Kaulauxais 3:18-19
Nqe cim:
“Tiamsis nqe no yog hais txog nej thiab. Txhua tus txiv, nyias yuav tsum hlub nyias tus pojniam ib yam li nyias hlub nyias lub cev. Thiab txhua tus pojniam nyias yuav tsum hwm nyias tus txiv” (Efexus 5:33).
Lus nug rau sawvdaws xav:
– Timthawj Paulus qhia dabtsi txog niamtxiv lub luag haujlwm?
– Yam pab lub cuabyig muaj kev zoo siab yog dabtsi?
– Qhov no khwv ua lossis yoojyim ua?
– Nej coj mus siv licas nyob hauv tus kheej lub neej txijnkawm?
Timthawj Paulus hais ntau zaus txog niamtxiv lub luag haujlwm nyob hauv cov ntawv uas nws sau (I Kauleethaus 7; Efexus 5; Kaulauxais 3). Nws hais meej hais tias yam uas yuav pab tau kom lub cuabyig muaj kev zoo siab yog tus txiv yuav tsum hlub tus pojniam thiab tus pojniam yuav tsum hwm tus txiv. Nyob hauv ob nqe Vajluskub no, Timthawj Paulus rov hais ib zaug ntxiv hais tias, yog tus Tswv cov menyuam lawm, nkawm niamtxiv haj yam yuav tsum ua raws li tej yam hais los ntawd. Tus pojniam yuav tsum hwm tus txiv vim ua li ntawd thiaj phim li tus ntseeg lub neej (nqe 18). Tus txiv yuav tsum hlub tus pojniam thiab tsis ua limhiam rau nws (nqe 19), tsis txhob xav hais tias tus pojniam yuav tsum nyob qab tswjhwm ua tsis zoo rau tus pojniam ntxhov siab.
Timthawj Petus kuj qhia hais tias “nej cov uas yog pojniam, nej yuav tsum mloog nej cov txiv lus” (I Petus 3:1). Mloog lus lossis hwm uas hais ntawm no tsis yog hwm, mloog li tus qhev ua rau tus tswv, tiamsis hwm los ntawm lub siab hlub thiab saib taus. Lo lus “hwm” yog ib lo lus siv rau sab tubrog muaj lub ntsiab yog “nyob kom yog qib”. Timthawj Paulus qhia paub hais tias “tus txiv yog tus uas muaj hwjchim kav tus pojniam, ib yam li Yexus Khetos muaj hwjchim kav cov ntseeg” (Efexus 5:23). Yog li ntawd, raws li txheej txheem, tus txiv yog lub taubhau thiab tus pojniam yog lub cev zoo li daim duab piv txog Yexus Khetos thiab Pawg Ntseeg. Vim li ntawd, tus pojniam yuav tsum nyob qab tswjhwm ntawm tus txiv ib yam li Pawg Ntseeg nyob qab tswjhwm ntawm Yexus Khetos (Efexus 5:24). Tus pojniam yuav yoojyim ua tau li ntawd yog hais tias nws hwm tus Tswv. Vim yog thaum ua raws Vajtswv Txojlus qhia ces tus pojniam thiaj yuav txo hwjchim, ua siab ntev thiab saib taus nws tus txiv.
Tus txiv lub luag haujlwm yog hlub tus pojniam zoo ib yam li Yexus Khetos hlub Pawg Ntseeg. Tswv Yexus txaus siab hlo tso txhua yam tseg, tuag txhiv Pawg Ntseeg (Efexus 5:25), ib yam nkaus li ntawd, tus txiv yuav tsum hlub tus pojniam los ntawm txojkev hlub tso txhua yam, txaus siab hlo ua yam muaj nqis rau tus pojniam. Lo lus qhuab ntuas hais tias tus txiv “txhob ua limhiam” rau tus pojniam (nqe 19) muaj lub ntsiab hais tias tus txiv yuav tsum ua txhua yam rau tus pojniam los ntawm kev hlub tshua thiab ua tib zoo saib xyuas vim lawv yog cov uas “tsis muaj zog” (I Petus 3:7).
Thaum niamtxiv ua raws li tej lus qhia no, tus pojniam hwm tus txiv thiab tus txiv hlub tus pojniam, ces yeej yuav muaj kev kaj siab nyob hauv lub neej txijnkawm. Hais sau zog hais tias, tus pojniam hwm tus txiv los ntawm tus cwjpwm saib taus tsis yog lam hwm dhau cai. Tus pojniam hwm tus txiv raws li txojcai hwm tus Tswv thiab ua raws Vajtswv Txojlus qhia. Vim li ntawd, thaum tus txiv ua yuamkev, tus pojniam yuav tsum vamkhom tus Tswv txoj koob hmoov los pab tus txiv zeem paub qhov yuamkev ntawd. Dua li tus txiv hlub tus pojniam kuj tsis yog cia nws ua ywjsiab tiamsis hlub raws li Yexus Khetos tus qauv hlub Pawg Ntseeg. Thaum tus txiv tas siab tas ntsws hlub tshua, saibxyuas tus pojniam thiab txaus siab hlo tso txhua yam tseg vim tus pojniam, ces paub tseeb hais tias tus pojniam kuj txaus siab hlo hwm thiab mloog tus txiv lus txhua lub sijhawm.
Thov Vajtswv,
Tus Tswv, nyuam yaus ua Koj tsaug vim Koj Txojlus niaj hnub qhia nyuam yaus paub kev ua neej. Thov pub koob hmoov thiab dagzog rau nyuam yaus siv tej uas Koj Txojlus qhia los saibxyuas nyuam yaus lub cuabyig. Amees.
Nej lub cuabyig puas siv txojcai sib hlub vim hwm tus Tswv lawm tau?
Nyeem Vajluskub hauv peb lub xyoos: Mathais 10:32-11:30
Kênh Youtube BHKTHN:
