Yelemis 31:21-30
Nqe cim:
“Yav tas los kuv rhuav lawv lub neej, tshem lawv tawm, chua lawv kotaw kom lawv ntog, ua rau lawv puastsuaj thiab tso kev ploj kev tuag los raug lawv, tiamsis nimno kuv yuav tsa lawv, txhim kho lawv thiab txhawb lawv lub neej”(Yelemis 31:28).
Lus nug rau sawvdaws xav:
- Cov neeg Yixalayees yuav tsum “tshuam nplooj thiab taug lw” ua dabtsi?
- Tus Tswv yuav “tsa thiab txhim kho” Nws haiv neeg licas?
- Daim duab ib tug neeg noj txiv qaub ua rau lwm tus los qaubncaug txhais tau licas?
- Thaum ua txhaum peb pheej xav txog yam dabtsi?
Ib tsoom cov mloog txhua tus,
Vim tsis mloog lus, cov neeg Yixalayees thiaj ua txhaum rau tus Tswv thiab ntsib ntau yam teebmeem. Txawm yog Vajtswv tso tej kev txomnyem los raug lawv los Nws yeej tsis tso lawv tseg. Vajtswv qhia rau lawv hais tias, txojkev uas lawv raug ntes coj mus ua cev qhev rau tebchaws Npanpiloos “cia li tshuam nplooj rau txojkev uas koj mus, thiab cia li taug koj txoj qub lw rov los…” (nqe 21), muaj lub ntsiab hais tias muaj ib hnub tsis ntev tom ntej lawv yuav taug txojkev no rov qab los. Tus Tswv hais tias, thaum Nws coj lawv rov los ces lub tebchaws Yudas thiab tej nroog yuav hais lus foom koob hmoov vim tus Tswv haivneeg tau rov los thiab mus rau ntawm “lub roob dawbhuv uas yog tus Tswv lub chaw nyob…” (nqe 23), uas yog lub chaw lawv pehawm tus Tswv thiab txais Nws txoj koob hmoov. Thaum ntawd Qaumteb thiab Qabteb yuav los koom ua ke thaum tus Tswv “pub kom lub tebchaws Yixalayees thiab Yudas muaj neeg nyob txhua qhov thiab muaj tsiaj txhu ua npoj ntws lawm” (nqe 27). Kev tsovrog ua rau tej tsiaj txhu thiab tibneeg tuag licas, ces txog hnub uas tus Tswv los cuag lawv, Nws yuav rov pub kom lawv muaj neeg thiab tsiaj txhu coob raws li Nws txojkev hlub. Tus Tswv hais rau lawv hais tias: “Yav tas los kuv rhuav lawv lub neej, tshem lawv tawm, chua lawv kotaw kom lawv ntog, ua rau lawv puastsuaj thiab tso kev ploj kev tuag los raug lawv, tiamsis nimno kuv yuav tsa lawv, txhim kho lawv thiab txhawb lawv lub neej” (nqe 28), rau qhov tsuas yog Vajtswv tib leeg xwb thiaj muaj hwjchim pub tau koob hmoov thiab tso kev puastsuaj los raug tibneeg xwb.
Vim tagnrho tus Tswv haivneeg ua txhaum, lawv thiaj raug tus Tswv “rhuav, tshem, chua, ua kom puastsuaj”, txawm li ntawd los, Vajtswv txojkev hlub thiab kev ua siab ntev tseem muaj rau lawv, Vajtswv yuav rov txhim kho Nws haivneeg. Thaum txog hnub ntawd, txhua tus nyias yuav tsum ris tej kev txhaum uas nyias tau ua, tsis txhob liam txim rau tej niam txiv zoo ib yam li nqe pajlug “Niam txiv noj txiv qaub ua rau menyuam los qaubncaug”. Hnub ntawd leejtwg noj txiv qaub ces yuav tsum los qaubncaug xwb (nqe 29-30). Tibneeg nyiam ntsia lwm tus qhov txhaum heev dua li yus qhov txhaum, thiab pheej liam txim rau lwm tus dua li uas zeem paub qhov txhaum yus ua. Tsuas yog thaum tibneeg lees txim tiag tiag thiaj li tau txais tus Tswv txojkev hlub thiab tau txhim kho ib yam li Nws Txojlus hais tias: “Yav tas los kuv rhuav lawv lub neej, tshem lawv tawm, chua lawv kotaw kom lawv ntog, ua rau lawv puastsuaj thiab tso kev ploj kev tuag los raug lawv, tiamsis nimno kuv yuav tsa lawv, txhim kho lawv thiab txhawb lawv lub neej”.
Thov Vajtswv,
Tus Tswv! Nyuam yaus thov qhuas Koj txojkev hlub nyob mus ibtxhis. Koj hlub Koj haivneeg “tsa thiab txhim kho” lawv lub neej dua. Thov koj pab nyuam yaus paub lees tej kev txhaum, nyuam yaus thiaj tau Koj txhim kho dua tshiab. Amees.
Ib tsoom cov mloog uas hmov thiab tshua,
Peb puas tseem liam txim rau tej lub tsamthawj lossis rau lwm tus thaum peb ua ib yam dabtsi txhaum lawm?
Nyeem Vajluskub hauv peb lub xyoo: Nehemis 12:1-26
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
