Klei Aê Diê Blŭ: Kôlôs 3:18-19
Êlan kliăng: “Ƀiădah brei grăp čô diih khăp kơ mô̆ ñu msĕ si ñu khăp kơ ñu pô, leh anăn brei mô̆ mpŭ kơ ung ñu.” (Êphêsô 5:33)
Klei êmuh ksiêm mĭn: Ya klei khua ƀĭng kna Y-Pôl mtô kơ bruă klam hdơ̆ng ung mô̆? Ya êlan čiăng dưi djă pioh klei jăk mơak hlăm gŏ sang? Si ngă êlan anei dleh amâodah ênưih ngă? Si diih mă yua hlăm klei hdĭp ung mô̆ diih?
Khua ƀĭng kna Y-Pôl lač lu kơ bruă klam hdơ̆ng ung mô̆ hlăm hră ñu čih mơĭt (I Kôrantô 7; Êphêsô 5; Kôlôs 3). Ñu kñăm nanao kơ êlan čiăng dưi djă pioh klei jăk mơak hlăm gŏ sang, jing brei phung ung thâo khăp kơ mô̆ leh anăn phung mô̆ brei mpŭ kơ ung. Hlăm dua êlan Klei Aê Diê Blŭ anei, lŏ sa blư̆ khua ƀĭng kna Y-Pôl kñăm snei, jing phung anak Aê Diê, brei phung ung mô̆ hdĭp ngă hlue tui si êlan anăn. Phung mô̆ brei đup gưt kơ ung kyua klei anăn djŏ guôp tui si knhuah hdĭp phung đăo kơ Krist (êlan 18). Brei phung ung thâo khăp kơ mô̆ leh anăn amâo ngă khăng hŏng gơ̆ ôh (êlan 19), amâo djŏ ôh kyuadah lač brei mô̆ đup gưt kơ ung snăn ngă khăng hdĭp bi suăi knap mô̆.
Khua ƀĭng kna Y-Pêtrôs pô ăt mtô mơh “Ơ phung mô̆, brei diih đup gưt kơ ung diih” (I Y-Pêtrôs 3:1). Klei đup gưt tinei amâo djŏ msĕ si sa čô dĭng buăl đup gưt kơ khua ñu ôh, ƀiădah đup gưt hlăm klei mpŭ leh anăn klei khăp. Boh blŭ “đup gưt” jing boh blŭ khăng yua hlăm bruă lĭng kahan čiăng lač kơ klei “dăp mâo tal gưl pruê̆ êlan”. Khua ƀĭng kna Y-Pôl brei thâo “kyuadah ung jing khua kơ mô̆ ñu, msĕ si Krist jing Khua kơ Phung Sang Aê Diê” (Êphêsô 5:23). Snăn, hlue si pruê̆ dăp êlâo êdei, ung jing kŏ leh anăn mô̆ jing asei mlei msĕ si rup Yang Krist hŏng Phung Sang Aê Diê. Kyuanăn, brei mô̆ gưt ung msĕ si Phung Sang Aê Diê gưt kơ Yang Krist (Êphêsô 5:24). Êlan klei đup gưt, phung mô̆ srăng ênưih ngă hĭn tơdah phung mô̆ đup gưt kluôm dhuôm kơ Khua Yang. Kyuadah tơdah gưt asăp Khua Yang snăn phung mô̆ srăng luă gŭ, tŭ gĭr leh anăn mpŭ kơ phung ung diñu.
Bruă kơ phung ung brei thâo khăp kơ mô̆ diñu msĕ si Khua Yang khăp kơ Phung Sang Aê Diê. Khua Yang Yêsu hmiêt mkăp lui ñu pô, săn asei mlei kyua Phung Sang Aê Diê (Êphêsô 5:25), msĕ snăn mơh, brei ung khăp kơ mô̆ hŏng klei khăp săn asei mlei, dưm klei tŭ dưn kơ mô̆ jing dlông hĭn. Klei mtô kơ phung ung “đăm ngă khăng” hŏng mô̆ (êlan 19) čiăng lač, brei phung ung dôk dơ̆ng ƀơ̆ng huă hŏng mô̆ diñu hŏng klei khăp hơiêng leh anăn răng kriê digơ̆ hŏng klei êdu êun kyuadah digơ̆ “jing phung awăt hĭn” (I Y-Pêtrôs 3:7).
Tơdah ung mô̆ mă yua tui si êlan klei mô̆ đup gưt kơ ung leh anăn ung khăp hơiêng kơ mô̆, sĭt nik srăng dưi djă pioh klei jăk mơak hlăm klei hdĭp ung mô̆. Blŭ klah čŭn, mô̆ gưt kơ ung hŏng klei mpŭ amâo djŏ hŏng klei amâo thâo săng êmăng ôh. Mô̆ gưt kơ ung hlue si klei bhiăn mô̆ đup gưt kơ Khua Yang leh anăn gưt ngă Klei Aê Diê Blŭ mtô. Kyuanăn tơdah ung ngă soh, mô̆ hŏng klei knang kơ klei pap Khua Yang čiăng đru ung dưi thâo kral klei soh wê anăn. Bi ung khăp hơiêng kơ mô̆ kăn djŏ hŏng klei amâo thâo săng rei, ƀiădah khăp tui si klei bi hmô Khua Yang Yêsu khăp kơ Phung Sang Aê Diê. Tơdah ung hŏng jih ai tiê thâo khăp hơiêng, răng kriê jăk leh anăn hmiêt mkăp săn asei mlei kơ mô̆ ñu, sĭt nik mô̆ msĕ mơh ăt srăng gưt, mpŭ kơ ung hlăm djăp mta klei.
Si ngă gŏ sang diih mă yua klei bhiăn huĭ mpŭ kơ Yang Krist, čiăng thâo bi khăp leh anăn bi gưt hdơ̆ng ung mô̆ mơ̆?
Wah lač: Ơ Khua Yang, bi mni kơ Ih kyuadah Klei Aê Diê Blŭ bi hriăm kâo nanao kơ klei bhiăn leh anăn êlan čiăng dưi dôk hdĭp jăk mơak. Akâo kơ Khua Yang brei klei pap leh anăn thiăm ai ktang kơ kâo mă yua Klei Aê Diê Blŭ čiăng dưi djă pioh klei hdĭp gŏ sang jăk mơak.
Dlăng Klei Aê Diê Blŭ hlăm tlâo thŭn: Y-Mathiơ 10:32-11:30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
