Klei Aê Diê Blŭ: Y‑Markôs 1:32-35
Êlan kliăng: “Aguah ưm, adiê adôk mmăt, Yêsu kgŭ leh anăn kbiă nao kơ anôk hjăn, leh anăn Ñu wah lač tinăn” (Y‑Markôs 1:35)
Klei êmuh ksiêm mĭn: Ya klei Khua Yang Yêsu ngă hlăk aguah ưm adiê adôk mmăt, leh ruê̆ hruê Sabat hŏng lu bruă mơ̆ng aguah truh tlam mmăt? Si klei wah lač bi hmăi kơ bruă mă Khua Yang Yêsu? Ya klei drei hriăm mơ̆ng Khua Yang bi hmô hlăm klei wah lač?
Ti ƀuôn Kapernum, hlăm hruê Sabat, Khua Yang Yêsu mŭt hlăm sang bi kƀĭn mtô lač leh anăn bi hlao mnuih yang jhat ngă. Kbiă mơ̆ng sang kƀĭn Ñu nao čuă kmha Y‑Pêtrôs leh anăn bi hlao gơ̆ dôk êngoh ktang. Leh yang hruê lĕ, jing ruê̆ hruê Sabat, mâo lu lĭn mnuih nao akâo kơ Khua Yang bi hlao lu mta klei ruă mdê mdê, wăt phung yang jhat ngă mơh. Khua Yang pioh mmông, ai ktang bi hlao brei jih kơ diñu. Ƀiădah aguah ưm hruê mgi, hlăk adiê adôk mmăt, Khua Yang Yêsu kgŭ leh, “kbiă nao kơ anôk hjăn” čiăng wah lač (êlan 35). Leh wah lač, Khua Yang mbĭt hŏng phung ƀĭng kna lŏ nao kơ lu anôk mkăn mtô lač, hưn mdah hdră bi mtlaih mơ̆ng Aê Diê.
Boh blŭ Grek mblang jing “anôk kriêp hjăn” čiăng lač sa anôk hjăn pô, bi ktlah mơ̆ng phung lu leh anăn wăt bi ktlah hŏng phung ƀĭng kna mơh. Boh blŭ “wah lač” tinei, lač kơ klei gĭr wah lač, sui dlông. Klei Mrâo Mrang Jăk Y‑Markôs ăt mñă mơh kơ dua anôk kriêp hjăn mkăn Khua Yang Yêsu nao wah lač, hlăm Y‑Markôs 6:46 leh bliư̆ kpŭng brei kơ êbeh êma êbâo čô ƀơ̆ng, Ñu “đĭ čư̆ nao wah lač”, leh anăn hlăm Y‑Markôs 14:32-42, Khua Yang wah lač hlăm war djam Gêtsêmanê tlâo blư̆, leh anăn jih tlâo blư̆ anăn jing mmông kpĭ ktư̆ ktang snăk, hlăk Khua Yang tŭ klei mplư ruah êlan ênưih hrô kơ êlan tŭ klei knap mñai leh anăn săn asei mlei kyua klei soh phung mnuih.
Khua Yang Yêsu jing Anak Aê Diê, ƀiădah tơdah trŭn hriê ti lăn ala jing mnuih, Ñu đup gưt nanao jih hdră Aê Diê Ama leh anăn ngă bruă hlăm klei ktang myang Yang Mngăt Jăk, kyuanăn Ñu wah lač nanao leh anăn dưm klei wah lač êlâo hĭn. Msĕ snăn mơh, găn jih jang ênuk, klei wah lač mâo bruă yuôm nanao hlăm klei hdĭp phung anak ƀuôn sang Aê Diê. Hlăm hdră kkuh mpŭ mđrăm mbĭt hlăm Sang kkuh mpŭ, klei wah lač jing phŭn. Ƀiădah lĕ, wah lač amâo mjưh knŏng hlăm Sang kkuh mpŭ ôh, phung anak ƀuôn sang Aê Diê brei hriăm mơ̆ng Khua Yang Yêsu hlăm klei bi hmô pioh mmông dôk hjăn wah lač, ruah sa anôk “kriêp hjăn” mkŏ mjing klei bi mguôp hjăn hŏng Khua Yang. Anôk kriêp hjăn phung drei hruê anei amâo guôn đĭ čư̆ dlông amâodah nao kbưi hlăm sa war djam, ƀiădah ya anôk kriêp hjăn amâo mâo mnuih amâodah ya mta klei bi kpăk ôh, čiăng đăm bi kpăk drei êjai dôk wah lač. Phung đăo kơ Krist brei hriăm leh anăn kpĭ mjuăt pô hlăm klei wah lač hjăn hŏng Khua Yang jêñ jêñ. Yang Mngăt Jăk srăng bi juh, thiăm ai ktang, leh anăn atăt gai drei găn jih klei dleh dlan, klei lông dlăng hlăm klei hdĭp tơdah drei jêñ jêñ nao hlăm anôk kriêp hjăn wah lač hŏng Khua Yang.
Si ngă drei hriăm leh mơ̆ mơ̆ng Khua Yang Yêsu bi hmô, hưn mdah jih jang klei čiăng, hdră bruă kơ Aê Diê Ama amâodah adôk ngă kĭ kơ̆?
Wah lač: Ơ Khua Yang, pap brei kơ kâo kyuadah lu blư̆ kâo amâo dưm klei wah lač êlâo hĭn ôh hlăm klei hdĭp kâo. Akâo kơ Khua Yang brei kâo tui duah nanao klei Ih atăt gai, bi mđĭ ai, thiăm klei ktang mơ̆ng Khua Yang hlăm klei wah lač hŏng Khua Yang hlăm anôk kriêp hjăn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Hriêng 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
