II Kevcai 32:19-25
Nqe cim.
“Tus Tswv hais tias, Kuv yuav tsis pab lawv lawm, kuv yuav saib puas muaj xwm dabtsi los raug lawv, lawv yog neeg tawv ncauj, tsis muab siab npuab kuv.” (II Kevcai 32:20)
Lus nug rau sawvdaws xav.
– Vajtswv txiav txim siab txog yam dabtsi hauv kev sib raug zoo nrog cov Yixalayees?
– Tus Tswv haivneeg ua dabtsi Vajtswv thiaj npautaws?
– Tus Tswv yuav rau txim rau Nws haivneeg licas?
– Zaj kawm no qhuab ntuas peb yam dabtsi?
Txuas ntxiv tej lus hais txog cov Yixalayees tej kev txhaum, yog tej lus sau txog tej yam txaus ntshai uas Vajtswv yuav tso los raug cov pejxeem. Yam xubthawj Vajtswv txiav txim siab ua yog tso cov Yixalayees tseg (nqe 19). Vajtswv hais tawv qhawv hais tias, Nws yuav fee plhu ntawm lawv mus, tsis pab lawv. Qhov vimchij yog vim lawv twb tsis yog ib haivneeg dawbhuv li thaud lawm, lawv dhau los ua ib cajces ua phem ua qias, tsis mloog lus.
Tsis muaj leejtwg nkag siab Vajtswv txojkev npautaws loj npaum cas thaum pom Nws haivneeg mus pe tej vajtswv uas tsis muaj qabhau, lawv ho tso tus Tswv uas tsim lawv, cawm lawv, coj lawv los ua ib haivneeg tseg. Vim tsis muab siab npuab tus Tswv li ntawd thiaj ua rau cov Yixalayees tsis tau koob hmoov hauv lub tebchaws, tseem raug tej sub tawg sub ntsha, mob kis, nrog rau txhua yam kev txhawj ntshai ntawm tej yeebncuab sab nraud. Dua li ntawd, nqe 21 qhia paub tom qab no Nws yuav ua kom “muaj kev khib”, txhais tau hais tias Nws yuav ua rau lawv khib thaum caw lwm haivneeg uas yog “haivneeg ruam” hauv Vajtswv txoj kevcai los ua Nws haivneeg hauv kev ntseeg Tswv Yexus. Tiamsis, hais tau hais tias, yam hnyav tshajplaws uas tus Tswv rau txim rau Nws haivneeg tsis yog yuav tsub tej sub tawg sub ntsha lossis lwm yam kev ceeblaj, tiamsis yog qhov uas Nws txiav txim siab muab lawv tso povtseg. Tseeb tiag, tsis muaj ib yam dabtsi txaus ntshai npaum qhov uas Tus cawm cov Yixalayees dim, Tus xaiv lawv ua Nws haivneeg, Tus tivthaiv lawv dim txhua yam kev txhawj ntshai hauv lubneej ntau tiam dhau los, Tus coj lawv los rau lub tebchaws coglus tseg uas zoo qoob thiab av rog, nimno Tus ntawd ho muab lawv tso tseg. Qhov no zoo nkaus li kev puastsuaj rau lawv ntag!
Vajtswv yog tus uas muaj kev hlub, tiamsis tsis vim qhov ntawd es Nws ho zam lossis ua txuj tsis paub txog peb lubneej kev txhaum, tsis kam tig los lees txim txawm tias Nws twb siv ntau txojkev los qhuab ntuas. Peb tsis txhob saib tsis taus es cia kev txhaum sib tshooj siab txog qib uas tus Tswv txiav txim siab tso peb tseg ib yam li Nws tau tso Nws haivneeg tseg. Tseeb tiag, tsis muaj ib yam txaus tu siab npaum qhov uas raug tus Tswv muab tso tseg. Vim ntawd yog lub sijhawm uas peb yuav tsum siv tus kheej lub zog los tawmtsam tej kev txomnyem hauv lubneej, nrog rau tej kev ceeblaj uas peb xav tsis txog ua ntej, thiab qhov tseemceeb dua ntais yog peb yuav raug poob lub meejmom ua Vajtswv menyuam.
Thov Vajtswv,
Tus Tswv uas tau tsim thiab cawm nyuam yaus dim, thov zam txim rau nyuam yaus tej kev txhaum. Thov pab nyuam yaus zeem paub Vaj Ntsujplig kev qhuab ntuas, kom nyuam yaus lubneej haum Koj siab. Nyuam yaus tuav Yexus Khetos lub npe thov, Amees.
Muaj tej kev txhaum twg uas Vajtswv xav kom peb muab tso tseg tiamsis peb pheej mus ua txhaum ntxiv?
Nyeem Vajluskub hauv peb lub xyoos: Lukas 21
Kênh Youtube BHKTHN:
