Klei Aê Diê Blŭ: Y‑Yêrêmi 46:1-26
Êlan kliăng:“Ya klei Kâo ƀuh? Diñu êdu ai leh, diñu kdŭn leh, phung kahan bi blah diñu êbuh leh, leh anăn ruăt đuĕ leh; diñu amâo lŏ wir dlăng kơ tluôn ôh, mâo klei bi huĭ jŭm gah găn!” Yêhôwa lač… Hruê anăn jing hruê Yêhôwa Aê Diê kơ phung kahan, jing hruê klei rŭ ênua čiăng rŭ ênua kơ phung roh ñu” (Y‑Yêrêmi 46:5,10a)
Klei êmuh ksiêm mĭn: Hlei pô hưn kơ klei phung kahan Êjip amâo mâo klei dưi hlăm klei bi blah? Ya ngă diñu bi ktlă anăp hŏng “klei bi huĭ jŭm gah găn” msĕ snăn lĕ? Mơ̆ng klei phung Êjip tŭ klei bi kmhal, ya klei hriăm ih mâo?
Hŏng ƀăng êgei Khua pô hưn êlâo Y‑Yêrêmi, Yêhôwa hưn kơ klei srăng bi kmhal phung Êjip, mă mơ̆ng mtao, phung kahan, mnuih ƀuôn sang leh anăn jih lăn čar. Klei ktang čar Êjip êlâo dih ară anei luč jih. Klei Aê Diê Blŭ čih yăl dliê hŏng pruê̆ blŭ msĕ snei: “phung kahan bi blah diñu êbuh leh, leh anăn ruăt đuĕ leh; diñu amâo lŏ wir dlăng kơ tluôn ôh” (êlan 5), “Đao gưm srăng koh bi mdjiê leh anăn mnăm êrah diñu tơl trei” (êlan 10), “Phung găp djuê mnuih hmư̆ hing kơ klei hêñ diih, leh anăn tar ƀar lăn ala arăng hmư̆ hing klei diih ur hia; kyuadah sa čô kahan têč hnêč hŏng sa čô kahan mkăn; jih dua diñu lĕ buh mđrăm mbĭt” (êlan 12), “đao gưm srăng koh ƀơ̆ng phung mnuih jŭm dar diih” (êlan 14), “Diñu têč hnêč nanao, leh anăn diñu bi lĕ buh hdơ̆ng diñu pô” (êlan 16), “ƀuôn Nôp srăng jing ênguôl, sa anôk mkăm mnơ̆ng rai leh, amâo mâo mnuih dôk ôh” (êlan 19), “Wăt phung kahan ñu mưn leh mbĭt hŏng ñu… diñu msĕ mơh wir đuĕ leh mđrăm mbĭt, diñu amâo dôk kdơ̆ng ôh” (êlan 21), … klei bi kmhal pral leh anăn ktang tơl “Pô pral amâo dưi đuĕ ôh, kăn pô ktang tlaih rei” (êlan 6), leh anăn diñu amâo mâo êa drao dưi bi hlao anôk êka diñu ôh, kăn mâo êlan êran đuĕ dăp rei (êlan 11). Mâo lu pruê̆ blŭ “rŭ ênua”, “Kâo srăng bi truh klei kmhal”, “Kâo srăng jao”…brei ƀuh klei bi kmhal jing ktang snăk. Grăp boh ƀuôn, grăp čô mnuih arăng yap anăn leh hŏng klei bi kmhal klă êdimima brei ƀuh Aê Diê amâo lui sa atŭt mta mnơ̆ng ôh, ƀiădah Ñu bi kmhal jih jang hŏng klei klă msĕ si klei Ñu lač leh: “Kâo srăng bi rai luč jih jang phung găp djuê mnuih ti krah diñu Kâo suôt leh diih” (êlan 28).
Wăt tơdah klei bi kmhal bŏ hŏng klei huĭ msĕ snăn dưn, ƀiădah klei bi kmhal anăn năng hŏng klei soh mtao leh anăn phung ƀuôn sang čar Êjip ngă leh hŏng Aê Diê wăt hŏng phung ƀuôn sang Ñu. Hlăm Klei Aê Diê Blŭ, khăng yua čar Êjip jing rup bi hmô kơ lăn ala soh jhat. Kyuanăn, mơ̆ng klei Aê Diê bi kmhal anăn, mñă kơ drei thâo klei myang Aê Diê kiă kriê jih jang ƀuôn ala mtao, jih jang găp djuê mnuih đru drei đăo kjăp hĭn kơ klei sĭt nik Ñu srăng bi kmhal lăn ala soh jhat anei ti hruê knhal tuč. Năng ai drei dôk hdĭp hlăm anôk bŏ hŏng klei soh, lu klei amâo bi mtăp mđơr, lu mnuih amâo đăo kơ Aê Diê grăp hruê diñu ngă bruă amâo mâo kpă ôh. Ƀiădah brei drei đăo kjăp kơ Aê Diê Pô drei dôk kkuh mpŭ jing Pô thâo leh anăn ƀuh jih jang klei, Ñu ngă nanao klei mtăp mđơr kơ phung anak Ñu djŏ tui si mông Ñu bi kčah leh.
Si ngă drei đăo mơ̆ kơ klei Aê Diê kiă kriê jih jang ƀuôn ala mtao leh anăn jih jang găp djuê mnuih?
Wah lač: Ơ Yêhôwa Aê Diê kơ phung kahan! Mpŭ mni kơ anăn guh kơang leh anăn myang Ih, Pô Kpă Ênô. Kâo bi mni kơ Ih kyua kâo hriăm thâo leh kơ klei myang Ih kiă kriê jih jang ƀuôn ala mtao leh anăn jih jang găp djuê mnuih, đru kâo thâo knang kơ Ih nanao kyuadah kâo thâo Ih srăng dŏng kâo hŏng klei mtăp mđơr msĕ si Ih ƀuăn leh.
Dlăng Klei Aê Diê Blŭ hlăm tlâo thŭn: Y‑Luk 22:1-38
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
