Tơdrong Pơđơ̆k 23:9-11
“Yua kơ Kră Yang dŏng pơklaih lu sư noh mơsêh mơyang, Gô dŏng lu sư, na blah ih.”(Tơdrong Pơđơ̆k 23:11)
Nơ̆r jet tơchĕng pơwao:
– Kon bơngai bơ̆n băt kơ tơdrong ưh kơ kĕ sư thoi yơ?
– Bơngai bu đei wă pĕng bơ̆ng ăn kơ lu bơngai dơnuh hin?
– Lu bơ̆n đei tơ’bôh kơ tơdrong Kră Yang mơsêh mơyang rim năr thoi yơ?
Kon bơngai bơ̆n kăl kơ băt Kră Yang ‘Bok Kei-Dei noh jơ̆ mơsêh mơyang tih hloh, kon bơngai bơ̆n jơ̆ rơdu tơrăn. Lăm Sơ̆p hla bơar âu, ‘bok Pơtao Salômôn bơtho kon ‘nĕ kơ đĭ jơhngơ̆m wă tơplih kơ minh ‘nu bơngai mă kơtul ưh kơ hlôh. Nơ̆r “ưh kơ hlôh” lăm trong 9 nơ̆r tơm lăm nơ̆r Hêbrơ noh jơ̆ “kesil”, wă khan kơ tul, ưh kơ mơ̆ng, ưh kơ wă tơplih kơ tơdrong tơchĕng, mă ưh kơ hlôh kơ dih akâu. ‘Nâu jơ̆ bơngai ưh kơ tơplih mưh liơ jê̆ liơ hloi đĕch, pơang akâu kơdih Ih nĕ kơ hơdrin bơtho sư yua kơ tơdrong mă ih nŏng noh ưh kơ yua păng gô pŭ iŏk tơdrong mă sư lăng ưh kơ rơ-a. Dôm tơdrong gơh hơgei mă ih đei bơtho sư noh nhen thoi maih mă klơ̆m ăn kơ nhŭng. ưh kơ đei yua kiơ (Mathiơ 7:6)? Ih gô ưh kơ đei tơplih sư.
Gah tơdrong pha ra dơ̆ng ih kăl kơ băt Kră Yang ‘Bok Kei-Dei mơsêh mơyang. ‘Nĕ kơ tơchĕng ih yua tơdrong gơh hơgei dah jên tơmam “minh tơpang ti na tang măt ‘năr” wă pơrăm lu bơngai mơti, bơngai dơnuh hin. Mă khan bơngai dơnuh hin ưh kơ gơh wă dŏng kơ dih sư đơ̆ng tơdrong anat, mă lei Kră Yang ‘Bok Dŏng Pơklaih sư noh jơ̆ Kră Yang mơsêh mơyang gô dŏng tơdrong lu sư. ‘Nĕ kơ tơchĕng wă tơgar iŏk chŭn mir bơngai mơti, dah bơngai hơdro po mă khan ưh kơ đei bơngai bu dŏng tơgŭm sư. Nơ̆r ‘Bok Kei-Dei đei khan “Kră Yang gô teh tơhuŏng hnam lu bơngai pơang; Mă-lei sư gô bơwei hơdral teh lu drŏ-kăn adro.”
Dang ei lăm teh đak đei lu bơngai lăng ưh kơ lêng ê, che bơle hiĕk kơ lu bơngai ră roi Tơdrong ‘Nao ‘Lơ̆ng wă dŏng pơklaih lu sư ră. Lu bơngai thoi noh jơ̆ “kơtul” dêh bơ̆t anăp Kră Yang ‘Bok Kei-Dei hơgei tôm tơdrong. Lu sư pơ ang yua tơdrong hlôh băt lăm teh đak “ưh kơ lăng tơdrong hlôh băt” đơ̆ng ‘Bok Kei-Dei. ‘Bok Pôl đei chih thoi âu: “Lu bơngai wă hiong răm, lu sư lăng tơdrong bơ̆n bơtho gah tơdrong Yêsu Krist lôch tơ ‘long pơglang, lu sư lăng dang tơdrong kơtul đĕch. Mă-lei gah bơ̆n, bơ̆n băt tơpă tơdrong Yêsu lôch tơ ‘long pơglang kăl dêh, noh tơdrong mơsêh mơyang ‘Bok Kei-Dei pơklaih bơ̆n.” (I Kôrintô 1:18). Mălei lu bơ̆n ‘nĕ kơ bơ̆l hăl, athei dan tơdrong anat ‘bơ̆t năp Kră Yang mă gơh pơm tôm tơdrong. Yua kơ tơdrong mơsêh Kră Yang đei dŏng bơ̆n thoi yơ. Na Yang Bơhngol ‘Lơ̆ng gô tơplih bơngai mă arăng kơ̆l thoi noh mơ̆n. lu bơ̆n kăl kơ tơ’bôh tơdrong ‘mêm, păng tơdrong tơpăt sĭt lăm chăl arih, hăm lu bơngai mơti, bơngai hơdro po wă kơ đei đon lui kơjăp lăm Kră Yang mơsêh mơyang. Kră Yang khan: “Bơngai lui bu băt kơ năm ngôi tơ lu kon mơti, lu bơngai adro apo pơmat-tat kơ’bah kơ’bôch păng sư ưh kơ kiơ̆ thoi lu bơngai tơ ala teh ưh kơ lui, bơngai noh boih ‘Bă tơm bơ̆n ‘Bok Kei-Dei jô̆ sư lui kơjăp hăm pơm tơpăt” (Yakơ 1:27)
Ơ Kră Yang, Inh bơnê kơ Ih yua kơ ih đei dŏng pơklaih păng ăn kơ inh đei pŭn hiôk lăm chăl arih. Apinh ‘Bă tơgŭm inh dơ̆ng kơjăp lăm tơdrong lui lăm Kră Yang mơsêh mơyang, dơ̆ng kơjăp năm ră roi anăn Ih. Apinh Ih tơgŭm inh ling lang tơƀôh jơhngơ̆m đon lui đơ̆ng tơdrong arih đei tơdrong ‘mêm mơnat, ‘lơ̆ng tơpăt hăm đĭ đăng bơngai. Yua anăn Kră Yang Yêsu Krsit, Amen!
Tơdrong kiơ tơgŭm bơ̆n đei jơhngơ̆m chơ̆n hơđơ̆ng ră roi anăn Kră Yang mă tơ’bơ̆p tơdrong hiôk chơt dah anat anot?
Đŏk Sơ̆p Hla bơar ‘Bok Kei-Dei lăm pêng sơnăm: Luka 20
Kênh Youtube BHKTHN:
https://www.youtube.com/c/bhkthn
