Mathais 19:27-30
Nqe cim:
“Yexus hais rau lawv hais tias, yog tiag, tiamsis kuv qhia tseeb rau nej hais tias tus uas tso vajtse, tso kwvtij, tso nkauj muam, tso niam, tso txiv, tso menyuam thiab tso liaj teb tseg vim nws nrog kuv mus thiab qhia Txojmoo Zoo, tiam no nws yuav tau ib puas npaug ntxiv, xwsli: vajtse, kwvtij, nkauj muam, niam thiab txiv, menyuam, liaj teb thiab nws yuav raug kev tsimtxom; tiam tom ntej nws yuav tau txojsia ntev dhawv mus ibtxhis.” (Malakaus 10:29-30)
Lus nug rau sawvdaws xav:
– Timthawj Petus tau nug tus Tswv yam dabtsi?
– Vim li cas Petus nug li ntawd?
– Tswv Yexus teb rau cov thwjtim zoo li cas?
– Peb kawm tau yam twg los ntawm zaj no?
Tom qab uas hnov Tswv Yexus qhia txog tus neeg npluanuj thiab Ntuj Ceebtsheej, Timthawj Petus sawvcev ntawm cov thwjtim nug tus Tswv, “Peb twb tso txhua yam tseg thiab nrog koj txog tav no, peb yuav tau dabtsi?” (nqe 27). Cov thwjtim xav paub tias saib lawv puas txaus peevxwm mus nyob hauv Vajtswv lub Tebchaws? Thiab thaum lawv twb tso haujlwm, tsevneeg, txhua yam tseg thiab xyaum kwv ntoo khaublig nrog tus Tswv mus (Mathais 16:24), ces lawv yuav tau yam dabtsi? Tswv Yexus tshem tej kev txhawj, ua xyem xyav ntawm cov thwjtim mus thiab hais rau lawv tias lawv yuav tau nrog tus Tswv nyob thiab nrog tus Tswv kav thaum Nws rov qab los. Tiamsis, tsis yog tos mus txog thaum lub sijhawm kawg lawv mam tau txais qhov koob hmoov uas lawv tso txhua yam tseg nrog tus Tswv mus, tamsim no hauv lub neej lawv twb tau koob hmoov, tau kev pab ntau kawg nkaus ntawm Vajtswv thaum lawv ncaj ncees nrog tus Tswv mus thiab ua Nws tes haujlwm lawm. Tus Tswv yeej hais khov khov rau cov thwjtim tias thaum lawv ua siab ntev mus txog thaum kawg ces lawv yuav tau txojsia ntev dhawv ibtxhis.
Dua li ntawd, Tswv Yexus kuj ceebtoom rau cov thwjtim tias, “muaj ntau tus uas nimno ua cov thawj yuav tau mus nyob tom tw, thiab cov uas nimno nyob tom tw yuav tau los ua cov thawj.” (nqe 30). Tus Tswv xav qhia rau cov thwjtim kom lawv tsis txhob txajmuag, tsis khavtheeb nyob tsam lawv ua txhaum thiab qaug zog, rau qhov lub ntiajteb no zoo tsis cuag li Vajtswv lub Tebchaws. Cia li ua siab nrog tus Tswv mus, tsis txhob muab qhov uas yeej swb los thaiv yus kev.
Nimno, muaj ntau tus ntseeg nyob zwm hauv Pawg Ntseeg ntev xyoo tiamsis tsis tau ruaj siab rau qhov tau mus Ntuj Ceebtsheej lossis tsis tau? Txojkev txhawj, ua xyem xyav no muaj peevxwm yuav ua rau peb qaug zog thaum nrog tus Tswv mus, rau qhov ntsia tsis pom tau koob hmoov thiab tej lus tus Tswv cog tseg tsis pom tiav. Peb cheemtsum paub tias yus twb lees txim thiab ntseeg Tswv Yexus lawm los tsis tau? Thaum paub meej yus txojkev ntseeg tus Tswv, peb thiaj kam nrog tus Tswv mus thiab fij tus kheej rau Nws, txaus siab hlo raug tsimtxom, tso tej uas neeg ntiajteb suav tias zoo nrog tus Tswv mus thiab ua raws nraim li Nws lub siab nyiam. Ua li no peb thiaj yuav tsis raug haub ntxias thiab poob koob hmoov.
Thov Vajtswv,
Tus Tswv, thov Koj pab kom nyuam yaus ruaj siab nrog Koj mus thiab fij tus kheej pub rau Koj, tsis ua xyem xyav txog kev ntseeg thiab tej koob hmoov Koj pub rau cov neeg rau siab ua Koj tej haujlwm mus txog thaum kawg. Tuav Tswv Yexus lub npe thov, Amees.
Peb puas hais tau khov kho tias yus twb ntseeg Yexus thiab yuav tau txais nqi zog mus ibtxhis hauv Nws?
Nyeem Vajluskub hauv peb lub xyoo: I Vajntxwv 17
Kênh Youtube BHKTHN:
