Klei Aê Diê Blŭ: Y-Luk 18:1-8
Êlan kliăng: “Leh anăn amâo djŏ hĕ Aê Diê srăng mkra brei bi kpă kđi kơ phung Ñu ruah leh, phung krao kwưh kơ Ñu hruê mlam? Ñu srăng bi kdung hruê đru digơ̆ mơ̆?” (Y-Luk 18:7)
Klei êmuh ksiêm mĭn: Si mnuih jing khua phat kđi hlăm klei Khua Yang Yêsu blŭ bi hriêng? Ya boh tŭ mơ̆ng klei dôk gĭr mniê djiê ung? Ya klei Khua Yang čiăng bi hriăm drei mơ̆ng klei blŭ bi hriêng anei?
Khua Yang Yêsu yăl dliê kơ phung ƀĭng kna sa klei bi hriêng čiăng bi mđĭ ai diñu brei “wah lač nanao” leh anăn “amâo êdu ai ôh” (êlan 1). Mniê djiê ung hlăm klei yăl dliê anei dôk tlă anăp hŏng klei amâo mtăp mđơr akâo kơ khua phat kđi mkra brei bi kpă kđi ñu. Pô čih hră Y-Luk dua blư̆ brei thâo snei, khua phat kđi hlăm klei blŭ bi hriêng jing mnuih amâo kkuh mpŭ kơ Aê Diê ôh, kăn uêñ kơ mnuih rei (êlan 2, 4). Khua Yang Yêsu pô brei thâo khua phat kđi anei jing mnuih “wê” (êlan 6). Ƀiădah lĕ, amâo uêñ kơ klei wê khua phat kđi jing, mniê djiê ung hriê nanao kơ ñu čiăng akâo “mkra brei bi kpă kđi kâo hŏng pô roh kâo”, gơ̆ krao kwưh mơ̆ng sui leh ƀiădah khua phat kđi amâo mđing uêñ ôh. Wăt tơdah tŭ klei hngah lu blư̆, mniê djiê ung amâo êdu ai ôh, amâo phưi lui ôh. Ai tiê dôk gĭr leh anăn klei gơ̆ iêô kwưh klei kpă nanao amâo mdei, ngă kơ khua phat kđi wê anei amâo dưi lŏ tŭ ôh klei bi rŭng, kyuanăn gĭr mgaih msir brei kơ gơ̆. Ai tiê gơ̆ dôk gĭr mâo boh tŭ dưn leh, khua phat kđi “mkra brei bi kpă kđi” kơ gơ̆.
Leh blŭ klei bi hriêng anei, Khua Yang Yêsu hưn mdah đa đa klei blŭ ksiêm djŏ kơ knuih Khua Yang leh anăn knuih klei đăo. Khua Yang yua klei blŭ khua [phat kđi wê anei msĕ si klei kčưm blŭ kơ bruă mkra brei kđi kpă mơ̆ng Aê Diê pioh kơ hlei pô “krao kwưh kơ Ñu hruê mlam”. Khua phat kđi hlăm klei yăl dliê jing sa čô mnuih wê, amâo mđing uêñ ôh klei mniê djiê ung čiăng. Ƀiădah knhal tuč kyua klei gơ̆ dôk gĭr, ñu ăt mkra brei bi kpă kđi mơh. Snăn Aê Diê klei khăp leh anăn klei kpă sĭt nik srăng wĭt lač nanao klei phung anak Ñu kwưh akâo, phung mnuih dôk gĭr kwưh akâo klei đru mơ̆ng Ñu.
Klei mniê djiê ung dôk gĭr, hưn bi klă kơ klei čiăng brei drei wah lač amâo mdei (I Têsalônik 5:17). Wah lač bi mlih drei pô lu hĭn kơ bi mlih phung riêng gah. Dôk gĭr wah lač đru drei đăo knang hĭn kơ Khua Yang leh anăn jao jih klei dưi kơ Ñu hŏng klei đăo čiăng kơ Khua Yang ngă bruă. Anăn yơh jing phŭn knhal ya ngă Khua Yang Yêsu bi ruê̆ klei blŭ bi hriêng hŏng klei êmuh snei: “Ƀiădah tơdah Anak Mnuih hriê, Ñu srăng ƀuh klei đăo ti lăn ala mơ̆?” (êlan 8). Khua Yang čiăng mñă kơ phung anak ƀuôn sang Ñu brei dôk gĭr wah lač tơl Ñu lŏ hriê. Khua Yang ăt brei ƀuh msĕ mơh klei jêč mơ̆ng ai tiê dôk gĭr leh anăn čŏng čiăng dưh kna hlăm Khua Yang, êjai drei dôk guôn hruê Khua Yang lŏ hriê, wăt tơdah klei hdĭp ti lăn ala anei ăt bŏ hŏng klei wê amâo mtăp mđơr ôh. Klei hriăm lông dlăng drei amâo knŏng wah lač nanao, ƀiădah wăt đăo knang kơ Khua Yang kluôm dhuôm, wăt tơdah kđi kpă drei tui duah amâo truh mtam ôh.
Drei êlưih êdu ai mơ̆ tơdah wah lač? Ya klei mñă kơ drei mơ̆ng klei hriăm anei?
Wah lač: Ơ Khua Yang, wăt tơdah tlă anăp hŏng lu klei amâo mtăp mđơr, klei lông dlăng hlăm klei hdĭp, akâo kơ Ih đru kâo ăt dôk gĭr wah lač nanao, amâo êdu ai ôh leh anăn dôk sĭt suôr djă pioh klei đăo tơl hruê Khua Yang lŏ hriê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 35
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
