Klei Aê Diê Blŭ: Klei Mtô Mñă Klei Bhiăn 32:19‑25
Êlan kliăng: “Ñu lač, “Kâo srăng mdăp ƀô̆ mta kâo kơ diñu, kâo srăng ƀuh ya srăng jing klei tuč ruê̆ diñu, kyuadah diñu jing sa găp djuê wê jhat snăk, phung anak amâo mâo klei sĭt suôr ôh” (Klei Mtô Mñă Klei Bhiăn 32:20)
Klei êmuh ksiêm mĭn: Ya klei Aê Diê bi mklă hlăm klei bi mguôp hŏng phung ƀuôn sang Israel? Ya klei phung buôn sang Aê Diê ngă leh ngă kơ Aê Diê ngêñ? Si Aê Diê srăng bi kmhal phung ƀuôn sang Ñu? Ya klei hriăm hruê anei mñă kơ drei?
Lŏ čuê lu klei lač kơ klei soh phung ƀuôn sang Israel jing klei čih kơ klei Aê Diê srăng bi kmhal phung ƀuôn sang kjham snăk. Klei tal êlâo Aê Diê ngă jing lui phung ƀuôn sang Israel (êlan 19). Aê Diê khut khat lač, Ñu srăng mdăp ƀô̆ mta Ñu mơ̆ng phung ƀuôn sang. Mta phŭn jing kyua diñu amâo lŏ jing sa ƀuôn sang Doh Jăk msĕ si êlâo ôh, ƀiădah jing leh sa găp djuê wê jhat snăk, amâo sĭt suôr ôh.
Amâo mâo ôh hlei pô dưi thâo săng klei Aê Diê ngêñ prŏng snăk tơdah ƀuh phung ƀuôn sang Ñu ruah lŏ nao kkuh kơ phung yang amâo mâo yuôm, hlăk êjai anăn diñu lŏ lui hĕ Aê Diê jing Pô hrih mjing diñu, bi tui diñu, leh anăn mjing leh diñu jing sa găp djuê. Kyua klei amâo mâo sĭt suôr anăn ngă leh kơ phung ƀuôn sang Israel hrô kơ dưi dưn boh tŭ mơ̆ng lăn ala, snăn lŏ klam klei truh jhat, klei ruă tưp, mbĭt hŏng klei jhat truh mơ̆ng phung roh. Êngao anăn, êlan 21 brei thâo êdei anei Aê Diê ăt “srăng mčhur diñu”, jing Aê Diê srăng ngă kơ diñu đĭ ai ngêñ hlăm klei iêô phung ƀuôn sang tue jing “phung găp djuê mluk” kơ hdră bhiăn ƀiădah lŏ jing phung ƀuôn sang Aê Diê hlăm klei đăo kơ Khua Yang Yêsu Krist. Khădah snăn, dưi lač klei kjham hĭn Aê Diê bi kmhal phung ƀuôn sang Ñu amâo djŏ jing Ñu tuh klei truh anei truh kơ klei mkăn, ƀiădah jing Ñu bi mklă lui phung ƀuôn sang. Klă sĭt, amâo mâo ôh klei huĭ hyưt hĭn kơ Pô bi tui leh phung ƀuôn sang Israel, Pô mjing leh diñu jing sa găp djuê pioh hjăn kơ Aê Diê, Pô răng mgang leh diñu ti anăp djăp klei huĭ hyưt hlăm klei hdĭp dŭm gưl ênuk, Pô atăt gai leh diñu hlăm Lăn Aê Diê Ƀuăn čiăng dưn klei hdĭp êbeh dlai mơ̆ng krĭng lăn bŏ hŏng êa ksâo leh anăn êa hnuê, ară anei lač lui diñu. Klei anei amâo mdê ôh hŏng klei luč ram!
Aê Diê jing Pô mdrŏng hŏng klei pap, ƀiădah amâo djŏ kyua snăn ôh Ñu srăng lui jih amâodah ngă ngơi mang hŏng klei hdĭp drei soh jhat, amâo čiăng kmhal wăt tơdah Ñu mñă leh kơ drei hŏng lu hdră. Drei đăm dlăng hơăi mang ngă lu đei klei soh tơl Aê Diê bi mklă lui hĕ drei msĕ si Ñu bi mklă lui phung ƀuôn sang Ñu. Amâo mâo ôh ya klei knap mñai hĭn hŏng klei Aê Diê lui. Kyua anăn jing hlăk drei tuôm hŏng djăp klei dleh dlan hlăm klei hdĭp, hŏng lu klei truh jhat drei amâo thâo êlâo ôh, leh anăn kjham hĭn jing bi luč hĕ klei dưi jing anak Aê Diê.
Mâo mơ̆ ya klei soh Aê Diê čiăng drei lui ƀiădah drei ăt lŏ dơ̆ng ngă soh mơh?
Wah lač: Ơ Khua Yang, Pô hrih mjing leh kâo, leh anăn bi tui kâo. Akâo kơ Ih pap brei kơ ya klei soh hlăm klei hdĭp kâo. Akâo kơ Ih đru kâo thâo pral kơ klei Yang Mngăt Jăk ƀuah mkra, čiăng đru kơ mâo nanao klei hdĭp bi mơak kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Luk 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
