnuih, snăn truh hruê Yêhôwa nao čuă, Aê Diê srăng lŏ brei kơ diñu wăt mnuih leh anăn hlô mnơ̆ng êbeh dlai msĕ si klei khăp Ñu brei leh kơ digơ̆. Yêhôwa lač hŏng diñu snei “Msĕ si Kâo ksiêm dlăng leh kơ diñu čiăng buč, bi klưh, mdlưh, bi rai, leh anăn bi truh klei jhat, msĕ snăn mơh Kâo srăng răng kriê diñu čiăng mdơ̆ng leh anăn pla” (êlan 28), kyua knŏng hjăn Aê Diê jing Pô mâo klei dưi hơêč hmưi leh anăn bi kmhal kơ anak mnuih.
Kyua klei soh jih jang phung ƀuôn sang Aê Diê anăn diñu tŭ klei “buč, bi klưh, mdlưh, bi rai, leh anăn bi truh klei jhat” mơ̆ng Yêhôwa, khădah snăn, klei khăp leh anăn klei pap Aê Diê srăng ktŭng diñu wĭt, leh anăn Ñu srăng kơrŭ wĭt ƀuôn sang Ñu. Khădah snăn, hlăm hruê anăn, grăp čô mnuih tŭ klam kơ klei soh pô ngă leh, amâo dưi tuh ôh kơ aduôn aê pô đưm msĕ si klei duê Aê ama ƀơ̆ng boh kriăk ƀâo msăm anăn anak čô tĭng êgei”. Hruê anăn hlei pô ƀơ̆ng boh kriăk ƀâo msăm snăn srăng tĭng êgei ñu pô (êlan 29-30). Anak mnuih khăng ƀuh klei soh pô mkăn hĭn kơ klei soh pô, leh anăn khăng tuh klei soh kơ pô mkăn hrô kơ ƀuh klei soh pô leh anăn kmhal. Knŏng sĭt anak mnuih kmhal kơ klei soh pô kơh dưi mâo klei pap leh anăn bi mrâo mơ̆ng Yêhôwa msĕ si Klei Aê Diê Blŭ čih leh: “Msĕ si kâo ksiêm dlăng leh kơ diñu čiăng buč, bi klưh, mdlưh, bi rai, leh anăn bi truh klei jhat, msĕ snăn mơh kâo srăng răng kriê diñu čiăng mdơ̆ng leh anăn pla.”
Drei khăng tuh klei soh kơ klei hdĭp amâodah kơ pô mkăn mơ̆ sĭt ngă soh?
Wah lač: Ơ Aê Diê! Kâo mpŭ mni kơ klei pap êbeh dlai Ih hŏng phung ƀuôn sang čiăng lŏ“mdơ̆ng leh anăn pla”digơ̆. Akâo kơ Ih đru kâo pral kmhal klei soh čiăng mâo klei bi mrâo mơ̆ng Aê Diê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y‑Nêhêmi 12:1-26
Kênh Youtube BHKTHN:
