Klei Aê Diê Blŭ: Y‑Mathiơ 19:16‑20
Êlan kliăng: “Leh anăn anei jing klei hdĭp hlŏng lar: čiăng kơ diñu thâo kral Ih, knŏng hjăn Ih jing Aê Diê sĭt, leh anăn Yêsu Krist Pô Ih tiŏ hriê leh” (Y‑Yôhan 17:3)
Klei êmuh ksiêm mĭn: Kơ ya klei êkei hlăk ai nao kơ Khua Yang Yêsu leh anăn êmuh? Si ngă Khua Yang Yêsu lŏ wĭt lač kơ êkei hlăk ai? Tơdah dôk ti anăp Khua Yang leh anăn Klei Ñu Blŭ, si drei thâo kơ drei jing?
Mâo sa čô êkei hlăk ai mdrŏng snăk nao kơ Khua Yang Yêsu čiăng êmuh Ñu snei: “Ơ Nai, ya klei jăk brei kâo ngă čiăng mâo klei hdĭp hlŏng lar?” Klei Mrâo Mrang Jăk Y‑Luk brei thâo êkei hlăk ai anei jing sa čô khua (Y‑Luk 18:18). Klei jăk jing êkei hlăk ai anei uêñ mĭn sĭt kơ klei ya srăng ngă čiăng mâo klei hdĭp hlŏng lar leh anăn ñu nao êmuh djŏ pô jing Khua Yang Yêsu. Ƀiădah ñu knŏng thâo kơ Khua Yang Yêsu jing sa čô nai mtô klei bhiăn, sa čô raƀi, leh anăn klei ñu uêñ mĭn sĭt jing “ya klei jăk” srăng ngă thiăm čiăng bi djăp čiăng mâo klei hdĭp hlŏng lar? Klei yăl dliê brei ƀuh ñu jing sa čô mgao leh anăn bi mni mă kơ klei jăk ñu ngă, Khua Yang Yêsu čiăng đru brei ñu ƀuh si klei ñu jing kyuanăn Khua Yang lač, “Knŏng mâo Sa čô jing jăk” đuč čiăng lač knŏng hjăn Aê Diê yơh jing Pô Doh Jăk amâo mâo klei soh ôh. Ti tluôn anăn, Khua Yang Yêsu yap dŭm klei čih hlăm klei bhiăn čiăng kơ ñu thâo ñu jing sa čô mnuih soh leh anăn amâo dưi dưn klei hdĭp hlŏng lar ôh, ƀiădah êkei hlăk ai lŏ wĭt lač kơ Khua Yang Yêsu snei, “Kâo gưt leh jih jang klei bhiăn anăn; ya klei ka djăp?” Ñu ăt mĭn klei djă pioh klei bhiăn klei đăo jing ngă bi ênŭm klei bhiăn Aê Diê.
Hruê anei, hlăm Phung Sang Aê Diê ăt mâo lu mnuih mĭn knŏng ngă bi ênŭm klei bhiăn klei đăo amâodah mâo lu hră yap bi leh adŭ hriăm, sĭt nik srăng dưi mŭt hlăm Ƀuôn Jăk. Khua ƀĭng kna Y‑Pôl lač kơ Phung Sang Aê Diê Galati thâo klei bhiăn jing msĕ si nai mtô bi hriăm drei thâo ti klei djŏ ti klei soh (Galati 3:24). Pô čih hră Y‑Yakơ brei ƀuh amâo mâo sa čô dưi gưt ênŭm kơ klei bhiăn djŏ tui si hnơ̆ng Aê Diê čuăn ôh (Y‑Yakơ 2:10). Drei thâo jih jang mnuih soh leh sơăi kyuanăn amâo dưi yua klei jăk pô ngă leh bi mlih mă klei hdĭp hlŏng lar ôh (Rôm 3:10, 23). Khua ƀĭng kna Y‑Yôhan mblang brei drei thâo săng klei hdĭp hlŏng lar jing klei thâo kral sĭt Aê Diê leh anăn tŭ ư kơ hdră Ñu pap brei klei soh hlăm Khua Yang Yêsu Krist.
Knư̆ drei thâo kral Khua Yang knư̆ drei thâo kral kơ drei pô jing sa čô mnuih soh jhat êdimima msĕ si Khua pô hưn êlâo Y‑Êsai lač leh snei: “Kâo lač, “Knap mñai yơh kơ kâo! Djiê yơh kâo; kyuadah kâo jing mnuih mâo ƀăng kƀông čhŏ mrŏ, kâo dôk hdĭp ti krah sa phung ƀuôn sang mâo êlah čhŏ mrŏ…” (Y‑Êsai 6:5). Knư̆ thâo kơ drei pô jing mnuih soh, knư̆ drei bi luă gŭ drei pô leh anăn kmhal hĕ kơ klei soh ti anăp Khua Yang. Knŏng hŏng klei pap leh anăn klei khăp Khua Yang yơh drei dưi mâo klei pap brei kơ klei soh leh anăn brei kơ drei mâo klei hdĭp hlŏng lar.
Drei dôk bi luă gŭ drei pô kmhal klei soh ti anăp Khua Yang hĕ amâodah bi mđĭ drei pô kyua klei jăk drei ngă?
Wah lač: Ơ Khua Yang Yêsu, kâo thâo kơ kâo pô jing sa čô mnuih soh, amâo mâo klă ênŭm ôh. Akâo Ih pap brei kơ klei mgao kâo, brei kâo bi luă gŭ kâo pô kmhal klei soh ti anăp Ih čiăng kơ Ih pap brei klei soh kâo leh anăn brei kơ kâo mâo klei hdĭp hlŏng lar. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Luk 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
