Klei Aê Diê Blŭ: Philip 3:1-15
Êlan kliăng: “Sĭt nik kâo yap jih jang mnơ̆ng msĕ si luč leh kyua klei thâo kral Krist Yêsu Khua Yang kâo jing yuôm êgao hĭn” (Philip 3:8a)
Klei êmuh ksiêm mĭn: Khua ƀĭng kna Y‑Pôl brei thâo anak mnuih dưi ktưn hưn amâodah đăo knang hlăm ya dua mta klei? Phung “khăp klĭt mgưt” ktưn hưn kơ ya mta klei? Ya ngă Khua ƀĭng kna Y‑Pôl dlăng dŭm klei anăn jing luč amâo djŏ mâo ôh? Lŏ dlăng wĭt thŭn êgao, ya klei drei mâo?
Khua ƀĭng kna Y‑Pôl čih hră kơ phung đăo Philip hlăk ñu dôk hlăm sang mnă kyua Klei Mrâo Mrang Jăk. Khădah snăn ñu amâo mdei mđĭ ai digơ̆ mơak bĕ. Hlăm akŏ drêč 3, sa blư̆ dơ̆ng, ñu mtrŭt phung đăo “mơak bĕ” (êlan 1). Ƀiădah ñu thâo phung ƀuôn sang Aê Diê dưi dưm klei mơak, klei ktưn hưn amâo djŏ anôk anăn êdei anăn ñu hưn brei răng: “Răng bĕ!”
Klei ñu hưn brei răng mphŭn mơ̆ng êlan 2 “Răng bĕ kơ phung mă bruă jhat, phung kâo pia asâo, phung mgưt khăt klĭt” Ya ngă ñu blŭ ktang snăn? Kyua ñu thâo săng mâo lu phung mgưt khăt klĭt “knang kơ klei năng tui si kđeh” (êlan 4), ktưn hưn kơ ya klei nah êngao msĕ si khăt klĭt, jing phung Israel, “djuê ana tlâo gưl” jing phung Israel, hlăm êpul Pharisi, hur har mă bruă kơ Aê Diê, kpă ênô tui si klei bhiăn, amâo mâo klei arăng dưi ƀuah ôh (êlan 3-6). Khădah snăn, klei ktưn hưn leh anăn đăo knang kơ klei anăn jing hdĭp hlue si klei dlăng hđăp, leh anăn Khua ƀĭng kna Y‑Pôl hlăk đưm tuôm hdĭp leh snăn, ƀiădah ară anei ñu amâo lŏ dlăng djăp mta bruă hlue si hđăp ôh. Ya klei êlâo dih ñu ktưn hưn leh anăn dlăng jing tŭ dưn, jing dưi, snăn ară anei ñu dlăng jing luč, jing hơăi. Ñu thâo anăn knŏng jing dŭm mta “tui si kđeh”. Hlue si hnơ̆ng čuăn mrâo hlăm Khua Yang, klei yuôm hĭn hlăm klei hdĭp jing “klei thâo kral Krist Yêsu Khua Yang” (êlan 8), thâo kral Ñu jing Pô Bi Mtlaih, jing pô bi mtlaih klei hdĭp. Lač klă hĭn, “thâo kral Khua Yang” jing thâo ênoh yuôm klă sĭt, dlăng djăp mta bruă tŭ jing amâodah hơăi, grăp čô mnuih tui si Aê Diê, jing lui bruă knang hlăm klei nah êngao, čiăng “kkuh mpŭ kơ Aê Diê hŏng Mngăt Myang Ñu” (êlan 3).
Jih sa thŭn hlue mlan ƀlĕ, drei lŏ dlăng wĭt leh anăn mâo lu klei čiăng bi mni lač jăk kơ Khua Yang: bruă knuă găl jăk, klei bi mguôp mơak mñai, dưi mguôp ai tiê hlăm Sang Aê Diê… Anăn klă sĭt jing klei jăk mơak Aê Diê brei. Ƀiădah ăt mâo mơh năng ai hlăm thŭn êgao drei tuôm hŏng klei amâo tŭ jing hlăm bruă knuă, klei bi mguôp bi kruh, ruă duam nanao…Msĕ si Khua ƀĭng kna Y‑Pôl, tŭ jing amâodah hơăi, mâo amâodah luč, mâo mnga amâodah hơăi hlăm thŭn êgao, amâo dưi mkă ôh hŏng hnơ̆ng čuăn lăn ala. Hlăm Khua Yang, drei ăt “mâo” sĭt amâo mâo klei anăn. Lŏ dlăng sa thŭn êgao hlue si hnơ̆ng čuăn Khua Yang čiăng mơak bi mni kơ Khua Yang leh anăn mprăp mŭt hlăm thŭn mrâo.
Drei dôk dlăng hlăm hnơ̆ng čuăn hđăp amâodah mrâo čiăng ksiêm dlăng ênoh yuôm klei hdĭp?
Wal lač: Ơ Khua Yang, akâo kơ Ih đru kâo thâo dlăng hlue si hnơ̆ng čuăn Ih čiăng dlăng wĭt sa thŭn êgao, lŏ dlăng klei mâo, klei luč hlăm hnơ̆ng čuăn Aê Diê leh anăn mŭt hlăm thŭn mrâo hŏng klei mơak hlăm Khua Yang.
Dlăng Klei Aê Diê Blŭ hlăm tlâo thŭn: Y‑Êsêkiêl 14:12–16:14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
