Klei Aê Diê Blŭ: Y‑Mathiơ 19:27-30
Êlan kliăng: “Leh anăn grăp čô hlei pô lui sang ñu amâodah ayŏng adei, amai adei, amĭ ama, phung anak, amâodah lăn hma kyua anăn kâo, srăng mă tŭ sa êtuh bliư̆ lu hĭn leh anăn dưn wăt klei hdĭp hlŏng lar. Ƀiădah lu phung êlâo srăng jing êdei, leh anăn phung êdei srăng jing êlâo.” (Y‑Markôs 10:29-30)
Klei êmuh ksiêm mĭn: Ya klei Khua ƀĭng kna Y‑Pêtrôs êmuh leh Khua Yang Yêsu? Ya ngă ñu êmuh snăn? Si Khua Yang Yêsu wĭt lač leh kơ phung khua ƀĭng kna? Ya klei hriăm hruê anei mñă leh kơ drei?
Leh hmư̆ Khua Yang Yêsu mtô kơ phung mdrŏng leh anăn Ƀuôn Ala Mtao, Khua ƀĭng kna Y‑Pêtrôs bi ala kơ phung khua ƀĭng kna êmuh Khua Yang, “Nĕ anei, hmei lui leh jih jang mnơ̆ng leh anăn tui hlue ih. Ya mnơ̆ng hmei srăng mâo lĕ?” (êlan 27 ). Phung ƀĭng kna klă sĭt čiăng thâo diñu pô djăp klei găl čiăng mŭt hlăm Ƀuôn Ala Mtao mơ̆ amâodah hơăi? Leh anăn tơdah diñu lui leh bruă knuă, gŏ sang, ƀĭng găp, djăp mta mnơ̆ng mkăn, leh anăn hriăm klam kyâo bi kal tui hlue Khua Yang (Y‑Mathiơ 16:24) snăn ya klei diñu srăng mâo? Khua Yang Yêsu mă mđuê̆ jih klei phung khua ƀĭng kna rŭng răng, đăo đing tơdah Ñu lač digơ̆ srăng dôk gŭ ti jhưng mtao leh anăn hrăm mbĭt kiă kriê hŏng Ñu tơdah Khua Yang lŏ hriê. Khădah snăn, amâo dôk guôn truh hruê knhal tuč ôh ƀuh klei jăk mơak mơ̆ng bruă lui jih jang čiăng tui hlue Khua Yang, ƀiădah hlăm klei hdĭp anei mtam diñu srăng thâo kơ lu klei jăk mơak, klei brei, klei đru êbeh dlai mơ̆ng Khua Yang tơdah diñu sĭt suôr nanao tui hlue Khua Yang leh anăn mă bruă kơ Ñu. Khua Yang ăt bi mklă hŏng phung khua ƀĭng kna tơdah diñu sĭt suôr truh knhal tuč, diñu srăng mâo klei hdĭp hlŏng lar.
Khădah snăn, Khua Yang Yêsu ăt hưn brei phung khua ƀĭng kna răng, “Ƀiădah lu phung êlâo srăng jing êdei, leh anăn phung êdei srăng jing êlâo”(êlan 30). Khua Yang čiăng mñă kơ phung ƀĭng kna đăm ngă mgao ôh huĭdah pô srăng lĕ buh leh anăn amâo tŭ jing ôh, kyua hnơ̆ng čuăn hlăm klei hdĭp anei mdê hŏng hnơ̆ng čuăn Ƀuôn Ala Mtao Adiê. Brei jih ai tiê hlăm klei tui hlue Khua Yang, đăm brei klei bi lông hdơ̆ng pô ngă bi kpăk pô ôh.
Hruê anei, mâo lu phung đăo hlăm sang Aê Diê sui thŭn ƀiădah amâo klă ôh kơ klei pô dưi mŭt hlăm Ƀuôn Ala Mtao mơ̆ amâodah hơăi? Klei rŭng răng, đing anei srăng ngă kơ drei êdu ai tơdah tui hlue Khua Yang kyua amâo ƀuh ôh klei jăk mơak leh anăn klei ƀuăn Aê Diê brei kơ pô. Brei drei bi mklă pô klă sĭt kmhal klei soh leh mơ̆ leh anăn đăo kơ Khua Yang Yêsu leh mơ̆ ka? Tơdah klă sĭt bi mklă klei đăo pô hŏng Aê Diê, drei jhŏng tui hlue Khua Yang leh anăn myơr jih kơ Ñu, tŭ klei arăng ngă jhat, srăng lui hĕ đa đa klei bi mguôp, boh nik tŭ ư lui klei tŭ dưn lăn ala čiăng jih ai tiê tui hlue Khua Yang leh anăn gưt hlue si klei Ñu čiăng kơ klei hdĭp drei. Snăn drei srăng amâo tŭ klei mplư ôh leh anăn amâo bi luč ôh klei pap Aê Diê.
Drei klă sĭt mơ̆ drei pô đăo leh kơ Khua Yang Yêsu leh anăn srăng mâo klei mưn hlŏng lar mơ̆ng Khua Yang?
Wah lač: Ơ Khua Yang, akâo kơ Ih đru kâo kjăp ai tiê tui hlue Khua Yang leh anăn myơr jih kơ Ih, amâo đing ôh klei đăo pô ăt msĕ mơh klei jăk mơak Aê Diê ƀuăn brei kơ hlei pô jih ai tiê mă bruă kơ Ih truh knhal tuč. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Bruă Mtao 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
