Klei Aê Diê Blŭ: Klei Bi Hriêng 21:1
Êlan kliăng: “Ai tiê mtao jing msĕ si sa hnoh êa hlăm kngan Yêhôwa, Yêhôwa brei gơ̆ đoh phă anôk Ñu čiăng” (Klei Bi Hriêng 21:1).
Klei êmuh ksiêm mĭn: Êlan klei bi hriêng ti dlông brei ƀuh si ngă ai tiê mtao hlăm kngan Yêhôwa? Si ngă klei myang Aê Diê kiă kriê ti dlông jih jang phung mtao bi êdah? Si ngă ih mă yua klei hriăm anei kơ ih pô?
Klei Bi Hriêng 21:1 bi hdơr kơ drei Yêhôwa jing Mtao kơ jih jang mtao. Wăt hlăm ai tiê mnuih čuăn leh ya bruă srăng ngă, wăt phung mtao mâo klei dưi prŏng leh anăn ai tiê diñu čuăn leh kơ hdră si srăng gai gĭt ala čar dưn, ƀiădah klei dưi ti dlông grăp čô mnuih, jih jang phung khua mtao ti lăn ala anei jing dŏ Yêhôwa sơăi. Amâodah lač snei, Aê Diê jing Pô kiă kriê lăn ala wăt adiê.
“Ai tiê mtao hlăm kngan Yêhôwa” bi klă mtao mâo klei dưi ti dlông phung ƀuôn sang ƀiădah Aê Diê jing Pô gai jih klei mtao dưi amâodah hơăi wăt êlan mtao êbat. Klei bi hriêng hlăm pruĕ blŭ “sa hnoh êa” bi êdah kơ sa klei čuăn ba hriê klei jăk jĭn, klei đĭ kyar kơ mtao. Phung ngă hma čar Mêsôpôtami leh anăn čar Êjip mbĕ êlan êa đoh hŏng klei bư̆ êa leh anăn yua mnơ̆ng gang hnoh êa krông čiăng mđoh êa krih đang boh kriăk ƀâo leh anăn hma digơ̆. Klei bi hriêng hlăm êlan 1a čiăng lač kơ Aê Diê mâo klei myang dưi bi mlih hdră mtao ngă amâodah klei đĭ kyar mtao tui si klei Aê Diê čiăng.
Mơ̆ng đưm hlŏng kơ ară anei, hlăm jih jang ƀuôn ala mtao ti lăn ala anei, klei hdĭp phung ƀuôn sang tŭ klei bi hmăi mơ̆ng klei phung mtao gai gĭt amâodah mơ̆ng phung khua kiă kriê sơăi. Mtao thâo mĭn leh anăn huĭ mpŭ kơ Aê Diê snăn phung ƀuôn sang mâo klei êđăp ênang; kyuanăn, tơdah sa čô mnuih đăo kơ Krist jing sa čô khua gai gĭt, snăn brei ñu mâo klei luă gŭ, thâo kral Aê Diê, huĭ mpŭ kơ Aê Diê leh anăn ngă tui si Aê Diê čiăng. Brei pô gai gĭt thâo Aê Diê dưi bi mlih jih jang boh mơ̆ng hdră mnuih mĭn, leh anăn Ñu brei klei pap kơ hlei pô huĭ mpŭ kơ Ñu. Sa nah mkăn, tơdah jing mnuih ƀuôn sang, brei drei đup gưt kơ phung khua kiă kriê hlăm jih jang klei amâo hmăi kơ klei đăo drei ôh, leh anăn wah lač kơ digơ̆ msĕ si Khua ƀĭng kna Y-Pôl mtă: “Snăn êlâo kơ jih jang klei, kâo mtrŭt brei ih kwưh, akâo, wah lač brei kơ arăng leh anăn bi mni kơ Aê Diê kyua jih jang mnuih, kyua phung mtao leh anăn kyua jih jang phung khua kiă kriê, čiăng kơ drei dưi dôk hdĭp êđăp ênang leh anăn amâo mâo klei rŭng răng ôh, tui si klei đăo kơ Aê Diê leh anăn tui si klei arăng mpŭ” (I Y-Timôthê 2:1-2). Brei drei đăo sĭt kơ Yêhôwa mâo klei myang dưi bi mlih ai tiê, hdră pô gai gĭt mĭn čiăng ba klei jăk jĭn, klei êđăp ênang kơ phung đăo kơ Ñu hlăm djăp mta klei truh, hlăm jih jang ênuk. Brei drei wah lač kơ phung khua kiă kriê čiăng klei hdĭp drei mâo klei hơĭt, klei êđăp ênang hŏng jih ai tiê hŏng klei đăo leh anăn klei kpă ênô. Hlăm djăp mta klei truh, brei drei hdơr kơ Aê Diê jing Mtao kơ jih jang mtao leh anăn Ñu khăp nanao kơ phung ƀuôn sang Ñu.
Si ngă drei khăng wah lač brei kơ phung khua kiă kriê ala čar drei mơ̆?
Wah lač: Ơ Aê Diê Mtao kơ jih jang mtao, đru kâo knang kjăp kơ klei myang Ih kiă kriê hlăm jih jang klei truh. Brei phung khua kiă kriê ala čar kâo thâo huĭ mpŭ kơ Ih leh anăn hdĭp kpă ênuah, msĕ si Klei Ih Blŭ mtă leh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
