Klei Aê Diê Blŭ: Hêbrơ 11:23-28
Êlan kliăng: “Ñu yap klei arăng ngă jhat kyua Krist jing ngăn dŏ yuôm hĭn kơ ngăn dŏ čar Êjip, kyuadah ñu čang guôn kơ klei mưn ênuk êdei” (Hêbrơ 11:26)
Klei êmuh ksiêm mĭn: Hŏng klei đăo, ya mta klei đăo Y-Môis ruah? Ti mnêč hgăm đru ñu dưi ruah msĕ snăn? Ya klei brei ih čuăn ruah hlăm klei hdĭp klei đăo ih hruê anei?
Tơdah Y-Abraham jing pô kkiêng kơ găp djuê Israel snăn Y-Môis jing sa čô khua gĭt gai mjing kdruêh grua kơ phung Israel, leh anăn, anăn ñu nao mbĭt hŏng klei bhiăn. Phung Israel mpŭ snăk kơ Y-Môis kyua jih bruă prŏng ñu ngă leh, ƀiădah pô čih hră mơĭt kơ phung Hêbrơ lač Y-Môis jing sa čô mnuih hdĭp hŏng klei đăo.
Tal êlâo hĭn, klei đăo Y-Môis bi hmăi mơ̆ng amĭ ama ñu jing phung đăo kluôm dhuôm leh anăn jao anak êkei diñu kơ Aê Diê pô kiă kriê. Truh êdam, Y-Môis mâo klei đăo ñu pô bi êdah hlăm klei ñu ruah. Ñu ruah lui hĕ klei jing anak êkei kơ anak mniê mtao čar Êjip̆; lui jih klei mơak lăn ala ênưih kơ ñu mâo hŏng klei jing anăn, kyuadah ñu thâo jih klei anăn amâo bi mơak kơ Aê Diê ôh̆; ruah tŭ klei arăng ngă jhat mbĭt hŏng phung ƀuôn sang Aê Diê hlăm klei jing hlŭn bŏ hŏng klei knap mñai (êlan 24-25). Y-Môis hdĭp êlâo kơ Khua Yang Yêsu truh 1.500 thŭn, ƀiădah tơdah tŭ klei knap mbĭt hŏng phung ƀuôn sang Aê Diê, arăng yap ñu tŭ klei arăng ngă jhat mbĭt hŏng Krist hlăm sa mta bruă jing bi mtlaih phung ƀuôn sang Aê Diê mơ̆ng klei knap digơ̆ (êlan 26). Leh anăn, ñu ruah klei dưi hŏng klei huĭ kơ klei mtao Pharaôn ngêñ čiăng gĭr hlăm bruă atăt phung Israel kbiă mơ̆ng čar Êjip (êlan 27). Knhal tuč, ñu ruah đăo kơ hdră Aê Diê bi mtlaih leh anăn răng mgang tơdah mkra klei ƀơ̆ng Knăm Klei Găn tal êlâo hĭn (êlan 28).
Pô čih hră mơĭt kơ phung Hêbrơ bi êdah klă mnêč hgăm kơ jih klei Y-Môis ruah hŏng dua blư̆ yua boh blŭ: “kyuadah”: “kyuadah ñu čang guôn kơ klei mưn ênuk êdei” (êlan 26b) leh anăn “kyuadah ñu gĭr msĕ si ƀuh leh Pô arăng amâo dưi ƀuh ôh” (êlan 27b). Mkă hŏng ngăn dŏ lăn ala amâodah klei mơak lăn ala, klei mưn Aê Diê brei jing yuôm hĭn kơ jih jang. Mkă hŏng klei ngêñ mtao čar Êjip jing pô mâo klei dưi leh anăn măk ƀai jih jang mnuih ƀuh sơăi, Y-Môis ruah huĭ mpŭ leh anăn gưt asăp kơ Aê Diê, Pô Hrih Mjing jih lăn adiê. Tơdah drei huĭ mpŭ kơ Aê Diê amâo djŏ kơ mnuih ôh, čang guôn klei mưn mơ̆ng adiê amâo djŏ klei mưn mơ̆ng lăn ala. Drei srăng mâo klei ktang leh anăn jhŏng ruah ngă klei bi mơak kơ Khua Yang. Anăn jing ruah sĭt suôr hưn klei drei đăo wăt tơdah tuôm hŏng klei arăng ngă jhat dưn mơh̆; ruah ngă klei kpă ênô wăt tơdah tlă anăp hŏng klei phung mâo klei dưi bi huĭ dưn̆; ruah hdĭp tui si klei Khua Yang mtă wăt tơdah jŭm dar drei amâo mâo pô ư ai hŏng drei ôh, tơl tŭ wăt klei arăng tlao mưč mơh. Jih jang klei ruah anăn yơh dôk bi êdah kơ klei drei đăo kơ Khua Yang.
Si ngă drei dôk bi êdah klei đăo drei hlăm klei drei ruah grăp hruê?
Wah lač: Ơ Khua Yang, đru kâo thâo huĭ mpŭ kơ Ih leh anăn dôk čang guôn klei mưn mơ̆ng Ih čiăng kơ kâo mâo klei čuăn ruah hŏng klei thâo mĭn, ngă klei bi mơak kơ Ih hlăm djăp mta klei kâo tuôm grăp hruê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Kbiă 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
